Isaías 44 - Bible in Tzotzil de Chenalhó with Deuterocanon

Ja' no'ox mero Dios stuc li Muc'ul Diose

¹ “Cajtunel Jacob, vo'ot li Israelot ti t'ujbilot cu'une, a'yo ava'ay li c'usi chacalbot li' ta orae.

² Vu'un li Muc'ul Diosune, vu'un laj cac'ot, vu'un ti la jchapanot tal ta yut ch'utile, vu'un chajcoltaot. Mu xaxi' Jacob, vo'ot li cajtunelote Israel, vo'ot ti t'ujbilot cu'une.

³ Vu'un ta xcac' yalel tal vo' ta xocol banamil; jech noxtoc ta xcac' xanovuc tsots uc'umetic ta taqui banamil. Ta xcac' yic'al que sventa ta xcuxiic li amomnich'nabtaque; xchi'uc ta xcac'be bendición li ats'unubaltaque.

⁴ Jech ta xlic ch'iicuc lec jech chac c'u cha'al ts'i'lal ti oy lec ya'lele; ta xlic q'uelumajicuc lec jech chac c'u cha'al sauce-te'etic ta ti' uc'um.

⁵ Oy jun yu'unic jech chlic yal: ‘Vu'un yu'unun li Muc'ul Diose’, xi. Oy yan jech chal: ‘Vu'un sts'unubalun li Jacobe’, xi. Oy yan jech tsts'iba ta sc'ob: ‘Yu'unun Muc'ul Dios’, xi. Jech noxtoc chlic sbiinbe sbi li Israele”, xi li Muc'ul Diose.

⁶ Li Muc'ul Dios, ja' li Ajvalil yu'un Israele, ja' li Jpojvanej yu'un ti ech'em svu'ele, jech chal: “Vu'un te oyun o ta sliquebal xchi'uc ta slajebal; mu'yuc yan dios jech chac c'u cha'al vu'un.

⁷ ¿Me oy boch'o xco'laj jech chac c'u cha'al li vu'une? Ac'o c'opojuc, ac'o yal tal ca'tic; ac'o xchol tal ca'tic li c'usi ic'ot tal ta pasel ta jujucoj ta sliquebal c'alal la jliques tal li jun ta lum ta vo'onee; ac'o yal ca'tic li c'usi li' to jmacojtic batele. ¡Svocoluc, ac'o yal tal ca'tic!

⁸ Mu me xaxi'ic, tsotsuc me avo'ntonic, vo'oxuc te ta Israel. Li vu'une calojboxuc ono'ox ta vo'one li c'usitic chc'ot ta pasele. Vo'oxuc testigooxuc cu'un, jtuc no'ox Diosun, mu'yuc yan. Mu'yuc boch'o tsots svu'el, me junuc mu'yuc bu quiloj”, xi li Muc'ul Diose.

Scontrainel c'usitic cuybilic ta diosetic

⁹ Li boch'o tspasic sloc'obal diosetique mu'yuc stuic o ta j'ech'el. Li loc'ometic ti scuyojic ta diose mu'yuc stu o. Li boch'otic chich'ic ta muq'ue ja' ma'satetic, bol cristianoetic, ja' yu'un te chyalic o ta q'uexlal xchi'uquic.

¹⁰ Li boch'o tspasic sloc'obal diosetique mu'yuc stu o; altic chac' svocolic.

¹¹ Scotol li boch'otic co'ol chich'ic ta muc' xchi'uque, co'ol chyalic ta q'uexlal. Yu'un li boch'otic tspasic sloc'obal diosetique cristianoetic no'ox. C'alal jmoj tstsob sbaic sventa chich'ic ich'bel sc'opique, scotolic mu'yuc stu chcomic; chyalic o ta q'uexlal.

¹² Li jtentaq'uine ta c'oc' ta x'abtej. Ts'acal tstsac jun cincel, ta sten lec ta martillo; tsots ta xac' persa. Me ivi'naje, ta xlaj stsatsal; me itaquij yo'ntone, ta x'alub.

¹³ Li carpinteroe ta stsac jun sregla, chac'be lec senyail ta lápiz. Ts'acal chlic xch'ul lec, chlic sloc'ta jun vinic; lec xa c'upil sba chbat yu'un, chbat sva'an ta xch'ulna.

¹⁴ Jech noxtoc, tsts'un lec ch'ut te'etic, lec chch'i ti c'alal chac' vo'e, jech oy lec ch'ut te' yu'un. Yan me ja' tsc'an c'uc'toj, o c'antulane, chac' ta chabiel ti bu ch'iemic ta toyolal te'tique ja' to ti c'alal lec xa muc'tique.

