Isaías 57 - Bible in Tzotzil de Chenalhó with Deuterocanon

¹ Li boch'o tuc' yo'ntonique ta ora no'ox xu' chchamic, mu'yuc boch'o chat yo'ntonic yu'un. Li lequil viniquetique ta ora no'ox xu' chch'ayic batel. Mu'yuc boch'o cha'ibeic smelol ti ja' sventa ac'o coluc ta scoj vocol c'alal chcham li boch'o tuc' yo'ntone.

² Yu'un ja' bat staic ti bu jun xa yo'ntonic oe; yu'un ja' la stamic li tuq'uil bee, ja' yu'un bat xa xcux yo'ntonic o.

Chopol ch-ilat li boch'o chich'ic ta muc' c'usitic cuybilic ta diose

³ La'ic li'i, xnich'nab j'ac'chameletic, vo'oxuc ti la'ayinic ta sventa jmulavil vinic, jmulavil antse:

⁴ ¿Boch'o ti chana'leique? ¿Boch'o ti chac'opojic, ti chaloq'ues avoq'uic ta stojole? Vo'oxuc xnich'naboxuc jmulavil, xnich'naboxuc j'epalc'op,

⁵ vo'oxuc ti te chamulivajic ta stojol li sloc'obal diosetic avich'ojic ta muq'ue, xchi'uc ta yolon tulantic, ta yolon te'etic ti lec pimic yanale, xchi'uc ti te chamil anich'nabic sventa smoton adiosic ta soplejaltic xchi'uc ta yolon ch'entique.

⁶ “Israel, li tonetic ti lec xch'ulte-ch'ulte te ta soplejaltique ja' avu'un o. Le'e ja' xa dios c'otem o ta atojol, yu'un ja' te laj amal pasem ya'lel ts'usub ta sventa smoton; ja' te laj avac' li c'usitic yan chloc' avu'une. ¿Me toj xcuxet co'nton yu'un ti jech chapase?

⁷ Yu'un te laj avac' avayab ta mero sjol toyol vits; te muy avac' milbil matanaletic noxtoc.

⁸ Te laj avac' sloc'obal adiosic ta spat sti' ana xchi'uc ta smarcoal sti' ana sventa chana'ilan. Vu'un laj ach'ayun o comel ta avo'nton. Laj at'anan aba, lamuy ta avayab, te lavay; solel ja' ibat ta avo'nton o li mulivajele; oy c'usi lec laj achap achi'uc li ac'upil vinique.

⁹ “Ja' labatic ta stojol li ach'ultotic Meleque; laj avich'beic batel aceite xchi'uc epal muil poxil. Laj atac batel j'almantaletic avu'unic ta nomtic; laj ataquic yalel c'alal to ta yutil yavil animaetic.

¹⁰ Solel lalubtsajic ta epal xanubal; muc xana'ic ti solel mu'yuc stue. Ja' apatoj avo'ntonic yu'un ti te oy ta ac'obic li c'usitic chave'ique, ja' yu'un tsots no'ox avo'nton laj ava'yic.

¹¹ “¿C'usi svu'el li yantic diosetic ti ja' laj avich' ta muc', ti laj aquejan aba ta stojole? Vu'un xa muc xavich'un o ta muc'; mu junuc avo'nton ta jtojol. ¿Me ja' yu'un ti te no'ox ch'anxichi, ti mu'yuc c'usi laj cal ta vo'one ti jech mu xavich'un ta muq'ue?

¹² Pero vu'un jtuc ta jvinajes c'u x'elan atalel, xchi'uc li avabtel ti toj lec acuyoje.

¹³ C'alal cha'avan ta sc'anbel coltael li adiose, mu xu' yu'un chascoltaot, chaspojot. Le'e cuchbil ta ic' chbatic; ta juch'tael no'ox chch'ayic batel. Yan li boch'o chch'un ti vu'un ta jcoltae ja' ta xu'unin o li yosilale; te chnaqui o ta ch'ul vits cu'un”, xi li Muc'ul Diose.

Laj yal Dios ti tscolta li boch'o uts'intabilique

¹⁴ Ts'acal jech laj yal: “Jamic lec li bee, pasic lec ta parejo; loq'uesic scotol li c'usitic te oye; ch'ubaic lec scotol, yu'un jech lec chjelovic tal li jteclumale”, xi.

¹⁵ Yu'un li boch'o oy ta sc'ob scotole, ti stalel cuxul o sbatel osile, ti Ch'ul Dios, xi ch-albate, jech chal: “Vu'un te nacalun ta toyol, ta ch'ul vinajel, xchi'uc te oyun ta stojol noxtoc li boch'otic biq'uit chac' sbaique, xchi'uc li boch'otic abul sba cha'yique; te ta xcac'beic lec stsatsal yo'ntonic, ta jmuq'uibtasbe yo'ntonic.

¹⁶ Muc j'ech'eluc chopol chquil o li jteclumale; muc j'ech'eluc chi'ilin o yu'unic. Yu'un mu vocoluc chlaj stsatsal yo'ntonic ta jtojol; mu vocoluc xu' chch'ay batel li xch'ulelic ti vu'un cac'ojbeique.

¹⁷ Ta scoj ti yan c'usi la sc'upinique, jech li'ilin yu'unic; laj cac'be stoj smulic, la jcomtsanic o, pero yo'to la stoy sbaic, ja' la spasic o li c'usi oy ta yo'ntonique.

¹⁸ Jna' lec scotol ti c'u x'elan stalelique, pero ta jpoxtaic, ta jtojobtasic lec, ta xcac'be jun yo'ntonic; ta jmuq'uibtasbe yo'ntonic noxtoc li boch'otic chat yo'ntonique.

¹⁹ Jech ta xcalbeic: ‘Junuc avo'ntonic, vo'oxuc ti nom oyoxuque; junuc avo'ntonic, vo'oxuc ti nopol oyoxuque’, xcut chcalbeic. Vu'un ta jpoxta, yu'un ja' jteclumal.

²⁰ Yan li boch'o chopolique ja' jechic jech chac c'u cha'al nab ti xyuc'lajet no'oxe, ti mu'yuc bu ch'anxi ts'anale, ti puru c'a'ep, puru ic'ubal tsves loq'uel ta jujujot sti'e.

²¹ Mu staic lequilal li boch'otic chopolique”, xi li Diose.