Isaías 54 - Bible in Tzotzil de Chenalhó with Deuterocanon

Sbatel osil oy c'uxubinel yu'un li Diose

¹ Cuxetuc no'ox avo'nton, vo'ot ti mu xana' xa'alaje, ti mu'yuc avalabtaque; q'uejinan ta q'ueojetic, avetan no'ox ta xcuxetel avo'nton, vo'ot ti mu'yuc ono'ox ava'yojbe xc'uxul alajele. Yu'un jech yaloj li Muc'ul Diose: “Li boch'o ictabil comele ja' x'ech' to jech yepal ta xbol yalab jech chac c'u cha'al li boch'o lec nupul ts'acal xchi'uc smalale”, xi.

² Muq'uibtaso lec li acarpanae; mu xaxi' ta xlich'anbel li slonaile. Natubtasbo lec li yaq'uiltaque; tsinanbo lec li sbic'tal te'eltaque.

³ Yu'un chlic apuc aba batel ta bats'ic'ob, ta ts'etc'ob. Li avalabtac, li amomtaque ta xu'uninic batel ep yantic banamil; ta xlic nojuc yu'unic li lumetic ti mu'yuc yajval li' ta orae.

⁴ Mu xaxi', mu'yuc bu chayal ta q'uexlal; mu xanamalta aba, mu'yuc boch'o xu' chasna'leot. Ta xlic ch'ayuc ta avo'nton c'u x'elan li q'uexlal laj ava'ay tal ta ach'iebale; mu'yuc xa bu cht'ab o ta avo'nton c'u x'elan laj avich' na'leel ti c'alal laj avich' ictael comele.

⁵ Li amalal c'oteme, ja' li Boch'o la spasote, ja' Muc'ul Dios ech'em svu'el xi sbi. Li Jpojvanej avu'une ja' Ch'ul Dios yu'un Israel, Dios yu'un sbejel banamil xi sbi.

⁶ Ja' jechot jech chac c'u cha'al jun ants ti chich' ictael comele, ti oy ep svocol, ti ep chat yo'ntone. Pero li Dios avu'une isut tal ta atojol, jech chayalbot:

⁷ “Atbil no'ox jayib c'ac'al laj quictaot comel; li' ta orae chaquic'ot yan velta, yu'un toj ep c'uxot ta co'nton.

⁸ Ta scoj ilic sc'ac'al co'nton jliqueluc, jech la jvoc' jba batel ta atojol jayibuc c'ac'al, pero ta sventa slequil co'nton sbatel osil chajc'anot yan velta”, xi li Muc'ul Dios ti ja' Jpojvanej avu'une.

⁹ “Jech chac c'u cha'al laj cal ta jamal ta stojol Noé ti mu'yuc xa ta xcac' yan velta pulel ta vo' ta banamile, ja' jech ta xcal ta jamal ta atojol ec ti mu'yuc xa bu chi'ilin o ta atojole; mu'yuc xa bu chcac'bot avocol yan velta.

¹⁰ Ac'o me tsta yorail chlaj li vitsetique, ac'o me sna' soc li bic'tal vitsetique, pero li c'uxubinel cu'un ta atojole mu xlaj o; li c'usi chapal cu'un ta atojole, mu soc o”, xi li Muc'ul Dios ti ep c'uxot ta yo'ntone.

Tspas ta ach' yan velta li Jerusalene

¹¹ “Vo'ot lum ti toj abul abae, ti mu'yuc boch'o tspatbot avo'ntone, ti xco'laj xchi'uc lalaj ta tsatsal ic'al vo'e, a'yo ava'ay, vu'un ta jnacan lec ta sba lequil ton li tonetic avu'une; chajnacanot lec ta sba zafiro tonetic.

¹² Li q'uelub osiletic avu'une ta puru rubí tonetic ta jpas. Li sti' acoraltonale ta berilo tonetic ta jpas. Scotol li coraltonetique ta puru lequil tonetic ta jpas.

¹³ Vu'un ta jchanubtas jtuc li avalab anich'nabe; lec chbatic, jun yo'nton chcom scotolic.

¹⁴ Ja' at'ujumal chc'ot li c'usitic lec, li c'usitic tuq'ue; ta xnamaj batel ta atojol li uts'intael xchi'uc li xi'ele; mu'yuc xa bu chnopaj o tal ta atojol li tsots xi'ele.

¹⁵ Me oy boch'o chchapan sbaic chtal scontrainicote, mu me xanop ti vu'un jtacben tale; li boch'o chtal stsaquicot ta c'ope tsalbil chcomic avu'un.

¹⁶ “A'yo ava'ay, vu'un laj cac' ayinuc li jtentaq'uinetic ti chjuch'tabeic lec sc'ac'al li ac'ale, ti tspasic ep ta chop abtejebaletique; xchi'uc vu'un laj cac' noxtoc li jsoquesvanejetic sventa tsoquesvanique.

¹⁷ Pero mu'yuc spasojic jchopuc abtejebal ti xu' chayulesot oe. Vo'ot chamacbe yeic li boch'otic tstiq'uic amule. Ja' jech smoton chcac'beic li boch'otic chtunic cu'une; vu'un jtuc chcac' tal li coltael ta stojolique”, xi li Muc'ul Diose.