Isaías 40 - Bible in Tzotzil de Chenalhó with Deuterocanon

Li Muc'ul Diose la spatbe yo'nton li yajvaltac lum Jerusalene

¹ Li Muc'ul Dios, ja' li Dios avu'unique, jech chal: “Patbeic yo'nton, patbeic yo'nton li jteclumale.

² C'opanic ta yutsil avo'ntonic li Jerusalene; avananic, albeic ti its'aqui xa yu'unic li mozoinele, ti itoj xa yu'un li smulique, ti inel xa yu'unic li tsots vocol ti jeloven yepal laj cac'beic ta scoj smulique”, xi li Diose.

³ Oy boch'o tsots ta x'avan ta xocol banamil: “Chapanbeic sbe li Muc'ul Diose; tuq'uibtasbeic sbe Dios cu'untic te ta xocol banamil.

⁴ Nojesic scotol li soplejaltique; pasic ta parejo scotol li vitsetique; pasic ta stenlej scotol ti bu toyolique; co'oltsanic scotol ti bu slomol spots'ole.

⁵ Jech chlic yac' ta ilel slequilal yutsilal li Muc'ul Diose; scotol cristianoetic ta xilic, yu'un jech laj yal stuc li Muc'ul Diose”, xi li boch'o ch-avane.

⁶ Oy boch'o jech laj yal: “Avanan”, xi, Jech laj jac'be li vu'une: “¿C'usi chcal ti chi'avane?”, xcut. Jech laj yalbun: “Alo ti ja' jechic jech chac c'u cha'al ts'i'lal scotol li cristianoetique; li yutsil slequilique ja' jech chac c'u cha'al nichim.

⁷ Li ts'i'lale ta xtaquij, li nichime ta smats' ti c'alal ta xich' juch'tael yu'un Muc'ul Diose. Ta melel ja' jechic jech chac c'u cha'al ts'i'lal li cristianoetique.

⁸ Li ts'i'lale ta xtaquij, li nichime ta smats'; yan li sc'op Dios cu'untique mu sna' xlaj o sbatel osil”, chian, xiyutun.

⁹ Muyan ta jun toyol vits, vo'ot ti avich'oj tal lec a'yej ta stojol li Sione. Tsots xa'avan, vo'ot ti avich'oj tal lec a'yej ta stojol li Jerusalene. Lican, mu xaxi', jech xavalbe li lumetic te ta Judae: “Q'uelavilic, le' oy li Dios avu'unique”, uto.

¹⁰ A'yo ava'yic, li Muc'ul Diose ta xtal xchi'uc svu'el, ta svu'el chlic sventain scotol. Q'uelavilic, ta xtal xchi'uc tojolil; ta xtal xchi'uc matanal.

¹¹ Ta xtal jech chac c'u cha'al jun jchabichij ti lec ta xchabi xchije; ta spet liquel ta sc'ob li ch'ium chijetique, ta spatan batel ta sna yo'nton; lec ta sq'uel ta stuc'ulan ti bu ja' to chvoq'uique.

Mu'yuc boch'o xco'laj jech chac c'u cha'al li Dios yu'un Israele

¹² ¿Boch'o la sbis jayloch'el ta sc'ob ya'lel li muc'ta nabe? ¿Boch'o la sbis, boch'o la xch'ixta c'u sjamlej li vinajele? ¿Boch'o la sbis jaymoch li spucucal banamile? ¿Boch'o la sbis ta sbisubil c'u yalal li muc'tic vits xchi'uc li bic'tal vitsetique?

¹³ ¿Boch'o la xchanubtas, boch'o la sbijubtas c'usi tsc'an tspas li Muc'ul Diose?

¹⁴ ¿Boch'o laj yac'be sna', xchi'uc boch'o la svulesbe ta yo'nton? ¿Boch'o la xchanubtas ti lec tuc' xchapanvane? ¿Boch'o laj yac'be sna' c'u x'elan xu' chbijub? ¿Boch'o laj yac'be lec sbijil?

¹⁵ Li stuque xco'laj xchi'uc jts'uj ta vo' chil li jujun banamile; xco'laj xchi'uc jbej ta sat pucuc yalal chil. Li bic'tal banamil cacajtic ta nabe; xco'laj xchi'uc jbej ta sat yi' chil.

