Isaías 43 - Bible in Tzotzil de Chenalhó with Deuterocanon

Ja' no'ox Jcoltavanej stuc li Muc'ul Diose

¹ Jacob, jech chayalbot li Muc'ul Diose, ja' li Boch'o la spasote; Israel, jech chayalbot li Boch'o laj yac'ote: “Mu xaxi', vu'un ta jcoltaot; vu'un laj quic'ot ta abi, vu'un cu'unot o.

² C'alal chatuch' jelovel muc'tic nabe, te chajchi'inot; c'alal chatuch' jelovel uc'umetique, mu xaxcuchot batel; c'alal chajelov ta o'lol coq'ue, mu'yuc chac'ac'; mu xaxchic'ot li yat c'oq'ue.

³ Vu'un li Muc'ul Diosune, vu'un Diosun avu'un, vu'un li Ch'ul Diosun yu'un Israele, vu'un Jcoltavanej avu'un. Ja' laj cac' ta aq'uexol li Egipto, li Etiopía, xchi'uc li Sebae; ja' amanubil ic'ot cu'un.

⁴ Yu'un li vo'ote toj tsots ac'oplal cu'un, toj lec laj quilot, toj ep jc'anojot, ja' yu'un ja' laj cac' ta aq'uexol yantic viniquetic, yantic banamiletic.

⁵ Mu xaxi', vu'un chajchi'inot; chbat quic' tal c'alal to ta sloq'ueb c'ac'al, c'alal to ta smaleb c'ac'al li achi'iltaque yu'un ac'o tal stsob sbaic.

⁶ Jech chcalbe li boch'otic te oyic ta nortee: ‘Tacbun sutel tal li cu'untaque’, chcut. Jech chcalbe li boch'otic te oyic ta sure: ‘Mu me teuc xavic'bun o comel; ac'bun sutel tal li jqueremetic, li jtsebetic te oyic ta sti'iltac banamile.

⁷ Yu'un ti la jpas, ti laj cac' li boch'otic xcuchojbicun jbie, ja' sventa ac'o ich'atcun ta muc'’, xcut.

⁸ “Coltabicun tal li jteclum le'e. Oy satic, pero pasemic ta ma'sat; oy xchiquinic, pero pasemic ta coc.

⁹ Ac'o taluc scotol li lumetique; ac'o stsob sba tal scotol li jujun banamile. ¿Me oy boch'o junucal yu'unic laj ono'ox yalic ti jech chc'ot ta pasel chac le'e? ¿Me oy boch'o laj yal yu'unic li c'usitic c'otem tal ta pasel ta sliquebale? Ac'o sva'an tal stestigoic; ac'o tal yalic me oy boch'o yaloje”, xi li Diose.

¹⁰ Li Muc'ul Diose jech chal: “Vo'oxuc testigooxuc cu'un, vo'oxuc cajtuneloxuc, vu'un la jt'ujoxuc yu'un jech ac'o ana'ic, ac'o ach'unic. Ac'o c'otuc ta avo'ntonic ti vu'un ono'ox te oyun oe, ti mu'yuc yan dios ba'yuc ilic cu'une, ti mu'yuc yan Dios ta to xtale.

¹¹ Vu'un no'ox jtuc Diosun, mu'yuc boch'o yan chcoltavan jech chac c'u cha'al vu'un”, xi.

¹² Jech chal noxtoc: “Vu'une laj ono'ox cal li c'usi chc'ot ta pasele; vu'un la jcoltaoxuc noxtoc. Laj cac' ana'ic ti mu'yuc yan dios avu'unique, ja' yu'un vo'oxuc testigooxuc cu'un.

¹³ Jtalel te ono'ox oyun o, vu'un ono'ox Diosun o. Mu'yuc boch'o xu' tspoj loq'uel ta jc'ob, mu'yuc boch'o xu' tsmac ta be li c'usi nopbil cu'une”, xi li Diose.

¹⁴ Jech chal noxtoc li Muc'ul Dios ja' li Ch'ul Dios yu'un Israele, ja' li Boch'o la spojoxuque: “Ta sventa ti c'uxoxuc ta co'ntone, ja' yu'un oy boch'o ta jtac batel ta Babilonia. Ta jambe smac scotol li chuquinabetique; li caldeaetique ta xlic c'atajuc ta ya'lel satic li xcuxetel yo'ntonique.

¹⁵ Vu'un Muc'ul Diosun, Ch'ul Diosun avu'unic; vu'un la jpasoxuc vo'oxuc li israeloxuque; vu'un Ajvalilun avu'unic”, xi.

¹⁶ Li Muc'ul Diose la sjam jelovel be ta o'lol nab; la xch'ac jelovel be ti bu toj tsots yipe.

¹⁷ Te laj yic' ochel epal caretaetic, epal ca'etic, xchi'uc epal soldadoetic ti toj tsots xu' yu'unique; te laj yules o scotolic, te lamal icomic, muc xa stotsic o. Ja' jech icomic jech chac c'u cha'al mecha ti tuben o ta j'ech'ele.

¹⁸ Li Muc'ul Diose jech chalbe li steclumale: “Mu me xat'ab ta avo'ntonic li c'usi jeloven xae; mu xa me xanopic li c'usi vo'one xa c'otem ta pasele.

¹⁹ Q'uelavilic, vu'un ta jpas c'usi ach'. Ta xa xc'ot ta pasel cu'un, ¿me mu'yuc to chavilic? Ta jam batel be ta xocol banamil; ta xcac' loc'uc uc'umetic ta taqui banamil.

²⁰ Ta xiyich'icun ta muc' li chonbolometic ta te'tique, xchi'uc li oq'uiletique, xchi'uc li avestruz mutetique, yu'un ta xcac' ti ac'o oyuc vo' ta xocol banamile; ta xcac' loc'uc uc'umetic ta taqui banamil, yu'un jech tstaic vo' yuch'ic li jteclumal ti t'ujbilic cu'une.

²¹ Li jteclum la jliquese ja' sventa ac'o yalic batel jlequilal.

²² “Pero li vo'ote, Jacob, muc xac'anbun vocol; li vo'ote, Israel, ja' no'ox lalubtsaj ta jtojol.

²³ Muc xachic'bun jmotonin li chije; muc xavich'un ta muc' ta sventa milbil matanal. Mu'yuc bu xajsujot ta sc'anel matanal; mu'yuc bu x'ech' avo'nton cu'un ta sc'anel pom.

²⁴ Mu'yuc bu xamanbun tal ta taq'uin li te' ti lec mu yiq'ue; mu'yuc bu x'ech' co'nton yu'un smuil xepual li milbil matanal avu'une. Ja' no'ox vo'oxuc laj alubtsanicun ta scoj li amulique; laj avaq'uic ech'uc co'nton yu'un li achopolilique.

²⁵ “Pero ta sventa ti vu'un Diosun avu'unique vu'un ta jtu'pboxuc li amulique; mu'yuc xa ta jt'ab ta co'nton o.

²⁶ Albicun ca'ay me oy bu mu'yuc lec la jpase. La' jchapantic ta jcha'voc'altic; c'opojanic, alic tal me mu'yuc li amulique.

²⁷ Li sba atot ame'ic ta vo'onee la sa' smulic; li jchanubtasvanejetic avu'unique la stoy sbaic ta jtojol.

²⁸ Ja' yu'un laj cac' ta q'uexlal li banquilaletic avu'unic ta ch'ulnae; la jloq'ues ta jtojol li Jacobe; laj cac' ta ixtolc'optael li Israele.