Isaías 48 - Bible in Tzotzil de Chenalhó with Deuterocanon

Dios yaloj ti tscolta li steclumale

¹ “Yalab xnich'nab Jacob, a'yo ava'yic, vo'oxuc ti abiinojic Israele, vo'oxuc li sts'unubaloxuc Judae, vo'oxuc ti oy c'usi chavalic ta jamal ta sbi Muc'ul Diose, ti chana'ilanic to li Dios yu'un Israele, ac'o me mu jechuc smelol, me mu jechuc stuq'uil li c'usi chapasique.

² Chavalic to ti ja' alumalic li ch'ul lume, chavalic ti ja' no'ox ach'unojic li Dios yu'un Israele, ja' li Muc'ul Dios ech'em svu'el, xi sbie.

³ Ta sliquebal ono'ox laj calboxuc tal li c'usitic ic'ot xa ta pasel li'i; vu'un jtuc laj cac' avilic, vu'un jtuc la jpas, ta melel ic'ot ta pasel.

⁴ Jna'oj ono'ox ti toj toybaoxuque, ti xco'laj xchi'uc tsatsal taq'uin li avo'ntonique, ti xco'laj xchi'uc bronce taq'uin li ajolique.

⁵ Ja' yu'un vo'one ono'ox ba'yuc laj calboxuc; mu'yuc to'ox chc'ot ta pasel ti c'alal lic calboxuc tale. Yu'un mu jc'an jech chlic avalic: ‘Ja' la spas li sloc'obal jdiostique, ja' yabtel li c'usi la jpastic ta unijesbil taq'uine’, mu jc'an xachiic.

⁶ Scotol le'e ava'yojic ono'ox tal cu'un ti jech chc'ot ta pasele; vo'oxuc atuquic tsc'an chavalic ti ja' melele. Ja' yu'un li' ta orae ach' li c'usi chacalboxuque; ja' chacalboxuc li c'usi mu'yuc ava'yojique.

⁷ Ja' to chlic o, muc vo'oneuc xa sliquel. Mu'yuc bu ava'yojbeic o tal sc'oplal ta vo'one, yu'un jech mu xu' chavalic ti ana'ojic xa ono'oxe.

⁸ Li c'usi chacalboxuque mu'yuc ava'yojbeic o sc'oplal; mu xana'ic o, yu'un jna'oj ono'ox ti mu xac'an xava'yique. Jna'oj ono'ox ti mu xach'unique, ja' yu'un jbajmantal ono'ox abiic cu'un ti c'alal lic voc'anique.

⁹ Ta sventa ti muc jc'an jsoques jc'oplale ja' yu'un la jts'ic li sc'ac'al co'ntone. Ta sventa ti lec ac'o batuc jc'oplale ja' yu'un la jpajes jba, muc xaculesoxuc.

¹⁰ A'yo ava'yic, laj xa cac'oxuc ta lecubtasel, pero mu ja'uc jech chac c'u cha'al tslecubtasic saquil taq'uin; li vu'une xco'laj xchi'uc la jpasboxuc preva ta horno ta sventa tsots vocol.

¹¹ Ti jech la jpase ja' ta sventa quich'el ta muc', yu'un mu xu' ti tsoc o batel jc'oplale; mu xcac' ta yan li ich'el ta muc' cu'une.

¹² “Israeletic, vo'oxuc li smomnich'naboxuc Jacob ti t'ujbil cu'une, a'yic c'usi ta xcal: Vu'un no'ox jtuc Diosun; vu'un sliquebun, vu'un slajebun.

¹³ Ta jc'ob jtuc la jnacan li banamile; ta jc'ob jtuc la jlich'an li vinajele. C'alal laj calbe sbiique, ta ora lic ayinuc.

¹⁴ Tsobo abaic tal acotolic, a'yo ava'yic: ¿Me oy boch'o yaloj ono'ox avu'unic ti ja' tspas c'usi jnopoj ta stojol Babilonia li vinic jt'ujoje, ti ja' chac' sc'ob ta stojol li caldeaetique?

¹⁵ Vu'un jtuc laj cal, vu'un laj quic' li vinique, ja' yu'un buyuc no'ox chbat, lec chbat yu'un scotol.

¹⁶ Nopajanic tal ta jtojol, a'yo ava'yic: Ta sliquebal ono'ox muc ta muculuc c'usi laj cal; c'alal ic'ot ta pasele, te oyun noxtoc. Ja' yu'un vu'un ta jtac ta jvu'el stsatsal, vu'un li Muc'ul Diosun ti Yajvalun scotole”, xi li Diose.

¹⁷ Li Muc'ul Dios, ja' li Jpojvanej avu'une, ja' li Ch'ul Dios yu'un Israele, jech chal: “Vu'un li Muc'ul Diosun avu'une, vu'un ta jchanubtasot c'usi lec ta pasel ta sventa alequilal; vu'un ta jtojobtasot bu beal tsc'an chatam batel.

¹⁸ Toj lec ti lajuc ach'un li c'usitic laj calbote, yantic i'epaj batel alequilal jech chac c'u cha'al nojelal uc'um ti jechuque; mu'yuc spajeb chata c'usi lec jech chac c'u cha'al nab ti mu xpaj ta yuc'lajetele.

¹⁹ Jech i'epaj batel amomnich'nab jech chac c'u cha'al yi'tic; ep iloc' aq'uelum jech chac c'u cha'al epal yi' ta nab ti jechuque. Mu'yuc bu ta jc'an ta jtu'p abi; mu'yuc ta jc'an chajloq'uesot ta jtojol ti jechuque”, xi li Diose.

²⁰ Loc'anic xa batel ta Babilonia; jatovanic loq'uel ta stojol li caldeaetique. Cuxetuc no'ox avo'ntonic; avananic no'ox ta yalel li c'usi toj lec ic'ot ta atojolique. Alic batel c'alal to ta jujujot sti' banamil, jech xavalic: “Li Muc'ul Diose la spoj loq'uel li yajtunele, ja' li Jacobe”, chianic.

²¹ C'alal laj quic'oxuc batel ta xocol banamile, mu'yuc bu xava'yic taqui-o'nal cu'un. La jloq'uesboxuc vo' avuch'ic ta ton; la jamboxuc muc'tic ch'en, te it'om loq'uel tal uc'umetic.

²² Yan li boch'otic chopolique mu'yuc c'usi lec tstaic o”, xi li Muc'ul Diose.