¹⁶ Li Libanoe mu sbalin ta si'il c'oc' chil; li chonbolometic tee mu xloc' o ta milbil matanal chil.

¹⁷ Scotol li jujun banamile mu'yuc stu ta stojol; mu'yuc c'usi bal ta stojol.

¹⁸ ¿Boch'o xu' chaco'oltsanic jech chac c'u cha'al li Diose? ¿C'usi sloc'obal ti xu' chaloc'taic ta Diose?

¹⁹ Li jpasloc'ometique ja' tspasic, lec bisbil c'u smuc'ul tspasic; ja' chpixic ta c'anal taq'uin ec li boch'o jech yabtelic oe; ja' tspasbeic scadenail ta saquil taq'uin.

²⁰ Yan li boch'o me'one ja' tst'uj lec te' ti mu sna' xjoch'ine, xchi'uc ja' tsa' li boch'o chanem xa lec ta spasele, yu'un jech lec tsinil chcom, jech mu xbalch'uj.

²¹ ¿Me yu'un mu xana'ic li vo'oxuque? ¿Me mu'yuc bu ava'yojic jutuc a'yej? ¿Me mu'yuc bu albiloxuc tal jutuc ta sliquebal? ¿Me mu'yuc ava'yojbeic tal smelol ta sliqueb banamil

²² ti te chotol ta toyol ta yac'ol banamil ta ven toyol li Diose, ti xco'laj xchi'uc jcot ta xc'ajben chil li cristianoetique? Li stuque ja' chlich' batel jech chac c'u cha'al poc' li vinajele; ja' chjilch'un batel jech chac c'u cha'al spoc'al carpana.

²³ Mu'yuc c'usi bal ta stojol li muc'tic viniquetique; xu' chac' ch'ayicuc o li jpasmantaletic ta banamile.

²⁴ Ja' jech chil jech chac c'u cha'al te' ti mu'yuc ts'unbilic oe, ti mu'yuc q'uexnacanbilic ta banamile, ti mu'yuc yac'oj o yibel ta banamil li xchumante'ile. Ja' no'ox c'alal chich'ic juch'tael yu'un Muc'ul Diose, chtaquijic o. Ja' jechic chac c'u cha'al c'ajben ti chcuchat batel ta sutub iq'ue.

²⁵ Ja' yu'un li Ch'ul Diose jech chal: “¿Boch'o chaco'oltsanic jech chac c'u cha'al vu'un? ¿Boch'o xico'laj jchi'uc chavilic?”, xi.

²⁶ Toyo muyel asatic ta vinajel, q'uelo avilic: ¿Boch'o la spas scotol li c'usitic te chvinaje? Li boch'o tspuc batel ta jujun li c'usitic spasoje, ja' chic'an ta sbi jujun noxtoc. Me junuc mu'yuc ch'ojol chc'ot yu'un, yu'un toj ech'em stsatsal, toj ech'em svu'el, yu'un ja' sventainoj scotol.

²⁷ Israel, smomnich'nabtac Jacob, ¿c'u yu'un ti jech chanopique: “Li Muc'ul Diose mu xil ti c'u x'elan oyune; li Dios cu'une mu sventauc li c'usi ta jpase?”, ti xachiique.

²⁸ ¿Me yu'un mu xana'ic, me mu'yuc ava'yojic? Li Dios ti te oy o sbatel osile, ja' li Muc'ul Diose, ja' la spas sbejel li banamile. Mu sna' x'ech' yo'nton, mu sna' slubtsaj. Mu'yuc boch'o xu' tstabe li sbijile.

²⁹ Ja' chac'be stsatsal li boch'o lubene; ja' chepajesbe stsatsal li boch'o mu'yuc c'usi xu' yu'une.

³⁰ Li queremetique sna' xlubic, sna' x'ech' yo'ntonic; li tsatsal viniquetique chlaj stsatsalic, chyalic ta lum.

³¹ Pero li boch'otic ja' spatoj yo'ntonic o ta stojol Muc'ul Diose ch-ach'ub lec stsatsalic, ta xlich'an lec xiq'uic jech chac c'u cha'al xic. Lec xu' yu'un ch-anilajic, mu xlubic. Lec xu' yu'un chanovic, mu x'ech' yo'ntonic o.