Isaías 5 - Bible in Tzotzil de Chenalhó with Deuterocanon

Lo'il c'op ta sventa ts'usubtic

¹ Ta jq'uejinta jun q'ueoj ta sventa li boch'o lec jc'anoje; li q'ueoj ta jq'uejintae ja' sq'ueojal ts'usubtic yu'un. Li boch'o lec jc'anoje oy sts'unoj sts'usub ta yaxal osil.

² La sloc lec li banamile, la stsobbe lec stanal, ja' la sts'un bats'i lequil ts'usub; la spas lec toyol q'uelub osil te ta o'lol ts'usubaltic, xchi'uc la smeltsanbe lec yavil spits'ubil ya'lel. Jun yo'nton la smala chac' chi'il ts'usub, pero toj pojic laj yac' li sate.

³ Jnaclumetic ta Jerusalén, jnaclumetic ta Judá, nopic ca'tic boch'o smul, me vu'un, o me ja' li ts'usubtic cu'une.

⁴ ¿Me oy to c'usi yan lec tsc'an ta jpas xana'ic ta ts'usubtic cu'une? ¿Me oy c'usi mu'yuc lec la jpas chava'yic li vu'une? Li vu'une la jmala ti ac'o yac' chi'ic sate, pero ¿c'u yu'un ti puru pojic isatine?

⁵ Lec oy, chacalboxuc ava'yic c'usi ta jpasbe li ts'usubtic cu'une: ta jloq'uesbe li scoralile yu'un jech ac'o yich' ulesel; ta jvuq'uesbe li scoraltonale yu'un ac'o tal yich' pech'ilanel ta teq'uel.

⁶ J'ech'el ta xquicta o comel. Mu'yuc xa bu ta jq'uel ta jtuc'ulan; mu'yuc xa bu ta xcaq'uinta o; te ac'o nojuc ta ch'ixtic, ac'o ch'iuc chopol ts'i'laletic. Ta xcalbe mantal ti mu xa me xac' ya'lelic li toquetique.

⁷ Li ts'usubtic yu'un Muc'ul Dios ti ech'em svu'ele, ja' li smomnich'nab Israele; ja' li jnaclumetic ta Judae, yu'un ja' la sts'un stuc, toj lec sc'anoj. La smala ti ac'o ch'unbatuc smantaltaque, pero puru milvanej no'ox la spasic; la smala ti ac'o spasic c'usi tuq'ue, pero puru oq'uel avanel no'ox ivinaj ta scojic.

Ta ono'ox xich' svocol li boch'o chopolique

⁸ Toj abul abaic, vo'oxuc ti chamanilan ep anaique, ti chac'an chavu'uninic, ti chac'an chamac atuquic scotol li banamile. ¿Me yu'un vo'oxuc xa no'ox atuquic chanaquiic li' ta banamil?

⁹ Li Muc'ul Dios ti ech'em svu'ele jech xa laj yalbun: “Li lequil naetique xch'ijan chcom o; li muc'tic na ti toj c'upilic sbae solel mu'yuc yajval chcom o.

¹⁰ Ta oxib anmul yav ts'usubtique ja' no'ox chloc' jbej unin biq'uit baril ya'lel. Li lajuneb coxtal trigo chich' ts'unele ja' no'ox chloc' jun coxtal sbec'”, xiyutun.

¹¹ Toj abul abaic vo'oxuc ti sob chaliquic batel ta yacubele, ti te ch-ic'ub o avu'unic, ja' to ti c'alal chch'ay avo'ntonic o yu'un li poxe.

¹² Xnic no'ox son, arpa, muc'tic arpa, vob, amaetic, xchi'uc ep pasem ya'lel ts'usub avu'unic te ta aq'uinic. Ja' mu xavac' asatic ta sq'uelel c'usi tspas li Muc'ul Diose; mu xatuc'ulanic c'u x'elan li yabtele.

¹³ Ta sventa ti mu xa'ibeic smelol li jteclumale, jech ch-ic'atic batel ta yan banamil. Scotol li jteclumal xchi'uc li banquilaletic yu'unique te chchamic ta vi'nal xchi'uc ta taqui o'ntonal.

¹⁴ Ja' yu'un li yavil animaetique la smuq'uibtas lec li yute; muc bisbiluc xa no'ox la xjach' li yee. Ja' te ch-ochic yalel xchi'uc li banquilaletic yu'unique, xchi'uc li boch'otic puru yacubel tspasique, xchi'uc li c'usitic xcuxet no'ox yo'ntonic yu'une.

¹⁵ Li viniquetique persa biq'uit chcomic; li jtoybaetique persa tsbic'tajes sbaic.

