Isaías 49 - Bible in Tzotzil de Chenalhó with Deuterocanon

Li yajtunel Muc'ul Diose ja' luz chc'ot ta jujun banamil

¹ Lumetic ta ti'ti' nab, a'yic c'usi ta xcal; namal banamiletic, a'yo ava'yic ca'yej: Li Muc'ul Diose laj yic'un ti c'alal mu'yuc to'ox chivoq'ue; la sloq'uesbun jbi ti c'alal te to'ox oyun ta yut xch'ut jme'e.

² Li quee la sc'atajesbun jech chac c'u cha'al espada ti lec juxbil yee; la smacun lec ta xyaxinal sc'ob; la sc'atajesun jech chac c'u cha'al flecha ti lec ts'ubts'ub sni'e; la snac'un lec ta scajonal yabtejeb.

³ Jech laj yalbun: “Israel, vo'ot cajtunelot, vo'ot ta aventa chcac' ta ilel jlequilal cutsilal”, xiyutun.

⁴ Vu'une jech la jnop: “Altic laj cac' jvocol; altic la jlajes jtsatsal, mu'yuc stu ic'ot li cabtele”, xichi. Pero ta melel oy ta sc'ob scotol li Muc'ul Diose; li jtojole te oy ta sc'ob li Dios cu'une.

⁵ Li Muc'ul Diose ja' la xchapanun tal ta yut xch'ut jme' yu'un chitun yu'un, yu'un jech vu'un ta jventa xu' chlic yic' sutel tal li Jacobe; xu' chlic stsob tal ta stojol yan velta li Israele. Li Muc'ul Diose toj ep laj yich'un ta muc'; ja' jtsatsal ic'ot li Dios cu'une.

⁶ Jech chal: “Mu xu' o ti ja' no'ox chacom ta cajtunel sventa ta jtsob tal yan velta sts'unubal li Jacobe, sventa ta jliques yan velta ti c'u to yepal comenic sts'unubal li Israele. Ja' yu'un ta xcac' noxtoc ti vo'ot luz chac'ot ta yantic banamile, yu'un vo'ot chavich' batel c'alal to ta sti'iltac banamil li coltaele”, xiyutun.

⁷ Li Muc'ul Diose, ja' li Jpojvaneje; ja' li Ch'ul Dios yu'un Israele, jech chalbe li steclumal ti solel na'lebilic oe, ti bajbilic o yu'un li yantic lumetique, ti mozoinbilic yu'un li j'uts'intavanejetique: “C'alal chayiloxuc li muc'tic ajvaliletique, tsva'an sbaic; c'alal chayiloxuc li banquilaletique, tsquejan tspatan sbaic ta atojolic. Ja' sventa chi'ich'at ta muc', vu'un li Muc'ul Diosun ti mu jna' jel jc'ope; vu'un li Ch'ul Diosun yu'un Israel ti la jt'ujoxuque”, xi.

Ta xich' cha'va'anel yan velta li Jerusalene

⁸ Li Muc'ul Diose jech chal: “C'alal ja' xa yorail chac'uxubaj ta co'ntone, chca'ibot li ac'ope; c'alal ja' xa sc'ac'alil chacole, ta jcoltaot. Vu'un la jchabiot, vu'un la jt'ujot sventa chc'ot ta pasel li c'usi jchapanoj ono'ox jchi'uc li jteclum cu'une, yu'un jech xu' chlic yich' cha'lecubtasel li yosilalique, jech chlic ochuc ta sc'obic yan velta li banamil ti soquesbil xae.

⁹ Yu'un jech xu' chlic avalbe li boch'otic chuculique: ‘Colanic xa’, xu' xavut, xchi'uc jech chavalbe li boch'otic oyic ta ic' osile: ‘La'ic ta sac osil’, xavut. Ta scotol bebetic ta staic tal lec sve'elic; ta buyuc no'ox vitsal ta xocol banamil tstabeic tal lec sve'el li sts'unub yovolique.

¹⁰ Mu'yuc cha'yic vi'nal, me ja'uc taqui o'nal; mu'yuc ch-uts'intaatic yu'un li c'ac'ale xchi'uc li xc'uxul c'ac'ale, yu'un c'uxic ta co'nton. Vu'un ta jtojobtasic tal ta be; vu'un ta xquiq'uic batel ta lequil nio'etic.

¹¹ Vu'un ta jch'acbe tal sbeic ta toyolal te'etic; ta jambeic tal lec sbeic ta bic'tal beetic”, xi li Muc'ul Diose.

¹² Q'uelavilic, le' xa xtalic ta nome; oy le' xtalic ta stuq'uil norte; oy le' xtalic ta smaleb c'ac'al; oy le' xtalic ta yosilal Sinim.

