Isaías 55 - Bible in Tzotzil de Chenalhó with Deuterocanon

Ta matanal xu' chcol scotol cristiano

¹ “Acotolic, vo'oxuc ti taquin avo'ntonique, la' uch'anic li vo'e; vo'oxuc ti mu'yuc ataq'uinique, la' ve'anic ta matanal; la' uch'anic ya'lel ts'usub xchi'uc ya'lel xchu' vacax, mu'yuc chatojic.

² ¿C'u yu'un jeche' chalajes ataq'uinic yu'un li c'usi mu ja'uc ve'lile? ¿C'u yu'un chavixtan atojolic yu'un li c'usi mu xanojic yu'une? Ch'unic li c'usi chacalboxuque, jech chataic li lequil ve'lile, jech xu' chalajesic li c'usitic toj muique.

³ A'yo ava'yic lec li c'usi chacalboxuque; la'ic ta jtojol, jech chacuxiic. Jech te chcom o ta atojolic sbatel osil li c'usi la jchapan ti jbel sc'oplal c'ux ta co'nton o li Davide.

⁴ Ja' testigo ic'ot cu'un ta stojol li yantic banamile; ja' banquilal, ja' jpasmantal ic'ot ta stojol li yantic lume.

⁵ A'yo ava'yic, vo'ot oy ta aventa chaviq'uic tal ep cristianoetic ti mu xavotquinique; ep cristianoetic mu xayotquinoxuc ch-anilajic tal ta atojolic. Ti jech chc'ot ta pasele, vu'un ta jventa, vu'un li Muc'ul Diosun avu'une; vu'un li Ch'ul Diosun yu'un Israele, yu'un chacac'ot ta ich'el ta muc'”, xi li Muc'ul Diose.

⁶ Ja' lec sa'ic li Muc'ul Diose, yu'un yorail to ta tael; c'opojanic, yu'un yo'to nopol oy.

⁷ Vo'oxuc li jpasmuliloxuque, comtsanic li be atamojique; vo'oxuc ti ep sbolil avo'ntonique, comtsanic li c'usi chopol chanopique. Sutanic tal ta stojol li Muc'ul Diose, yu'un li stuque toj ep c'uxubinel yu'un; li Dios cu'untique toj ep perdón yu'un.

⁸ Jech chal li Muc'ul Diose: “Li vu'une mu jechuc ta jnop jech chac c'u cha'al chanopic li vo'oxuque; mu jechuc ta jpas jech chac c'u cha'al chapasic li vo'oxuque.

⁹ Jech chac c'u cha'al mu xatabeic stayalil vinajel vo'oxuc ti oyoxuc ta banamile; ja' jech mu xac'otic ta snopel ti bu c'alal ta jnop li vu'une.

¹⁰ “C'alal chac' vo', xchi'uc c'alal chyal tayoe, muc jeche'uc tsut batel ta vinajel, yu'un ja' chat'es lec li banamile, jech chch'i li c'usitic chich' ts'unele; jech chloc' yan ts'unubil, xchi'uc jech chloc' ave'elic.

¹¹ Ja' no'ox jech ec li jc'op chloc' ta quee, muc xocoluc tsut batel ta jtojol. Chc'ot ta pasel li c'usi oy ta co'ntone; chc'ot ta pasel scotol li c'usi ta xcale.

¹² “Li vo'oxuque cuxetuc no'ox avo'nton chaloq'uic batel; junuc avo'nton chasutic batel ta alumalic. C'alal chaq'uelic li muc'tic vits xchi'uc li bic'tal vitsetique, chavilic ti x'avlajetic ta xcuxetel yo'ntonique. Scotol li te'etique xpac'lajet no'ox sc'obic.

¹³ Ti bu to'ox ch'iem puru ch'ixetique, te ta xlic ch'iuc puru c'uc'tojetic. Ti bu puru ch'ixte'tic to'oxe, puru arrayán te'etic te ta xlic ch'iuc. Toj jun yutsil c'usi chc'ot ta pasel ta sventa li Muc'ul Diose; ja' jun senyail chcom o sventa sbatel osil, mu'yuc boch'o xu' tsoques o”, xi li Diose.