¹⁶ Yan li Muc'ul Dios ti ech'em svu'ele chac' ta ilel smuc'ul stsatsal ti c'alal chac'be stojol mulile; li Ch'ul Diose chac' ta ilel stuq'uil yo'nton ti c'alal chchapanvane.

¹⁷ Li muc'tic lume ta xich' jinesel; li yav lumetique ja' xa sve'ub chijetic xchi'uc tentsunetic chc'ot.

¹⁸ Toj abul abaic vo'oxuc ti achucoj abaic ta spasel c'usi chopol ta sventa epalc'ope, ti atsinojbeic yipal spasel mulil jech chac c'u cha'al vacax ti c'alal chjoch caretae.

¹⁹ Jech chavalic: “Ac'o tal spas ta ora yabtel li Diose, yu'un jech ac'o quiltic; ac'o yac' c'otuc ta ora c'usi snopoj li Ch'ul Dios yu'un Israele, yu'un jech ac'o cotquintic”, xachiic.

²⁰ Toj abul abaic, vo'oxuc ti chacuyic ta lec li c'usi chopole, ti chavalic ja' chopol li c'usi leque, ti chac'an chac'atajesic ta sac osil li ic' osile, ti chac'an chac'atajesic ta ic' osil li sac osile, ti chac'an chac'atajesic ta poj li c'usi chi'e, ti chac'an chac'atajesic ta chi' li c'usi poje.

²¹ Toj abul abaic, vo'oxuc ti bijoxuc chacuy abaique, ti lec xana' acuyoj abaique.

²² Toj abul abaic, vo'oxuc ti lec xu' avu'unic uch' poxe, xchi'uc vo'oxuc ti mu'yuc boch'o xastsaloxuc ta scapel poxe,

²³ xchi'uc vo'oxuc ti ta sventa taq'uin chavalic mu'yuc smul li boch'o oy smule, ti mu xa xavaq'uic spoj sba jutuc ec li boch'o mu'yuc smule.

²⁴ A'yo ava'yic, jech chac c'u cha'al chc'ac' ta c'oc' c'ajbene, jech chac c'u cha'al ta yat c'oc' no'ox chlaj li jobele, ja' jech chalajic ec li vo'oxuque; ja' jech cha'ulic jech chac c'u cha'al te' ti chc'a' batel c'alal ta yibele, ti tspas ta pucuc li xniche, yu'un laj abajbeic smantal li Muc'ul Dios ti ech'em svu'ele; chopol laj avilbeic tojobtasel yu'un li Ch'ul Dios yu'un Israele.

²⁵ Ja' yu'un li Muc'ul Diose ilic sc'ac'al yo'nton ta stojol li steclumale; la stoy sc'ob ta stojolic sventa chac'be stoj smulic. Inic li vitsetique; li sbec'talique te icoman ta xoraltic jech chac c'u cha'al c'a'ep, pero li Muc'ul Diose muc ono'ox x'ech' o li sc'ac'al yo'ntone; te to stoyoj o li sc'obe.

²⁶ Li Muc'ul Diose ta stoy sbandera ta stojol yantic banamiletic; ta spiubta tal scotol cristianoetic ta jujujot sti' banamil, jech ta ora chtalic, solel yich'ojbeic yipal tal.

²⁷ Mu'yuc boch'o chlub yu'unic; mu'yuc boch'o tsbosi yacan; mu'yuc boch'o chtal no'ox svayel yu'unic; mu'yuc boch'o ti mu'yuc lec xchucoj tal xch'ute; mu'yuc boch'o chtuch' yaq'uil xonob yu'unic.

²⁸ Lec ts'ubajtic sni' li flecha yu'unique; lec xa cotajtic li st'ilesubil sflechaique. Li svoy sca'ique lec tsotsic jech chac c'u cha'al ton; c'alal chjoyij li yacan scaretaique, ja' jech chac c'u cha'al sutub ic'.

²⁹ C'alal ch-avanique, xco'laj xchi'uc x'avan león ti c'alal tstsac sve'ele, ti c'alal xc'uxet no'ox ye yu'un simaronile, ti lec tsots tstsac li sve'ele, ti mu'yuc boch'o xu' chpojbate.

³⁰ C'alal tsta sc'ac'alil chtal li yantic banamile, x'avetic no'ox tal ta scontrainel lum Israel jech chac c'u cha'al c'alal xvo'et no'ox muc'ta nabe. Me oy boch'o tsq'uel li banamile, chvinaj ti ch-ic'ube, xchi'uc chvinaj ti ch-ic'ub ta pimil toc li vinajele.