Isaías 4 - Bible in Tzotzil de Chenalhó with Deuterocanon

¹ C'alal me ic'ot sc'ac'alile, jayibuc xa no'ox viniquetic chcom; vucub antsetic chlic scontrain sbaic ta jun vinic, jech chalbeic: “Ac'anuc chquich'cutic li abie, ac'o me ta jventain jba jtuccutic; ta jmac ta jpix jba jtuccutic ta cabtelcutic. Ja' bal to xca'icutic me chmac jq'uexlalcutic avu'une”, xutic.

Ta to sta yorail chlecub yan velta li Jerusalene

² Me la sta yoraile, li Muc'ul Diose ta xac' q'uelumajuc li sts'unube. Li sq'uelume ja' slequilal, yutsilalic chc'ot li israeletic ti cuxajtic to chcomique. Li sat c'usitic chloc' yu'unique ja' yich'elic ta muc' chc'ot.

³ Li boch'otic cuxajtic chcom te ta Sione, li boch'otic t'ujbil chcomic yu'un Dios te ta Jerusalene, “ch'ul cristianoetic”, xi chlic albatuc sc'oplalic.

⁴ Yu'un chlic mesbaticuc loq'uel yu'un Muc'ul Dios xchopolilic li antsetic ta Sione; chpocbatic loq'uel li ch'ich' ti sbonoj sbaic oe; tsmes loq'uel scotol ta yic'al ye, ta svu'el stsatsal li Muc'ul Diose.

⁵ Scotol ti c'u smuc'ul vits Sione, xchi'uc scotol li boch'otic te tsobolique, ta smac lec ta toc ta c'ac'altic; ta smac lec ta xojobal c'oc' ta ac'ubaltic. Ta smac lec ta xojobal stuc li Muc'ul Diose.

⁶ Jech lec macalic ta yaxinaltic ta xc'uxul c'ac'al, lec chabibilic, lec macbilic c'alal chc'ot ta stojolic li tsatsal ic'al vo'e.