Isaías 46 - Bible in Tzotzil de Chenalhó with Deuterocanon

¹ Li dios Bele te chyal ta lum stuc; li dios Neboe te chbalch'uj yalel stuc. Scotol li c'usitic cuybilic ta diosetique cuchbil ta ca' chbatic ti bu ch-ic'atic batele. Toj ol yicatsic batel li ca'etique; solel tslubtsajic ta xanubal.

² J'ech'el yalem ta lum chcom o, j'ech'el butq'uijem chcom o. Mu xu' yu'un tscoltaic li jcuchvanejetic yu'unique; persa te nabal chucbil chbatic ta yan banamil ec.

³ “Smomnich'nab Jacob, smomnich'nab Israel, ti c'u avepal comenoxuque, a'yo ava'yic c'usi ta xcal: Vu'un jtuc la jcuchoxuc ti c'alal ja' to'ox lavoq'uique; vu'un jtuc la jpetoxuc ti c'alal ja' to lavulic ta banamile.

⁴ Ja' jech ta jpasboxuc o c'alal to chamalubic; ja' jech jpetojoxuc o c'alal to tsacub ajolic. Vu'un la jpasoxuc, jech vu'un chajcuchoxuc o batel; vu'un ta jcoltaoxuc, vu'un ta jpojoxuc.

⁵ “¿Boch'o xu' chaco'oltsanicun jchi'uc? ¿Me chanopic ti oy boch'o xico'laj jchi'uque?

⁶ Ep boch'o tsloq'uesic c'anal taq'uin ta xvorxaic; ep boch'o tsbisic ta kilo c'u yalal li saquil taq'uinique. Ts'acal chbat spasic trato xchi'uc li jpasloc'ometique, yu'un ac'o pasbatuc jun sdiosic sventa chich' ta muc', sventa tsquejan sba ta stojol.

⁷ C'alal me ivu' yu'une, chq'uech batel ta snecub; chc'ot sva'an ta yavil, mu xbac' o. Chlic sc'opan, pero mu xtac'bat; mu xcoltaat ta sventa li svocole.

⁸ Ch'ayemal cristianoetic, na'o me ava'yic lec le'e; nopic lec, c'otuc ta avo'ntonic.

⁹ Vuleso ta ajolic li c'usitic ic'ot tal ta pasel ta vo'onee. Vu'un no'ox jtuc Diosun; mu'yuc yan dios ti xco'laj jech chac c'u cha'al vu'une.

¹⁰ Vu'un no'ox jtuc xu' chcal li c'usi chc'ot ta pasel ta ts'acale; epal jabil to'ox sc'an xc'ot ta pasel ti c'alal chcale. Jech chcal: Li c'usi jnopoje persa chc'ot ta pasel; li c'usi oy ta co'ntone ta ono'ox jpas.

¹¹ Vu'un ta xquic' tal c'alal to ta sloq'ueb c'ac'al li jun vinique; ta namal banamil ta xlic tal jech chac c'u cha'al jcot xic ti lec tstsac sve'ele. Vu'un chcal, persa ono'ox chquic' tal; vu'un la jnop, persa chc'ot ta pasel.

¹² A'yo ava'yic, vo'oxuc ti toj tsots avo'ntonique, ti laj abajic comel li c'usitic tuq'ue; a'yo ava'yic.

¹³ Ta xcac' nopajuc tal ta ora li tuq'uil chapanel cu'une; mu xa xcac' jalijuc. Ta xcac' tal coltael cu'un ta stojol li Sione; ta xcac' jlequilal ta stojol li Israele.