Isaías 45 - Bible in Tzotzil de Chenalhó with Deuterocanon

Dios laj yac'be yabtel li ajvalil Ciroe

¹ Li Muc'ul Diose la st'uj li ajvalil Ciroe; la snitbe tal ta sc'ob, yu'un chac'be sventain li jujun banamile, yu'un ac'o slajesbe stsatsal li muc'tic ajvaliletique. Ac'o sjam scotol li ti'coraltonetique, yu'un jech mu'yuc xa boch'o xu' yu'un tsmac o. Ja' yu'un jech chalbe:

² “Vu'un ba'yucbe chibat avu'un; vu'un ta jvuq'uesbot batel ti butic toyolique. Ta jc'asbot batel li tsatsal ti'naetic pasbilic ta bronce taq'uine; ta jlilin batel li sbaj ti'naetic ti pasbilic ta tsatsal taq'uine.

³ Vu'un chacac'bot li c'ulejalil ti lec nac'bilique, ti mu'yuc boch'o sna' bu nac'ajtique, yu'un jech chana' ti vu'un Muc'ul Diosun yu'un li Israele, ti vu'un laj quic'ot ta abie.

⁴ Ta sventa ti lec jc'anoj li cajtunel Jacobe, ja' li Israel ti t'ujbil ono'ox cu'une, ja' yu'un laj quic'ot ta abi; laj cac'bot avabtel sventa chmuq'uib ac'oplal, ac'o me muc xavotquinun li vo'ote.

⁵ Vu'un Muc'ul Diosun, mu'yuc yan Dios jech chac c'u cha'al vu'un. Vu'un la jchapanot lec xchi'uc avabtejeb, ac'o me muc xavotquinun li vo'ote.

⁶ Yu'un jech ac'o ana' ti mu'yuc yan Dios jech chac c'u cha'al vu'une. Mu'yuc bu ta tael yan Dios, me ta sloq'ueb c'ac'al, me ta smaleb c'ac'al ti co'ol jech chac c'u cha'al vu'une.

⁷ Vu'un jtuc la jpas li c'usitic chac' xojobale; vu'un laj cac' li ac'ubale; vu'un chcac' jun o'ntonal; vu'un chcac' ac'o taluc vocol noxtoc. Vu'un li Muc'ul Diosune, vu'un ta jpas scotol jech chac le'e.

Ja' no'ox stuc toj ech'em svu'el li Diose

⁸ “Vu'un ta jtac tal li lequil chapanele, ja' jech chyal tal jech chac c'u cha'al job osil, jech chac c'u cha'al vo'. Jech chata lec coltael, jech chac c'u cha'al banamil ti lec chuch' li vo' chyal tale, ti jech lec chac' sat li c'usitic chich' ts'unele, ja' jech puru lequil chapanel chc'ot ta atojol. Vu'un jtuc chcal ti jech chc'ot ta pasel, vu'un li Muc'ul Diosune”, xut.

⁹ Toj abul sba li boch'o mu xc'ot ta yo'nton c'usi chal li Jpasvanej yu'une ti tstsaquilan ta c'ope. Li bin patbil ta ach'ele ¿me xu' jech chalbe li yajvale: “¿C'u yu'un jech chapas le'e?”, me xu' xut? “Mu xana' xa'abtej”, mu xu' xut yajval li c'usi pasbil no'oxe.

¹⁰ Jech noxtoc mu smeloluc jech chalbe stot sme' li nich'onile: “¿C'u yu'un laj avac' ayincun? ¿C'u yu'un laj avoq'uesun?”, mu xu' xut.

¹¹ Li Muc'ul Dios, ja' li Ch'ul Dios yu'un Israele, ja' li Jpasvanej yu'une, jech chal: “¿Me vo'oxuc chavich'bicun jc'op c'usi ta jpas ta sventa li jnich'nabe? ¿Me vo'oxuc chachanubtasicun c'usi xu' ta jpas?

¹² Vu'un laj cac' ayinuc li banamile xchi'uc li cristianoetic te nacajtique; ta jc'ob jtuc la jlich'an batel li vinajele xchi'uc li c'usitic yan te laj caq'ue.

¹³ Vu'un laj quic' noxtoc li Ciroe yu'un ac'o stsal scotol; vu'un ta jtuq'uibtasbe batel scotol li sbee. Ja' ta xcha'va'an lec li lum cu'une; ja' ta scoltabun batel scotol li cu'untaque. Muc ta sventauc taq'uin, muc ta sventauc matanal ta scolta batel”, xi li Muc'ul Dios ti ech'em svu'ele.

