Isaías 50 - Bible in Tzotzil de Chenalhó with Deuterocanon

¹ Li Muc'ul Diose jech chal: “¿Bu oy svunal ti j'ech'el laj quicta o li ame'ique, ja' li Israele? ¿Me yu'un ta scoj oy ep quil ti la jchonoxuc batele? Ta scoj achopolil atuquic ti laj avich'ic chonel batele; ta scoj atoyobbailic ti laj quicta li ame'ique.

² ¿C'u yu'un ti mu junuc boch'o la jta ti c'alal litale? ¿C'u yu'un ti mu'yuc boch'o itac'ov ti c'alal li'ic'vane? ¿Me yu'un chanopic ti mu xu' cu'un chajcoltaoxuque? ¿Me yu'un chanopic ti mu xu' cu'un chajpojoxuc sutel tale? Li vu'une ta jbel no'ox jc'op xu' ta jtaquijes li nabe; xu' ta jc'atajes ta taqui banamil li uc'umetique. Jech te chc'a'ic o li choyetique; te chchamic o ta taqui-o'nal ta scoj ti mu'yuc ya'lele.

³ Xu' cu'un ta xquic'ubtas li vinajele jech chac c'u cha'al li boch'o tslap ic'al c'u'il sventa me'nale”, xi.

⁴ Li Muc'ul Diose la sbijubtasun lec, yu'un jech ta jna' c'u x'elan ta jc'opan li boch'otic lubenique. Ta jujun sob chilic, ta xca'ay lec li bijubtasele; ch'anxichi ta jtuc'ulan lec.

⁵ Li Muc'ul Dios, ja' li Cajvale, la sjambun lec jchiquin, jech ec li vu'une mu'yuc bu la jtacchiquinta li c'usi laj yalbune; mu'yuc bu la jva'lupatin comel.

⁶ Solel la jq'uelan o ta nucul li jpate; laj cac'beic o xocon jsat li boch'otic tsbulic isimile. Mu'yuc bu la jnac' jsat ta stojol li boch'otic la sna'leicun xchi'uc li boch'otic la stubtaicune.

⁷ Yu'un ja' chiscoltaun li Muc'ul Diose, ja' li Cajvale, jech mu'yuc c'usi chal co'nton yu'un. Ja' yu'un lec tsots laj cac' jba jech chac c'u cha'al jbej ton, yu'un jna'oj ti mu xiyal ta q'uexlale.

⁸ Li' oy ta jc'al li Jc'opojel cu'une. ¿Me oy boch'o tsc'an chiscontrainicune? Batic, bat jva'an jbatic ta stojol jchapanvanej. ¿Me oy boch'o tsc'an chistic'bicun jmule? La' albicun lec ta jsat.

⁹ A'yo ava'yic, ja' no'ox chiscoltaun li Muc'ul Diose, ja' li Cajvale, ja' yu'un ¿boch'o xu' yu'un chistic'bun jmul? Li cajcontrataque ta xlajic jech chac c'u cha'al c'u'il ti chlaj ta c'uxel ta chile.

¹⁰ ¿Me oy boch'o avu'unic ti tsc'an chich' ta muc' li Muc'ul Diose, xchi'uc ti tsc'an cha'ibe sc'op li Yajtunele? Li boch'o chanov to ta ic' osile, ti mu'yuc to chtal ta sac osile, ac'o yac' sba ta sc'ob li Muc'ul Diose; ja' ac'o sc'an coltael ta stojol li Dios yu'une.

¹¹ A'yo ava'yic, vo'oxuc ti chatsanic c'oc' avalojique, ti chavac'beic lec stajale; batanic ta atsanbil c'oc' atuquic, xchi'uc ta atsanbil toj atuquic. “Ja' jech chajpasboxuc ta jc'ob jtuc; mochol chac'otic ta tsatsal vocol”, xi li Diose.