Isaías 42 - Bible in Tzotzil de Chenalhó with Deuterocanon

Sc'oplal yajtunel Muc'ul Dios

¹ “Q'uelavilic li cajtunele, vu'un oy ta jc'ob, vu'un la jt'uj; toj xcuxet co'nton yu'un, laj xa cac'be li espíritu cu'une. Ja' chtal xchapan li jujun lume.

² Mu'yuc ch-avan, mu'yuc tsots chc'opoj; mu'yuc ch-avan ta xoraltic.

³ Ma'uc chcha'c'as li aj bu voch'em xae; ma'uc chcha'tu'p li mecha ti chtu'p xae. Ta melel ja' chich' tal tuq'uil chapanel.

⁴ Mu sna' xlubtsaj, mu sna' x'ech' yo'nton, ja' to me la sliques li tuq'uil chapanel li' ta sba banamile. Li lumetic ta ti'ti' nabe jun yo'nton tsmalaic li chanubtaseletic yu'une”, xi li Diose.

⁵ Li Muc'ul Diose, ja' li Boch'o ta jech no'ox i'ayin yu'un li vinajele, ti la xlich'an batel jech chac c'u cha'al poq'ue, ti la sq'ui batel li banamile xchi'uc li c'usitic te ch'iemique, ti ja' chac'be yich'ic ic' li boch'otic te nacajtique, ti ja' chac'be xcuxlejal li boch'otic te chanovique, jech chalbe li yajtunele:

⁶ “Vu'un li Muc'ul Diosune, vu'un laj quic'ot, la jtsacbot lec ta ac'ob. Vu'un la jpasot, vu'un la jt'ujot sventa chacom ta sventainel li c'usi chapanbil cu'une. Vo'ot luz chac'ot yu'un li jujun lume.

⁷ Vo'ot chajambe sat li ma'satetique; vo'ot chaloq'ues tal ta chuquel li jchuqueletique; vo'ot chaloq'ues tal ti bu chuculic ta ic' osile.

⁸ Vu'un li Muc'ul Dios jbie, mu xcac' boch'o yan chich' li jlequilal cutsilale; mu xcac' ja' chc'ot ta stojolic quich'el ta muc' li c'usitic loc'tabilic no'oxe.

⁹ Q'uelavilic, ic'otan ta pasel li c'usitic caloj ono'ox tal ta vo'onee; li' ta orae ach' xa c'usi chcac' ta na'el. Vu'un chacalboxuc ava'yic ti c'alal muc to chc'ot ta pasele”, xi li Diose.

Q'ueoj sventa coltael yu'un Muc'ul Dios

¹⁰ Q'uejintaic ta ach' q'ueoj li Muc'ul Diose, vo'oxuc ti te oyoxuc ta namal banamile, vo'oxuc ti chaxanovic ta barcoetic ta nabe, vo'oxuc ti te ch'iemoxuc ta yut nabe, vo'oxuc li lumoxuc ta ti'ti' nabe, xchi'uc vo'oxuc ti yajvaloxuc lumetique albeic slequilal li Muc'ul Diose.

¹¹ Ac'o avanicuc ta xcuxetel yo'ntonic li xocol banamile xchi'uc li lumetic yu'une, xchi'uc li tsobtsob naetic bu nacajtic sts'unubal Cedare. Ac'o q'uejinicuc li jnaclumetic ta Selae; ac'o avanicuc tal ta mero jol vitsetic.

¹² Albeic slequilal li Muc'ul Diose; pucbeic batel sc'oplal ta q'ueojetic ta lumetic ta ti'ti' nab.

¹³ Yu'un li Muc'ul Diose chloc' tal jech chac c'u cha'al jun tsatsal vinic; tsots tspas pleito ta sc'ac'al yo'nton jech chac c'u cha'al jun soldado; tsots ch-avan, persa tstsal li yajcontrae.

¹⁴ Li Muc'ul Diose jech chal: “Ta vo'onee ch'an to'ox xichi; mu'yuc c'usi laj cal, la jpajes jba. Pero tana ta xi'avan jech chac c'u cha'al jun ants ti c'alal yorail xa chcuxe; ta xi'ajquinaj, ta jic' co'nton.

¹⁵ Ta jines li muc'tic vitse xchi'uc li bic'tal vitsetique; ta jtaquijes scotol li c'usitic te ch'iemique. Ta jc'atajes ta bats'i banamil li uc'umetique; ta jtaquijes scotol li sts'anleb vo'etique.

¹⁶ Li ma'satetique ta jbeiltasic batel ta be ti bu mu xotquinique; ta xcac' xanovicuc batel ta bic'tal beetic ti bu mu'yuc ono'ox xanovenic tee. Ta jc'atajesbe ta sac osil li ic' osile; ta jpasbeic lec ta parejo li banamil ti bu slomol spots'ole. Scotol le'e ta persa ta jpas, muc ja'uc no'ox chcal.

¹⁷ Li boch'o ja' yich'ojic ta muc' sloc'obal diosetique, li boch'o jech chalbeic li c'usitic jeche' va'ajtique: ‘Vo'ot diosoxuc cu'uncutic’, ti xutique, ta xlic namajicuc batel ta q'uexlal.

Coc xchi'uc ma'sat c'otemic li israeletique

¹⁸ “Coquil chiquinetic, a'yo ava'yic; ma'satetic, q'uelo lec avilic.

¹⁹ Mu'yuc boch'o yan ma'sat jech chac c'u cha'al li cu'untaque; mu'yuc boch'o yan macal xchiquin jech chac c'u cha'al li caj'alc'op jtacoj tale. Mu'yuc boch'o yan ech'em macal sat, mu'yuc boch'o yan ech'em macal xchiquin jech chac c'u cha'al li boch'o t'ujbilic cu'une, jech chac c'u cha'al li cu'untac, vu'un li Muc'ul Diosune.

²⁰ Ac'o me ep c'usitic laj yilic, pero mu xc'ot ta yo'ntonic; cha'yic, pero mu sc'an xchiquintaic.

²¹ Ta sventa ti toj tuc' yo'nton li Muc'ul Diose, tsc'an ox toj tsots sc'oplal chc'ot yu'un li smantaltaque; tsc'an ox toj lec chbat sc'oplal li chanubtaseletic yu'une.

²² Pero li jun lum le'e laj yich'ic pech'el ta teq'uel, laj yich'ic pojbel c'usitic oy yu'unic, laj yich'ic maquel ta ch'en, laj yich'ic tiq'uel ta chuquinab, laj yich'ic pojbel c'usitic oy yu'unic, mu'yuc boch'o icoltaatic yu'un. Ibat scotol c'usitic oy yu'unic, me junuc mu'yuc boch'o jech laj yal: ‘Sutesbeic’, mu'yuc boch'o xi”, xi li Diose.

²³ ¿Boch'o tsc'an to cha'ay jech chac le'e? ¿Boch'o lec cha'ay li c'usi ic'ot ta pasele?

²⁴ ¿Boch'o laj yac' ta pojbel c'usitic oy yu'un li Jacobe? ¿Boch'o laj yac' ta tsalel li Israele? ¿Me mu ja'uc Muc'ul Dios jech la spas, ja' li boch'o ep laj asa' amulic ta stojole, ti mu xac'an xach'unbeic smantaltaque?

²⁵ Ja' yu'un i'ilin ta atojolic, laj yac'boxuc avocolic; laj yac'oxuc ta tsalel ta tsots pleito. Itsan c'oc' ta buyuc no'ox, pero muc xavich' avo'ntonic o; c'an xa ulanic o, pero muc ono'ox xavich'ic ta muc'.