¹⁴ Li Muc'ul Diose jech chalbe li Israele: “Li j'abteletic ta Egiptoe, li jmanulajel jchonolajeletic ta Etiopiae, xchi'uc li sebaetic ti lec natil viniquetique ta xlic ochicuc ta ac'ob, ja' amozotac chc'otic. Xna'plajetic batel ta apat, chucajtic batel ta cadena avu'un; ta squejan sbaic ta atojol, chlic sc'anbicot vocol, jech chayalbicot: ‘Ta melel te oy ta atojol li Diose; ta melel mu'yuc yan dios jech chac c'u cha'al li Dios avu'une’, xiic ta atojol”, xi.

¹⁵ Dios, ta melel vo'ot Diosot ti mu xaquil ta jsatcutique; vo'ot Diosot yu'un li Israele, vo'ot Jcoltavanejot yu'un.

¹⁶ Scotol li boch'o tspasic sloc'obal diosetique ta ono'ox xyalic ta q'uexlal; solel biq'uit chcomic, mu'yuc stu chc'otic o.

¹⁷ Yan li Israele coltabil yu'un li Muc'ul Diose, ch-ac'bat lec coltael sventa sbatel osil; mu'yuc chyalic ta q'uexlal, mu'yuc bu biq'uit chcomic.

¹⁸ Jech chal li Muc'ul Dios ti la spas vinajele, ja' ta melel, ja' li boch'o la spas banamile, ti la xchapan leque, ti lec nacal icom yu'un sventa ac'o oyuc boch'otic te chnaquie: “Vu'un muc'ul Diosun jtuc, mu'yuc yan dios.

¹⁹ Muc ta muculuc chic'opoj, muc ta nac'aluc chcal. Mu'yuc bu jech xcalbe li smomnich'nabtac Jacobe: ‘Altic chasa'icun’, mu'yuc bu xcut. Yu'un vu'un Muc'ul Diosun, tuc' chic'opoj; melel scotol c'usi chcal.

Dios chac' ta ilel ti mu'yuc stu li loc'ometic ti ich'bilic ta muq'ue

²⁰ “La'ic, tsobo abaic tal; nopajanic tal acotolic ti c'u to avepal cuxul lacomic ta jujun banamile. Mu'yuc sbijilic li boch'otic te yac'oj o yo'ntonic ta stojol li sdiosic pasbilic ta te'e, ti tsc'opanic jun dios ti mu xcoltavane.

²¹ Ac'o tal yalic, ac'o tal spojic li sdiosique; ac'o sa'ic lec c'u x'elan chc'opoj scotolic. ¿Boch'o laj yal ta sliquebal ti jech chc'ot ta pasel jech chac c'u cha'al laj cale? ¿Me oy boch'o laj ono'ox yal ta vo'one? ¿Me muc vu'cun no'ox jtuc laj cal?, vu'un li Muc'ul Diosune. Mu'yuc yan Dios jech chac c'u cha'al vu'un; jtuc no'ox Diosun ti tuc' co'ntone, ti xu' cu'un chicoltavane; mu'yuc boch'o yan jech chac c'u cha'al vu'un.

²² “La'ic ta jtojol acotolic, buyuc no'ox oyoxuc ta sbejel banamil, vu'un chajcoltaoxuc, yu'un vu'un jtuc Diosun, mu'yuc yan dios.

²³ Ta jbi jtuc chcal ta jamal; ta que jtuc chcal ti jech chc'ot ta pasel chac li'i: mu'yuc boch'o xu' tsmac ta be; scotol cristianoetic chlic squejan sbaic ta jtojol; ta scotol jaychop c'opetic ta xlic yalbicun ta jamal jbi scotolic.

²⁴ Jech chlic yalic ta jtojol: ‘Ja' no'ox ta sventa Muc'ul Dios ta jtatic coltael, ta jtatic c'uxubinel’, xiic. Li boch'otic chopol yo'ntonic ta jtojole, j'ech'el tsalbil chcomic o.

²⁵ Vu'un ta jventa tspasic canal; vu'un ta jventa ich'bilic ta muc' chc'otic li smomnich'nab Israele”, xi li Muc'ul Diose.