Isaías 41 - Bible in Tzotzil de Chenalhó with Deuterocanon

Li Diose laj yal ti chcolic sutel li israeletique

¹ “Vo'oxuc lumetic ta ti'ti' nab, ch'anchianic ta jtojol; lumetic, ich'o lec avipic. Nopajanic tal, la' jnoptic li a'yej li'i; la' jtsob jbatic ta xchapanel.

² ¿Boch'o laj yac' loc'uc tal ta stuq'uil sloq'uem c'ac'al li jun ajvalil ti xu' yu'un tstsal scotole? ¿Boch'o laj yac'be ta sc'ob li jujun banamile, xchi'uc ti laj yac' bic'tajicuc ta stojol li ajvaliletic yu'unique, ti ta yespada, ta st'ilesubil sflecha no'ox la stani batel, la spuc batel jech chac c'u cha'al taqui jobele?

³ ¿Boch'o laj yac' ti ivu' yu'un la snuts batele, ti lec ixanov batel ta be ti bu mu'yuc ono'ox baq'uin steq'ue?

⁴ ¿Boch'o la spas li abtel le'e? ¿Boch'o ti ta sliquebal ono'ox oy c'usi laj yac' c'otuc tal ta pasel ta jujuc'ol cristianoetique? Vu'un li Muc'ul Diose, vu'un te oyun ta sliqueb, vu'un te oyun ta slajeb noxtoc.

⁵ Li lumetic ta ti'ti' nabe laj yilic, ixi'ic; li banamile iliquic xa ta niquel c'alal ta jujujot sti'. Ta stsob sbaic, ta xtal scolta sbaic scotolic”, xi li Muc'ul Diose.

⁶ Ta jujuntal tstsatsubtasbe sba yo'ntonic. Jech chalbe sbaic: “Tsotsan me”, xut sbaic.

⁷ Li jpasloc'ometique la stsatsubtasbe yo'nton li boch'o ch-abtej ta saquil taq'uine; li boch'o tspic martilloe la stsatsubtasbe yo'nton li boch'o tsten taq'uin ta stenubile, jech chalbe: “Lec chbat spaq'uel li taq'uinetique”, xut. Jech chlic sbaj lec ta lavux li loc'ome; lec tsinil tspas yu'un jech mu xbalch'uj.

⁸ “Pero li vo'ote, Israel, lequil cajtunelot, vo'ot li smomnich'naboxuc Jacobe, vu'un la jt'ujoxuc, vo'oxuc sts'unubaloxuc li Abraham ti lec la jc'opan jba jchi'uque.

⁹ Vu'un laj quic'ot loq'uel tal ti bu to'ox oyot ta sti'il banamile; ta namal banamil oyot, pero laj quic'ot, jech laj calbot: ‘Vo'ot cajtunelot, vu'un la jt'ujot, mu'yuc chajbajot o’, xacutot.

¹⁰ Ja' yu'un mu me xaxi', yu'un vu'un chajchi'inot; mu c'u xal avo'nton, yu'un vu'un Diosun avu'un. Vu'un chacac'bot atsatsal, vu'un chajcoltaot; vu'un chajtsacot lec ta jbats'ic'ob ti xu' yu'un tstsalvane.

¹¹ Scotol li boch'o chopol yo'ntonic ta atojole ta xyalic ta q'uexlal, biq'uit chcomic o. Li boch'o chascontrainicote j'ech'el ch-ulic o.

¹² Ac'o me chasa' bu oyic li avajcontrataque, mu xa xata. Li boch'o chastsaquicot ta pleitoe, ja' jech chc'otic jech chac c'u cha'al c'usi mu'yuc stu, ti mu'yuc bu xquiltic o jeche.

¹³ Yu'un vu'un li Muc'ul Diosun avu'une; la jtsacbot lec ta abats'ic'ob, jech laj calbot: ‘Mu xaxi', vu'un chajcoltaot’, xacutot”, xi li Muc'ul Diose.

¹⁴ Li Muc'ul Diose jech chal ta jamal: “Vo'oxuc li sts'unubaloxuc Israel ti jutuc xa comenoxuque, vo'oxuc li yu'unoxuc Jacob ti biq'uitoxuc jech chac c'u cha'al xuvite, mu xaxi'ic, vu'un chajcoltaoxuc. Vu'un li Ch'ul Diosun yu'un Israele, vu'un Jpojvanejun avu'unic.

¹⁵ Chajc'atajesoxuc ta jun máquina sventa sloq'uesubil spat trigo; ja' jech chac'otic jech chac c'u cha'al sloq'uesubil pat trigo ti yach'el toe, ti oy to lec yee. Ja' sventa chalilinic o, chapasic o ta pucuc li muc'tic vitse, xchi'uc chac'atajesic ta te'el trigo li bic'tal vitsetique.

