Isaías 51 - Bible in Tzotzil de Chenalhó with Deuterocanon

Spatbel yo'nton lum Jerusalén

¹ Li Muc'ul Diose jech chal: “A'yo ava'yic, vo'oxuc ti oy ta avo'ntonic c'usi tuq'ue, ti oy ta avo'nton chasa'icune. Q'uelavilic li muc'ta ton ti bu laloq'uic tale; q'uelavilic li ch'ut ch'en ti bu laj avich'ic totsel loq'uel tale,

² ja' li Abrahame yu'un ja' atotic; li Sarae ja' ame'ic, yu'un ja' la sbolesoxuc. C'alal laj quiq'ue, stuc no'ox, pero laj cac'be ep bendición, laj jbolesbe ep smomnich'nab.

³ Toj ep slequil co'nton ta stojol li Sione; ta jlecubtas ta ach', ac'o me solel jinesbil comel scotol. Ta jc'atajes ta yaxal osil li taqui-xocol banamile; ta jco'oltsan jech chac c'u cha'al ts'unubaltic cu'un to'ox te ta Edén. Jech chlic staic xcuxetel yo'ntonic, chlic pasuc ta jun yo'ntonic; chlic yalic jlequilal, chlic sq'uejintaic q'ueojetic.

⁴ “Jteclumal, tuc'ulanic lec c'usi ta xcal: Ta jpuc batel ta buyuc no'ox li chanubtasel cu'une; li jmantaltaque ta xac' sacubuc osil ta stojol li jujun lume.

⁵ Nopajem xa tal yorail li chapanel cu'une; ta xa xtal li coltael cu'une. Ta jvu'el ta jtsatsal chlic jchapan li lumetique; li banamil cacajtic ta nabe te xa smalaojicun ec, ja' spatoj yo'ntonic yu'un li jvu'el jtsatsale.

⁶ Q'uelavilic muyel li vinajele; q'uelo avilic noxtoc li banamile. Li vinajele ta sacch'ay batel jech chac c'u cha'al ch'ayil; li banamile ta xpocoib jech chac c'u cha'al c'u'il; li jnaclumetic ta banamile ta xchamic jech chac c'u cha'al bic'tal usetic. Pero li coltael cu'une mu sna' xlaj o sbatel osil; li tuq'uil chapanel cu'une mu'yuc slajeb.

⁷ “A'yo ava'yic, vo'oxuc ti xana'ic c'usi tuq'ue, vo'oxuc li jun lumoxuc ti oy ta avo'ntonic jmantaltaque. Mu me xaxi'ic li chopolc'optael yu'un cristianoetique; mu me xchibaj avo'ntonic yu'un li na'leel chaq'uique.

⁸ Yu'un le'e ta xlaj sc'oplalic o jech chac c'u cha'al c'u'il ti chlaj ta c'uxel ta chile, jech chac c'u cha'al xaquitail ti chc'a' ta xcuxe. Pero li tuq'uil chapanel cu'une te oy o sbatel osil; li coltael cu'une mu'yuc slajeb o”, xi li Muc'ul Diose.

⁹ Muc'ul Dios, julovan me, lican me achi'uc li atsatsal avu'ele; paso jech chac c'u cha'al laj apas ta vo'onee. Yu'un vo'ot ono'ox laj alilin li Rahabe; vo'ot ono'ox laj amil li dragón ta vo'onee.

¹⁰ Vo'ot ono'ox laj ataquijes li nabe; vo'ot laj avules li natil nabe; vo'ot laj ajam lec be ta o'lol li natil nabe, yu'un jech ijelovic tal li boch'otic laj apoj tale.

¹¹ Ja' jech ac'o suticuc tal ec li boch'otic chapoj tale; aveticuc no'ox ta q'ueoj ti c'alal ch-ochic batel ta Sione. Ac'o vinajuc ta satic ti solel xcuxet yo'ntonique, j'ech'el cuxetuc o yo'ntonic; ac'o ch'ayuc o batel li oq'uel, li vocol te to'ox oye.

