Isaías 56 - Bible in Tzotzil de Chenalhó with Deuterocanon

Oy c'usi lec tstaic li boch'o chch'unic c'usitic yaloj Diose

¹ Li Muc'ul Diose jech chal: “Ja' me pasilanic li c'usitic tuc' ta pasele; ja' me pasic li c'usitic lec ta pasele. Yu'un jutuc xa sc'an sta yorail chajcoltaoxuc batel; jutuc xa sc'an chcac' ta ilel li tuq'uil chapanel cu'une.

² Toj xcuxet no'ox yo'nton li boch'o tspas jech chac le'e, ti solel scotol yo'nton tspas oe, ti chchabi li sc'ac'alil cuxub o'ntonale, ti mu soquesbe sc'oplale, ti tsq'uel sba lec ta sventa li c'usi chopole”, xi li Muc'ul Diose.

³ Me oy yanlum cristiano chac' sba ta sc'ob Muc'ul Diose, mu me jechuc snop: “Li Muc'ul Diose svoc'ojun loq'uel ta stojol li steclumale”, mu me xiuc. Ja' no'ox jech ec li eunuco vinique mu me jechuc xal: “Li vu'une ja' jechun jech chac c'u cha'al jtec' taqui-te'”, mu me xiuc.

⁴ Yu'un li Muc'ul Diose jech chal: “Li eunucoetic ti chchabiic li sc'ac'alil chacux avo'ntonique, ti ja' no'ox tsa'ic li c'usi ta jc'ane, ti ja' no'ox oy ta yo'ntonic o li c'usi jchapanoje,

⁵ vu'un ta xcac'be lec yavilic te ta jch'ulna, xchi'uc te ta yut coraltonetic cu'un. Ja' x'ech' to slequil sbi chcac'beic jech chac c'u cha'al nich'naletic; ta xcac'be lec sbiic sventa sbatel osil ti mu xtu'p oe.

⁶ Jech noxtoc li yanlum cristianoetic ti chac' sbaic ta jc'obe, ti chtunic cu'une, ti chisc'anicun leque, ti chc'otic ta mero cajtuneltaque, xchi'uc ti chchabiic li sc'ac'alil cuxub o'ntonale, ti mu soquesbeic sc'oplale, ti scotol yo'nton chch'unic li c'usi chapanbile,

⁷ vu'un ta xquiq'uic batel ta ch'ul vits cu'un; ta xcac' ti xcuxet no'ox yo'ntonic te ta snail bu chquich' c'opanele. Li milbil matanal, li chic'bil matanal chiyac'bicun te ta scajlebe ta jtsacbeic, yu'un li jnae ja' snail sc'opanbil Dios yu'un cristianoetic ta scotol lumetic, xi ch-albat sc'oplal.

⁸ Vu'un ta xcal ta jamal jtuc ti ta xcac' suticuc tal, ti ta xcac' stsob sbaic yan velta li boch'o chucbilic batel ta yantic banamile”, xi li Muc'ul Diose.

I'utatic ta scoj xchopolilic li banquilaletique

⁹ Jti'val chonbolometic, la'ic me; chonbolometic ta te'tic, la' voch'iic li chijetique.

¹⁰ Yu'un li boch'otic chchabiique ja' ma'satetic; me jutuc mu c'usi xilic. Ja' jechic jech chac c'u cha'al ts'i' ti mu sna' xti'vane, ti jeche' lucul chvaye, ti puru vayel no'ox batem ta yo'ntone.

¹¹ Ja' jechic jech chac c'u cha'al ts'i' ti mu xnoj xch'utic ta ve'ele. Ja' jchabichijetic ti mu j'ech'el xa'ibeic o smelole. Ja' stamojic o li sbe stuquique; ja' no'ox tsa'ic c'usi lec cha'ay stuquic.

¹² Jech chalic: “Bat jsa'tic pox cuch'tic; bat jsa'tic ca'tic li mero xniche, yu'un jech xu' chijyacubutic lec. Jpastic jech yan velta oc'om noxtoc; ech'em to jech ta jpastic”, xiic.