Isaías 47 - Bible in Tzotzil de Chenalhó with Deuterocanon

Tsta yorail chvuc' li lum Babiloniae

¹ “Babilonia, yalan, chotlan ta pucuctic, vo'ot ti ja' jechot jech chac c'u cha'al jun tojol tsebe; yalan ta achotleb, chotlan ta banamil. Vo'ot ti ja' jechot jech chac c'u cha'al ch'ium tsebe, j'ech'el mu'yuc xa boch'o chayalbot o ti toj lecote, ti toj jun avutsile.

² Tsaco acho', juch'najan atuc, loq'ueso li xpix ajole, nito muyel li atseque; ac'o vinajuc li smuc'ul avo'e, tuch'o jelovel atuc ta avacan li muc'tic uc'ume.

³ Ac'o vinajuc ti bu toj q'uexlal sbae; ac'o yilic li c'usi nac'al avu'une. Vu'un ta jpacbot sutel li c'usi laj apase, mu'yuc boch'o xu' chispajesun ac'o me oy boch'o xvocolet ta jtojol”, xi li Diose.

⁴ Li Jpojvanej cu'untique ja' li Ch'ul Dios yu'un Israele, Muc'ul Dios ech'em svu'el, ti xi sbie, jech chal:

⁵ “Tsebal Babilonia, chotlan, nijano aba, ochan ta ic' osil, yu'un mu'yuc xa boch'o chayalbot o ti vo'ot jpasmantalot ta scotol banamiletique.

⁶ Li'ilin to'ox yu'un li jteclume; laj caq'uic ta q'uexlal li jun banamil t'ujbil cu'une. Ja' yu'un laj cac'bot ta ac'ob, pero me jutuc muc xac'uxubin; laj avac'be xcuch alal icatsil avu'un li moletique.

⁷ Jech laj aval: ‘Vu'un me'ajvalilun o sbatel osil’, xachi. Muc xvul ta ajol li c'usi chc'ot ta pasel li'i; muc xanop c'usi chc'ot ta pasel ta atojol ta ts'acal.

⁸ A'yo ava'ay li c'usi chacalbot li' ta orae, vo'ot ti ja' jechot jech chac c'u cha'al jun jmulavil ants ti lec sc'ac'ubtasoj sbae, vo'ot ti jun no'ox avo'nton chotolot lec ta achotlebe, ti jech chanop ta avo'ntone: ‘Jtuc no'ox, mu'yuc boch'o yan jech chac c'u cha'al vu'un; mu'yuc chc'ot ta pasel chicom ta me'on ants; mu'yuc bu chca'ay c'u x'elan ec li boch'o mu'yuc yalabe’, ti xachie.

⁹ Pero xcha'chopal chc'ot ta atojol ta anil ta jun no'ox c'ac'al; chacom ta me'on ants, xchi'uc mu'yuc avol chcom o. Chava'ibe lec c'u x'elan yipal, ac'o me toj ep jmac-j'ilc'opetic avu'un, ac'o me toj ep jpicch'ich'etic avu'un.

¹⁰ Yu'un atuc no'ox avac'oj aba ta spasel li c'usi chopole, jech laj anop: ‘Mu'yuc boch'o chiyilun’, xachi. Ta abijil no'ox lalaj ta lo'lael, jech laj anop: ‘Jtuc no'ox xu' cu'un, mu'yuc yan’, xachi.

¹¹ Pero ta xtal tsots vocol ta atojol, mu xana' c'uxi chavut; ta xtal tsots lajel chamel ta atojol, mu'yuc xpoxil avu'un; ta xtal jinesel vuq'uesel ta atojol ti mu'yuc anopoj jech chc'ot ta pasele.

¹² Ja' apatoj o avo'nton yu'un li epal jmac-j'ilc'opetic avu'une xchi'uc li epal j'ac'chameletic avu'une, yu'un ta avololal ono'ox ja' toj lec laj ava'ay. Jq'ueltiquic me xu' chascoltaicot, jq'ueltiquic me xu tsibtasic batel li avocole.

¹³ Yu'un toj ep jtojobtasvanejetic avu'un, x'ech'et xa avo'nton yu'un. Ja' lec ac'o tal sva'an sbaic ta acoltael; ac'o talicuc li boch'otic sna'ic sq'uelel c'analetique, ti sna'ic c'usi chc'ot ta pasel c'alal tsq'uelic li c'analetique, ti tsq'uelic c'usitic chc'ot ta pasel ta atojol ta jujun ue.

¹⁴ Scotolic le'e ja' jechic jech chac c'u cha'al c'ajben ti ta ora no'ox xu' chc'ac' ta c'oq'ue, ti mu xu' chcol ta yat c'oq'ue. Yu'un li c'oq'ue mu ja'uc jech chac c'u cha'al ac'al ti xu' chijchotiutic ta c'atimol ta nopole.

¹⁵ Ja' jech chc'ot ta pasel ta stojol li bijil viniquetic avu'une, ti ta abic'tal ono'ox ep c'usi laj achapan achi'uque. Ta jujuntal tstam batel li xchopol beique; mu'yuc xa boch'o chascoltaot o.