Isaías 53 - Bible in Tzotzil de Chenalhó with Deuterocanon

¹ ¿Boch'o chch'un li c'usi chcaltic batele? ¿Boch'o ta stojol chac' ta ilel smuc'ul stsatsal li Muc'ul Diose?

² Li Yajtunel Diose ich'i ta stojol Muc'ul Dios jech chac c'u cha'al q'uelum te'; laj yac' lec yibel ta taqui banamil, ma'uc toj c'upil sba, ma'uc toj yan xa o ta q'uelel, ma'uc yu'un xch'ay xa co'ntontic yu'un.

³ Solel na'lebil, bajbil yu'un li cristianoetique, ja' jun vinic ti pixil ta tsots vocole. Solel la snopes sba lec ta xcuchel scotol vocol; solel mu xa stac' q'uelel; bajbil ta j'ech'el, pero mu'yuc sc'oplal laj ca'itic.

⁴ Pero ja' la xcuch scotol li jchameltique; ja' la sts'ic scotol li c'ux vocol chquich'tique. Li vu'utique la jnoptic ti yu'un ch-ac'bat nucul yu'un Diose; la jnoptic ti yu'un ch-ac'bat stoj smule, ti yu'un tsbic'tajesat yu'un Diose.

⁵ Ti jech ep iyayij sbec'tale, vu'utic ta scoj jtoyobbailtic. Ti jech i'ixtolaj sbec'tal ta uts'intaele, vu'utic ta scoj jmultic. Ja' la xcuch li vocole, jech vu'utic jun co'ntontic lijcom; ta sventa ti ja' ep ituch'e, jech vu'utic poxtabil lijcom.

⁶ Yu'un jcotoltic ch'ayemutic ta be jech chac c'u cha'al ch'ayemal chijetic; la jtam batel jbe jtuctic jujunutic, pero li Muc'ul Diose ja' laj yac'be xcuch scotol li jmultique.

⁷ Ep i'uts'intaat, pero la sts'ic scotol, me jbeluc muc xc'opoj. Ic'bil ibat ta milel jech chac c'u cha'al jcot ch'ium chij, pero mu'yuc la spoj sba jbeluc; solel ch'anxi jech chac c'u cha'al jcot chij ti c'alal chich' loc'bel stsotsile.

⁸ La xchuquic, laj yiq'uic batel ta chapanel; mu'yuc boch'o la spoj, mu'yuc boch'o laj yat yo'nton yu'un. La stu'pbeic o sc'oplal ta banamil, ja' ta scoj jmultic ti ep ituch' sbec'tale.

⁹ Co'ol laj yich' muquel jech chac c'u cha'al jpasmuliletic; co'ol imuc jech chac c'u cha'al jc'ulejetic, pero mu'yuc c'usi chopol spasoj; me jutuc mu'yuc x'epalc'opoj.

¹⁰ Li Muc'ul Diose jech la sc'an ti laj yac' ta uts'intaele, ti laj yac'be xcuch scotol vocole. Ta sventa ti ivu' yu'un laj yac' sba ta milbil matanal sventa mulile, jech ta to xil noxtoc c'u to yepal chbol li yu'untaque, ta xnatub lec yorail. Li c'usi chapanbil yu'un Muc'ul Diose, chc'ot ta pasel.

¹¹ Ta to xlic yil c'u yepal tsatin li vocol la sts'ique; toj xcuxet no'ox yo'nton ti c'alal chile. Ta sventa li tuq'uil Yajtunel Diose ep boch'otic mu'yuc smul chc'otic, yu'un la xcuchbe scotol li xchopolilique.

¹² Ja' yu'un li Diose ta xac' ich'atuc lec ta muc' jech chac c'u cha'al li boch'o tspas canal ta pleitoe, ti oy c'usi ep tspojbe li boch'otic tsots svu'elique. Yu'un laj yac' ta milel sbec'tal; laj yich' co'oltsanel jech chac c'u cha'al jpasmuliletic. Jech ep boch'otic la xcuchbe smulic, xchi'uc ja' chc'opoj ta stojol Dios ta sventa li jpasmuliletique.