Isaías 59 - Bible in Tzotzil de Chenalhó with Deuterocanon

Toj ep la sta smulic ta stojol Dios li israeletique

¹ Li Muc'ul Diose mu yu'unuc lajem stsatsal ti mu xcoltavane; mu yu'unuc ipas ta coc ti mu xa'ay ac'opique.

² Ta scoj achopolil atuquic ti jech lic avoc' aba achi'uquic li Diose; ta scoj amul atuquic ti jech la snac' sba ta atojolique, ti jech mu xa xa'ay ac'opique.

³ Yu'un li ac'obique bonol ta ch'ich'; li sbic'tal ac'obique pixil ta mulil. Li aveique noj ta puru lo'lavanej; li avoq'uique pixil ta puru chopol c'op.

⁴ Mu'yuc boch'o oy ta yo'nton li tuq'uil chapanele; mu'yuc boch'o tuc' chchapanvan o. Ja' no'ox spatoj yo'ntonic yu'un li puru epalc'ope, li puru lo'lavaneje; ch'iem xa xch'utic yu'un ya'yel li c'usi chopol oy ta yo'ntonique; puru sbolil yo'nton tsvoq'uesic.

⁵ Xco'laj xchi'uc puru ston jti'val chon sluts'ojic; xco'laj xchi'uc puru na om yochelic sjalel noxtoc. Li boch'o chac'beic slo' li ston sluts'ojique chcham o yu'unic. Me oy boch'o tst'usbe li stonique, puru orachon te chloc'.

⁶ Li na om tsjalique mu yu'unuc chtun sventa tsc'u'inic. Li yabtel yoc sc'obique me jutuc mu'yuc stu sventa tsmac sbaic o. Li yabtelique puru chopolic; li sc'obique puru uts'intavanej tspas xchi'uquic.

⁷ Li yacanique ch-anilaj batel ta spasel li c'usi chopole; chbat smilic li boch'o mu'yuc smule, li c'usitic snopoj tspasique puru chopolic; puru soquesvanej, puru jinvanej tspasic ti bu chanovique.

⁸ Mu xotquinbeic o sbelal li jun o'ntonale; me jutuc mu'yuc c'usi tuc' oy ta sbe xanebic. Li sbeique solel lucul c'amal ta jyalel; li boch'o te chbatique mu staic o jun yo'ntonic.

⁹ Ja' yu'un inamaj loq'uel ta jtojoltic li c'usi tuq'ue; muc xvul ta jtojoltic li tuq'uil chapanele. La jmalatic li sac osile, pero puru ic' osil no'ox li' oy o; la jmalatic tsacub jbetic, pero ta puru ic' osil chijxanovutic.

¹⁰ Solel ta machmachtabil lijxanov ta c'alc'alna jech chac c'u cha'al ma'sat, jech chac c'u cha'al boch'o tuben sat. La jbosi cacantic ta o'lol c'ac'al jech chac c'u cha'al ta ac'ubaltic; ac'o me tsotsutic, pero xco'laj xchi'uc chamenutic ya'yel.

¹¹ Xijajetutic no'ox jech chac c'u cha'al oso, pero xijuetutic ta oq'uel noxtoc jech chac c'u cha'al stsumut. La jmalatic c'uxubinel, pero muc jtatic; la jmalatic coltael, pero inamaj batel ta jtojoltic.

¹² Toj ech'em ijelov jtoyobbailcutic ta atojol; jmulcutic xa no'ox xu' chal ti toj chopoluncutique. Yu'un li' oy o ta jtojolcutic li jchopolilcutique; xcotquincutic ti ep li jmulcutique.

¹³ Jbajmantaluncutic, mu'yuc tuc' co'ntoncutic ta atojol Muc'ul Dios; la jvoc' jbacutic ta atojol, vo'ot li Diosot cu'uncutique. Puru sa'c'op, puru uts'intavanej no'ox la jpascutic; puru epalc'op, puru lo'lavanej no'ox la jnop ta co'ntoncutic.

¹⁴ Li tuq'uil chapanele bajbil o; li c'usi tuq'ue nom oy ta co'ntoncutic. Li c'usi melele te ic'ot ta ch'ayel ta snail chapanejbail; mu xu' chnopaj o tal li c'usitic tuq'ue.

¹⁵ Li c'usi melele chtu'p xa o batel. Li boch'o mu sc'an spas c'usi chopole chich' elc'anbel c'usi oy yu'un. Ja' yu'un li Muc'ul Diose toj chopol laj yil, yu'un mu'yuc xa c'usi tuc' chich' pasel o.

¹⁶ Ich'ay yo'nton ti c'alal laj yil mu'yuc boch'o tspajes ti jech chc'ot ta pasele. Ja' yu'un lic abtejuc stuc; lic yac' tal tuq'uil chapanel yu'un stuc.

¹⁷ Li tuq'uil chapanel yu'une slapoj tal lec jech chac c'u cha'al smac scotol sbec'tal. Li coltaele xpixcolinoj tal jech chac c'u cha'al smac sjol; li spacol c'usi pasbile slapoj tal lec jech chac c'u cha'al sc'u'. Potsol tal lec ta sc'ac'al yo'nton jech chac c'u cha'al xaquita.

¹⁸ Ja' tal yac'be stojol jujun jech chac c'u cha'al tsc'an chile. Tal sloq'ues sc'ac'al yo'nton ta stojol li yajcontrae; tal yac'be stojol li boch'o chopol yo'ntonic ta stojole, xchi'uc chac'be stojol noxtoc li boch'otic nacajtic batel ta ti'ti' nabe.

¹⁹ Sbejel banamil xlic ta sloq'ueb c'ac'al c'alal to ta smaleb c'ac'al, chlic xi'icuc yu'un Muc'ul Dios ti c'alal chilbeic stsatsal svu'ele. Yu'un xco'laj xchi'uc nojelal uc'um chtal; net'bil chtal ta ven tsatsal ic'.

²⁰ Ja' Jpojvanej chc'ot yu'un li Sione, xchi'uc li smomnich'nabtac Jacob ti tsutes yo'nton yu'un smulique. Jech chal stuc li Muc'ul Diose.

²¹ Li Muc'ul Diose jech chal noxtoc: “Oy jun c'usi ta jchapan ta atojolic, jech chcalboxuc ta jamal: j'ech'el te chcom o ta atojolic sbatel osil li jtsatsal xchi'uc li chanubtasel cu'une. J'ech'el te chcom o ta stojol anich'nabic xchi'uc amomnich'nabic”, xi.