¹⁶ C'alal chajipic muyel ta toyole, ta xcuchat batel ta ic'; ta xich' tanijel batel ta tsatsal ic'. Pero li vo'ote xcuxet no'ox avo'nton ta jtojol, vu'un li Muc'ul Diosune, jech toj jun avo'nton chava'ay ta sventa li Ch'ul Dios yu'un Israel.

¹⁷ “Li boch'otic abul sbaique xchi'uc li me'onetique ta sa'ic vo' yuch'ic, pero mu staic, jech te tsbal sba o stubic ta taqui-o'nal. Pero vu'un li Muc'ul Diose ta xca'ibe sc'opic; vu'un li Diosun yu'un Israele mu'yuc ta jcomtsanic o.

¹⁸ Ta jambe loq'uel sbe uc'umetic ta sbajbajil jolvitsetic; ta jt'omes loq'uel nio'etic ta xch'ac-ch'aquil vitsetic. Ta jpas ta sts'anleb vo'etic li xocol banamile; loq'ueb vo'tic chc'ot cu'un li taqui banamile.

¹⁹ Ta jts'un lec ch'ut te'etic ta xocol banamil, xchi'uc acacia te'etic, arrayán te'etic, xchi'uc olivaetic. Ta xcac' ch'iuc lec nuculpat tojetic ti bu toj taquin li banamile, xchi'uc ta xcac' ch'iuc c'uc'tojetic capal ta yantic lequil te'etic.

²⁰ Yu'un jech ac'o yilic, ac'o sna'ic sbejel banamil, jech ac'o c'otuc ta yo'ntonic, ac'o ya'ibeic smelol ti vu'un ta jpas ta jtsatsal ta jvu'el scotol, vu'un li Muc'ul Diosune. Ac'o sna'ic ti vu'un laj cac' ayinuc scotol ta jech no'ox, vu'un li Ch'ul Diosun yu'un Israele”, xi li Diose.

Li Diose laj yal ta jamal ti mu ja'uc Dios li c'usitic loc'tabilique

²¹ Li Muc'ul Diose, ja' li ajvalil yu'un Jacobe, jech chalbe li c'usitic cuybilic ta diose: “Loc'ometic, la' me colta abaic; la' me c'opojanic sventa chapoj abaic.

²² La'ic me, la' alic ca'tic li c'usi ta to xc'ot ta pasele; la' cholic ca'tic li c'usi ic'otan tal ta pasel ta sliquebale. Ta xca'icutic lec c'usi chavalic. Alic ca'tic li c'usi chc'ot ta pasel ta ts'acale; ac'bun jna'cutic li c'usi li' to jmacojtic batele.

²³ Alic ca'tic li c'usitic ta to xc'ot ta pasel ta ts'acale, yu'un jech ta jna'cutic me ta melel ti diosoxuque. Pasic quic li c'usi xu' avu'unique, ac'o me lec, me chopol, yu'un jech ta jna'cutic, jech xu' toj ch'ayel chc'ot co'ntontic yu'un.

²⁴ A'yo ava'yic, li vo'oxuque mu'yuc c'usi atuic ta j'ech'el; mu'yuc c'usi xu' avu'unic o. Li boch'o la scuyoxuc ta sdiosique ja' bol cristianoetic.

²⁵ “Ta xquic' tal jun vinic te ta sloq'ueb c'ac'al, ja' chist'abbun ta alel jbi; te chvul ta loq'uel ta norte. Ja' chpech' ta teq'uel jech chac c'u cha'al ach'el li jpasmantaletique; ja' jech tspasbe jech chac c'u cha'al jpatbin ti tsvots' ta teq'uel ach'ele.

²⁶ ¿Boch'o junucal avu'unic yaloj xa ono'ox tal ta vo'one, yu'un jech jna'ojtic xa ti jech chc'ot ta pasele, yu'un jech xu' chcaltic ti toj lec bije? Mu'yuc boch'o junucal avu'unic laj yal; mu'yuc bu avalojic jbeluc me oy c'usi chc'ot ta pasel.

²⁷ Vu'un jtuc laj calbeic li Sione; vu'un la jtac batel boch'o chbat yal ta lum Jerusalén ti oy c'usi lec chc'ot ta pasel ta stojole.

²⁸ La jq'uelilan, pero mu'yuc boch'o junuc avu'unic, mu'yuc boch'o xu' chal lec razón; oy c'usi la jac'boxuc, pero muc xatac'ovic.

²⁹ A'yo ava'yic, alticoxuc acotolic; mu'yuc c'usi xu' avu'unic o. Ja' jechoxuc jech chac c'u cha'al ic'; mu'yuc stu o ti c'u x'elan loc'tabiloxuque”, xut.