Isaías 52 - Bible in Tzotzil de Chenalhó with Deuterocanon

Laj yich' albel sc'oplal ti tsta yorail chcolic tal li israeletique

¹ Sión, julovan me, lican me, ich'bo me lec yipal. Jerusalén, lapo lec c'upil sba ac'u', vo'ot li ch'ul lumote, yu'un mu'yuc xa chtal ochuc o yan velta te ta atojol li yanlum cristianoetic ti mu'yuc yich'ojic circunsicione.

² Jerusalén, lican me, lilino xa apucucal, chotlan lec ta achotleb. Yajvaltac Sión, vo'oxuc ti chucbiloxuc tale, loq'ueso xa li yabtejeb vacax chucbil ta anuq'uique.

³ Li Muc'ul Diose jech chal: “Me junuc centavo mu'yuc laj quich' ti c'alal laj avich'ic chonel batele, jech muc ta taq'uinuc chajcoltaoxuc sutel tal noxtoc.

⁴ Ta vo'onee i'ayic ono'ox ta Egipto li jteclum cu'une; te inaquiic jech chac c'u cha'al yanlumetic. Ts'acal to vovil jeche' no'ox laj yich'ic uts'intael batel yu'un asiriaetic noxtoc.

⁵ Li' ta orae oy c'usi yan chquil noxtoc, ja' ti i'ic'atic batel ta Babilonia noxtoc li jteclumale. Solel mu'yuc smelol c'u x'elan ic'bil ibatic. X'avlajetic no'ox ta stoyobbailic li j'uts'intavanejetique; scotol c'ac'al chopol chc'opojic ta jtojol.

⁶ Pero li jteclumale ta sta sc'ac'alil ta xlic yotquinicun lec, chlic sna'ic ti ta melel vu'un la jc'opanique, ti vu'un jech laj cal ta stojolique: ‘Li' oyun ta atojolique’, ti xcutique”, xi li Muc'ul Diose.

⁷ Toj c'upil no'ox sba yacan chanovic batel ta vitsetic li boch'otic yich'ojic batel lequil a'yeje, ti chalic oy jun o'ntonale, ti chalic c'usi ja' sventa jlequilaltique, ti chalic oy xa coltaele, xchi'uc ti jech chalbeic li Sione: “Li Dios avu'une, ja' mero muc'ul Ajvalil”, ti xutique.

⁸ Li jq'uel-osiletic avu'un ta toyole, tsots ta x'avan scotolic, yu'un toj xcuxet no'ox yo'ntonic, yu'un ta xil lec ta sat stuquic ti ta sut tal yan velta ta Sión li Muc'ul Diose.

⁹ Jerusalén, vo'ot ti jinesbilote, avanan; cuxetuc no'ox avo'nton ec. Yu'un li Muc'ul Diose chac'be spatubil yo'nton li steclumale; tscoltaot xa loq'uel ta uts'intael vo'ot li lum Jerusalenote.

¹⁰ Chac' ta ilel svu'el stsatsal ta jujun banamil; scotol cristianoetic c'alal to ta jujujot sti' banamil tsq'uelic c'u x'elan tscoltautic li Dios cu'untique.

¹¹ ¡Voc'o abaic loq'uel, voc'o abaic loq'uel; mu me xapiquic li c'usi toj chopole; loc'anic xa batel te ta Babilonia! Ac'o me sq'uel stuc'ulan sbaic lec li boch'otic chich'ic batel c'usitic chtun yu'un Muc'ul Dios te ta ch'ulnae.

¹² Yu'un mu persauc toj anil chaloq'uic; mu persauc ta jatubal chaloq'uic, yu'un li Muc'ul Dios, ja' li Dios yu'un Israele, ja' ba'yucbe chbat avu'unic, ja' stuc chaxchabioxuc batel ta apatic.

Sc'oplal svocol yajtunel Muc'ul Dios

¹³ Li cajtunele lec chbat yu'un scotol; ich'bil ta muc', lec muc' sc'oplal chc'ot.

¹⁴ Jech chac c'u cha'al ep boch'o ich'ay yo'ntonic yu'un c'alal laj yilic ti solel mu xa ja'uque, ti mu xa sat cristianouc yilel li sate,

¹⁵ ja' no'ox jech ep lumetic chch'ay yo'ntonic yu'un; ep ajvaliletic chmac yeic noxtoc ti c'alal chilic, c'alal cha'yic li c'usi mu'yuc ono'ox bu jech xilic, ti mu'yuc ono'ox bu jech xa'yic oe.