Isaías 6 - Bible in Tzotzil de Chenalhó with Deuterocanon

I'ic'at yu'un Dios li Isaiase

¹ Ta sjabilal c'alal icham li ajvalil Uziase, laj quil chotol ta smuc'ta chotleb li Cajvaltique. Lec toyol li xchotlebe; li snatilc'u'e nojem yu'un li yut ch'ulnae.

² Te ta sba yac'ol Cajvaltique te oy serafinetic; oy vaquib xic' jujunic. Li chib xiq'uique ja' sventa tsmac o satic; li yan chibe ja' sventa ta smac o yacanic; li yan chibe ja' sventa chvilic o.

³ Jech laj yalbe sbaic jujunic: “Ja' Ch'ul Dios, Ja' Ch'ul Dios, Ja' Ch'ul Dios li Muc'ul Dios ti ech'em svu'ele. Nojem ta slequilal scotol li banamile”, xiic.

⁴ C'alal jech ic'opojique, inic li ti'naetic yu'un ch'ulnae, inoj ta ch'ayil li yut ch'ulnae.

⁵ Jech la jnop: “¡Ay, toj abul jba; ta xa xicham! Yu'un laj xa quil ta jsat li Muc'ul Ajvalile, ja' li Muc'ul Dios ti ech'em svu'ele, vu'un ti ep sbolil quee xchi'uc ti li' nacalun ta stojol li cristianoetic ti puru chopol c'usi chloc' ta yeique”, xichi.

⁶ Ta ora ivil tal ta jtojol jun li serafine slats'oj tal ta slats'ubil jbej ac'al lec tsanal, te la stsac tal ta scajleb smoton li Diose.

⁷ La snabanbun ta que jech laj yalbun: “A'yo ava'ay, li ac'al li'i, laj xa jnabanbot ta ave, jech ch'aybilot xa li c'usitic mu'yuc lec apasoje; pocbilot xa li amule”, xiyutun.

⁸ Ja'o te laj ca'ay ic'opoj li Cajvaltique, jech laj yal: “¿Boch'o ta jtac batel? ¿Boch'o xu' chbat c'opojuc ta jventatic?”, xi. Jech la jtac' li vu'une: “Li' oyun vu'une, tacun batel”, xcut.

⁹ Jech laj yalbun: “Batan cha'e, jech xbat avalbe li cristianoetic le'e: ‘Chava'yilan ta achiquinic, pero mu xc'ot ta avo'ntonic; chavililan ta asatic, pero mu xava'ibeic smelol’, uto.

¹⁰ Tsatsubtasbo yo'ntonic li jun lum le'e; macbo xchiquinic, macbo satic, yu'un mu me xa'yic, mu me xilic, mu me xc'ot ta yo'ntonic, jech mu me sutes yo'ntonic o ta jtojol, yu'un jech mu xcolic o cu'un”, xiyutun li Cajvaltique.

¹¹ Jech la jac'be: “¿Jayib c'ac'al chjalij le'e Cajval?”, xcut. Jech la stac'bun: “Ja' to me laj yich' vuq'uesel scotol li lumetique, xchi'uc me mu'yuc xa boch'o te nacal oe, xchi'uc c'alal me xocol xa scotol li naetique, xchi'uc c'alal me icom jech chac c'u cha'al xocol banamil li yosilalique;

¹² ja' to me la jtaquic batel ta yan banamil scotolique, me j'ech'el xocol icom o li yosilalique.

¹³ Ac'o me oy to chcomic jun ta lajlajuneb, pero ta xich'ic ch'ubael batel. Ja' xa no'ox xchumante'il chcom jech chac c'u cha'al c'alal chich' ts'etel jbej tulan, o yantic tsatsal tulan ti chcom to xchumante'ile. Li xchumante'il chcom toe ja' tsloq'ues tal yan xch'ul q'uelum”, xiyutun.