Isaías 60 - Bible in Tzotzil de Chenalhó with Deuterocanon

Ta to sta slequilal yan velta li lum Jerusalene

¹ Jerusalén, lican me, xojobanan xa, yu'un ivul xa sac osil ta atojol; li' xa oy ta atojol li xojobal Muc'ul Diose.

² Li ic' osile ch-ic'um yu'un li banamile; li ac'ubaltique chic'umtas li jujun banamile. Pero li Muc'ul Diose ja' tsacubtas osil ta atojol; chac' tal lec xojobal ta atojol.

³ Li jujun banamile ta xlic talicuc ta saquil osil avu'un; li ajvaliletique ta xtalic ti bu xaxojoban chilique.

⁴ Toyo avil asat, q'uelo avil ta joyob; scotolic jmoj tstsob sbaic tal, yu'un chtalic ta atojol. Li aqueremetique le' xa xtal xchi'uquic ta nome; li atsebetique lec cuchbil chtalic.

⁵ C'alal chavile, toj xcuxet no'ox avo'nton; mu c'usi xtal ta avo'nton chava'ay. Xch'ay avo'nton yu'un c'alal chavil chich'ic tal ta atojol sc'ulejal li lumetic ta ti'ti' nabe xchi'uc sc'ulejal li yantic banamile.

⁶ Chavil epal camelloetic xcholoj sbaic tal, liquemic tal ta Madián xchi'uc ta Efa. Jech noxtoc chtalic scotol li yajvaltac Sabae, chcuchic tal ep c'anal taq'uin xchi'uc pom; ja' chlic yalbeic batel slequilal li Muc'ul Diose.

⁷ Scotol li chijetic te ta Cedare ja' avu'un chc'ot scotol; li tot chijetic te ta Nebaiote, ja' chlic tunuc avu'un. Yu'un jech xu' chavac'be smotonin Muc'ul Dios te ta scajleb smoton; ja' smoton chc'ot ti toj lec chile. Li Muc'ul Diose ech'em to tslecubtas li ch'ulna yu'une.

⁸ ¿Boch'otic ti le' anil chanovic tal jech chac c'u cha'al toquetique, ti xviletic no'ox tal ta anil ta snaic jech chac c'u cha'al stsumutetique?

⁹ Ja' barcoetic jmoj chtalic; ja' muc'tic barcoetic ta Tarsis ti ba'yucbe chtalique. Ja' te yic'ojic tal li anich'nabtaque; yich'ojic tal saquil taq'uin xchi'uc c'anal taq'uin yu'unic. Ja' sventa yich'el ta muc' li Muc'ul Dios avu'une, ja' li Ch'ul Dios yu'un Israel ti chayac'ot ta ich'el ta muq'ue.

¹⁰ Jech chal li Diose: “Li yanlum cristianoetique ja' tsva'anic li acoraltonale; li ajvaliletic yu'unique ja' avajtuneltac chc'ot. Ta scoj ilic sc'ac'al co'nton avu'un ti laj cac'bot majele, pero li' ta orae ta sventa slequil co'nton chajc'uxubinot.

¹¹ Xu' xa te jamal o scotol ora sti' li coraltonetic avu'une; ta c'ac'al ta ac'ubal mu persauc chich' maquel o. Yu'un jech xu' chich'ic tal ta atojol sc'ulejal li yantic banamile; jech xu' ch-ochic tal ta atojol li ajvaliletic yu'unique.

¹² Me oy jun banamil xchi'uc ajvalil yu'un ti mu sc'an xtunic avu'une, ta xch'ayic o batel; j'ech'el ch-ulic o ta sjunul slumalic.

¹³ Li sc'ulejal Libanoe vo'ot chtal ta atojol scotol, ja' li nuculpat tojetique, li c'uc'tojetique, xchi'uc li abeto te'etique. Ja' chtun sventa chich' t'ujumtasel o lec li ch'ulna cu'une; ja' sventa lec chcom ti bu ta jtec'an cacane.

¹⁴ Li xnich'nab boch'otic laj yac' avocolique chlic sbic'tajes sbaic ta atojol; li boch'otic la slabanicote chlic squejan sbaic ta atojol. Ja' ‘Lum yu'un Muc'ul Dios’, ja' ‘Vits Sión yu'un li Ch'ul Dios yu'un Israele’, xi chlic yalic ac'oplal.

¹⁵ Ac'o me comtsanbilot, me bajbilot, me solel atuc to'ox jipbilot comel, pero vu'un ta xcac' ti lec ac'oplal o sbatel osile; ta xcac' ti vo'ot ta aventa tsta xcuxetel yo'ntonic li jayc'ol amomnich'nabtac chjelovique.

¹⁶ Vo'ot chave'be lequil ve'liletic yu'unic li yantic banamile; vo'ot chavich'be sc'ulejalic li ajvaliletic yu'unique, jech chavotquin ti vu'un Muc'ul Diosune, ti vu'un Jcoltavanejun avu'une, xchi'uc ti vu'un Jpojvanejun avu'une, vu'un li Stsatsalun Jacobe.

¹⁷ “C'anal taq'uin chacac'bot ta xq'uexol li broncee; saquil taq'uin chacac'bot ta xq'uexol li tsatsal taq'uine; bronce taq'uin chacac'bot ta xq'uexol li te'e; tsatsal taq'uin chacac'bot ta xq'uexol li tone. Ta xcac' ti jun avo'nton, ti mu'yuc xa pleito chava'ay oe, xchi'uc ta xcac' o ta atojol li c'usi tuq'ue; ja' chaspasot o ta mantal, ja' chasventainot o.

¹⁸ Mu'yuc xa bu chvinaj o utbail, majbail te ta avosilal; mu'yuc xa chc'ot ta pasel yan velta jinesel vuq'uesel ta atojol. Li coralton avu'une ‘Jcoltavanej cu'un’ xi sbi chc'ot avu'un. Li ti'coraltonetic avu'une ‘Svinajesubil Slequilal Dios’ xi sbi chc'ot avu'un.

¹⁹ “Mu xa xtun avu'un c'ac'al sventa tsacubtas osil ta c'ac'altic; mu xa xtun avu'un u sventa tsacubtas osil ta ac'ubaltic. Yu'un vu'un xa jtuc luz chic'ot avu'un sbatel osil, vu'un li Muc'ul Diosune; vu'un xa axojobalun chic'ot o, vu'un li Diosun avu'une.

²⁰ Li c'ac'al chtun avu'une mu sna' xch'ay o; li u chtun avu'une mu sna' xbic'taj o, yu'un vu'un luz chic'ot o avu'un sbatel osil, vu'un li Muc'ul Diosune. J'ech'el chlaj sc'oplal o li at-o'nton chava'ye.

²¹ “Li jnaclumetic avu'une tuc' yo'nton chc'otic o; sbatel osil chu'uninic o li yosilalique. Yu'un ja' sq'uelum li te' ti vu'un la jts'une; yu'un ja' yabtel coc jc'ob jtuc, ja' sventa ac'o vinajuc li jmuc'ul jtsatsale.

²² Ac'o me toj jutebic, pero chc'ot c'alal ta jmil; ac'o me solel mu'yuc epic, pero chc'ot ta jun muc'ta lum. Vu'un li Muc'ul Diosune, ta xcac' c'otuc ta pasel ta ora no'ox c'alal me la sta sc'ac'alile”, xi li Diose.