¹² “Vu'un jtuc ta xcac'bot stsatsal avo'nton. Jech ¿c'u yu'un chaxi' yu'un li cristianoetic ti sna' xchamique, ti ja' jechic jech chac c'u cha'al ts'i'laletique?

¹³ ¿Me chch'ay ta avo'nton li Muc'ul Dios, ja' li boch'o la spasote, ti ja' la xlich'an batel li vinajele, ti ja' la snacan lec li banamile? ¿C'u yu'un ja' chanic ta xi'el yu'un scotol c'ac'al li j'uts'intavanejetic ti toj tsots xu' yu'unique, ti chapalic xa sventa chasmilicote? ¿C'usi xu' yu'unic li j'uts'intavanejetique?

¹⁴ Li jchuquel ti ep chich' vocole po'ot xa chcol loq'uel. Muc teuc chcham o ta chuquinab; muc teuc chcham o ta vi'nal noxtoc.

¹⁵ “Vu'un Muc'ul Diosun avu'un; Muc'ul Dios ech'em stsatsal, xi li jbie. Vu'un la jyuc' li nabe; laj cac' vo'etuc li yip ti xyuc'lajet no'oxe.

¹⁶ Vu'un la jlich'an batel li vinajele; vu'un la jnacan lec li banamile. Vu'un laj cac'bot ta ave noxtoc li jc'ope; vu'un la jchabiot, la jventainot lec. Vu'un noxtoc ti jech laj calbe li Sione: ‘Vo'ot jlumalot’, xcut”, xi li Muc'ul Diose.

¹⁷ Jerusalén, julovan me, lican me. Vo'ot ti laj xa ava'ibe xc'uxul scotol li sc'ac'al yo'nton Muc'ul Diose, ti jeche' xatamlajet lacom yu'un jech chac c'u cha'al li boch'o tsyalbun ta uch'el scotol li pasem ya'lel ts'usube ti chyacub o xchi'uque, yu'un laj avuch' scotol; solel taquin icom avu'un li yavile.

¹⁸ Scotol ti c'u yepal anich'nabe mu'yuc boch'o la stojobtasot; ti c'u yepal ich'i avu'une me junuc mu'yuc boch'o la snitot yu'unic.

¹⁹ Li cha'chop vocol ital ta atojole, ja' ti laj avich' jinesele, ti laj avich' elc'anbel batel scotol c'usi oy avu'une, xchi'uc ti icham ta vi'nal, icham ta pleito li avinictaque, ¿me oy boch'o abul aba chil? ¿Me oy boch'o tspatbot avo'nton?

²⁰ Li anich'nabe i'alub scotol, mochajtic no'ox ta chiquin xoraltic jech chac c'u cha'al te'tical chij ti te no'ox yacal chc'ot ta syacubile. Lajem icomic ta stojol mulil yu'un li Muc'ul Diose; ep svocolic ta sventa sc'ac'al yo'nton li Dios avu'une.

²¹ Vo'ot lum, ti ep avocole, ti muc ta scojuc pasem ya'lel ts'usub yacubenot lacome, a'yo ava'ay li c'usi chacalbot li'i.

²² Jech chal li Muc'ul Dios, ja' li Avajvale, ja' li Dios avu'un ti sva'anoj sba ta scoltael li steclumale: “Ta jloq'uesbot batel ta atojol li bis ti solel yacubenot o yu'une; mu'yuc xa chavuch' o yan velta li sbel bise, ja' li sc'ac'al co'ntone.

²³ Ja' xa ta xcac'be yuch'ic li boch'o laj yac'bicot avocole, ja' li boch'o jech laj yalbicote: ‘Mochlan ta banamil, te chijelovcutic ta sba avac'ol’, ti xayuticote. Ja' yu'un li vo'ote laj amochan abec'tal ta banamil sventa chastec'oxuc; ja' sbeic ic'ot ya'yel li abec'tale yu'un te ijelovic ta sba avac'ol”, xi li Muc'ul Diose.