¹³ Vinajel, q'uejintabo slequilal li Diose; banamil, cuxetuc no'ox avo'nton; vitsetic, avananic ta tse'ej. Yu'un li Muc'ul Diose laj xa smuq'uibtasbe yo'nton li steclumale; laj xa xc'uxubin li boch'o abul sbaic ta uts'intaele.

¹⁴ “Li Sione jech to'ox laj yal: ‘Li Muc'ul Diose la scomtsanun; li Cajvale la ch'ayun ta yo'nton’, xi.

¹⁵ Pero li jun antse ¿me xu' chicta comel li mero yole? ¿Me xu' chch'ay o ta yo'nton ti c'alal ja' mero xch'ich'al sbec'tale? Ac'o me oy jech chc'ot ta pasel, pero li vu'une mu'yuc bu jch'ayojot o ta co'nton.

¹⁶ Q'uelavil, li' loc'tabilot o ta yut jc'ob; li' oy o ta co'nton li coraltonetic avu'une.

¹⁷ Li boch'otic ta xcha'va'anicote yac'ojbeic yipal tal ta anil; yan li boch'otic la sjinesicot, la soquesicote iloq'uic xa batel.

¹⁸ Toyo avil asat ta jujujot; le' xa xtalic li boch'otic tsutic tal ta atojole. “Vu'un li Muc'ul Diosun ti cuxulun oe, jech chcal ta jamal ta jbi jtuc: Scotol le'e ja' jech chc'otic ta atojol jech chac c'u cha'al ac'u' apoc' ti toj c'upilic sbae, jech chac c'u cha'al sc'u' spoc' jun tseb ti c'alal chnupine.

¹⁹ Li avosilale jinesbil, yavnaijesbil, soquesbil to'ox, pero tana mu x'och o li boch'otic te chvul naquiicuque. Li boch'otic la soquesic comel scotole iloq'uic xa batel.

²⁰ Li anich'nab ti ivoq'uic ta yan banamile jech chlic yalbicot lec ta achiquin: ‘Toj biq'uit li banamile, mu xi'ochcutic o; ac'buncutic yan osil bu xu' chinaquicutic’, xayutoxuc.

²¹ Li vo'ote jech chlic anop: ‘¿Boch'o xnich'nab scotol le'e? yu'un li vu'une mu'yuc ono'ox jnich'nab; chucbilun batel ta yan banamil, jtuc bu oyun batel. ¿Boch'o la sts'ites scotol le'e? yu'un vo'one ictabilun. ¿Bu to'ox oyic scotolic le'e?’, xachi”, xi li Muc'ul Diose.

²² Li Muc'ul Diose jech yaloj: “Vu'un ta jpas ta mantal li jujun banamile; ta xcac'be jun senyail ta stojol li jujun lume. Yu'un jech xu' ta spetboxuc tal li anich'nabe; jech xu' ta scajan tal ta snecubic li atsebetique.

²³ Li ajvaliletic yu'unique xco'laj xchi'uc atotic chc'ot; li stsebetic ajvaliletique ja' jts'itesej olol chc'ot avu'unic. Chlic squejan spatan sbaic ta atojol; chlic sts'uts'ic avacan. Jech chlic avotquin o ti vu'un Diosun ta melele, yu'un mu'yuc lo'labil li boch'otic chch'unic ti vu'un ta jcoltaique”, xi li Muc'ul Diose.

²⁴ ¿Me xu' to chich' pojbel c'usi la spoj batel ta pleito li simaron soldadoe? ¿Me xu' to chcol tal yu'un li xchucbil vinique?

²⁵ Li Muc'ul Diose jech chal: “Li boch'o chucbil batel yu'un tsatsal vinique xu' to chich' pojbel; li c'usi tspoj tal ta pleito li boch'o tspas canale xu' to chich' pojbel sutel. Yu'un vu'un jtuc ta jtsal li boch'o chastsacot ta pleitoe; vu'un jtuc ta jcoltabot tal li anich'nabe.

²⁶ Ta xcac' ac'o lic sti' sbec'tal stuquic li boch'o chayuts'intaoxuque; ta xcac' ac'o yuch'ic li xch'ich'alique. Ac'o yacubicuc xchi'uquic jech chac c'u cha'al pasem ya'lel ts'usub. Yu'un jech ac'o yotquinic scotol cristianoetic ti vu'un Muc'ul Diosune, ti vu'un Jcoltavanejun avu'une, ti vu'un Jpojvanejun avu'un, vu'un li stsatsalun Jacobe”, xi li Diose.