¹⁵ Te chloc' si'il sc'oc' noxtoc, xchi'uc te chloc' sloc'obal sdios noxtoc. Tstsobbe lec scamul sventa chc'atin, xchi'uc sventa chta'aj o pan sve'. C'alal tsmeltsaj yu'un li sloc'obal sdiose, chlic squejan sba ta stojol, chlic yich' ta muc'.

¹⁶ J'o'lol chtun yu'un sventa si'il sc'oc'. Te tsvo o ti'bol sti'; lec chve' o ta vobil ti'bol xchi'uc, j'o'lol chtun yu'un sventa chc'atin o, jech chal: “Toj lec stsan li jsi'e, toj lec q'uixin”, xi.

¹⁷ J'o'lol tstunes noxtoc sventa tspas o dios yu'un; chlic yich' ta muc', tsquejan sba ta stojol, jech chalbe: “Coltaun me, yu'un vo'ot diosot cu'un”, xut.

¹⁸ Mu sna'be smelol c'usi tspas li vinique. Solel macal sat, macal sjol yo'nton; mu xa'ibe o smelol.

¹⁹ Mu'yuc bu tsnop jutuc. Mu'yuc bu chvul ta yo'nton ti la stunes j'o'lol ta sventa si'e. Mu'yuc bu tsnop ta yo'nton jech chac li'i: “Li te' li'i j'o'lol la jtunes ta sventa si'; lec ita'aj o pan jve', lec la jvo o ti'bol jti'. ¿Me smelol ti la jpas jun li c'usi mu'yuc stu ta j'ech'ele? ¿Me smelol ti ta jquejan jba ta stojol li jbos te'e?”, mu'yuc bu xi tsnop.

²⁰ Xco'laj xchi'uc puru tan tslo' ya'yel. Lo'labil yu'un li yo'ntone; ch'ayem o ta be, jech mu xu' chcol o. Mu'yuc bu jech tsnop ta yo'nton: “¿Me mu'yuc lajemun ta lo'lael yu'un li c'usi li' jtsacoj ta jbats'ic'obe?”, mu'yuc xi.

Li Muc'ul Diose ja' Jcoltavanej yu'un li Israele

²¹ “Jacob, na'o me ava'ay; Israel, na'o me ti vo'ot cajtunelote, vu'un la jpasot, ja' yu'un cajtunelot. Israel, mu'yuc bu chach'ay o ta co'nton.

²² Li vu'une laj xa jch'aybot li atoyobbaile; laj xa jmes loq'uel li amule; muc xvinaj bu ibat cu'un jech chac c'u cha'al lumal toc. Sutan me tal ta jtojol, yu'un vu'un la jcha'pojot loq'uel tal”, xi li Muc'ul Diose.

²³ Vinajel, avanan ta xcuxetel avo'nton ta sventa ti toj lec c'usi la spas li Muc'ul Diose; yutil banamil, avanan ta xcuxetel avo'nton. Muc'tic vitsetic, toyolal te'tic, xchi'uc yantic te'etic, cuxetuc no'ox avo'ntonic, albeic slequilal. Yu'un li Muc'ul Diose laj xa yac' ta ilel yutsilal slequilal; yu'un laj xa xcha'poj loq'uel tal li Jacobe, laj xa yac' ta ich'el ta muc' li Israele.

²⁴ Li Muc'ul Dios, ja' li Jpojvanej avu'un ti la xchapanot tal ta yut ch'utile, jech chal: “Vu'un Muc'ul Diosun, jtuc la jpas scotol li c'usitic oye; jtuc la jlich'an batel li vinajele; jtuc la jnacan lec li banamile.

²⁵ Vu'un ta jsoquesbe senyail yu'unic li boch'otic oy c'usi xchanojic spasele; vu'un ta jch'aybe sjolic li jt'unuletique. Ta xcac' socuc sc'opic li boch'otic lec bijique; ta xcac' ta ilel ti ja' bol cristianoetique.

²⁶ Vu'un ta xcac' c'otuc ta pasel sc'opic li cajtuneltaque; ta xcac' ti lec chbat c'usi chalic li j'almantaletic cu'une. Vu'un jech ta xcalbe li Jerusalene: ‘Ta xlic ayinuc avajval yan velta. Lumetic ta Judá, ta xlic avich' cha'va'anel yan velta; ta xlic cha'cuxuc li avavilique’, chcut.

²⁷ Vu'un jech ta xcalbe li muc'tic nabe: ‘Ta xcac' taquijanic, ta xcules li ava'lelique’, chcut.

²⁸ Vu'un jech ta xcalbe noxtoc li Ciroe: ‘Vu'un jchabichij chac'ot cu'un; vo'ot chapasbun scotol li c'usi ta jc'ane’, chcut. Jech chcalbe li Jerusalene: ‘Chavich' cha'va'anel yan velta’, chcut. Jech chcalbe li ch'ulnae: ‘Chavich' cha'nacanel lec yan velta’, chcut”, xi li Muc'ul Diose.