Isaías 39 - Bible in Tzotzil de Chenalhó with Deuterocanon

Li Ezequiase laj yic' li boch'otic tacbilic tal yu'un ajvalil ta Babiloniae

¹ C'alal ja'o jech ic'ot ta pasele, li ajvalil ta Babiloniae, ja' li Merodac-baladán xnich'on Baladane, la stac batel j'almantaletic yu'un ta stojol li ajvalil Ezequiase, yu'un laj ya'ay ti tsots itsacat ta chamele xchi'uc ti icol xae. Jech la stacbe tal carta, xchi'uc smoton.

² Li Ezequiase toj xcuxet no'ox yo'nton ti c'alal ic'otique. Laj yac'be yil scotol li sc'ulejale, ja' li saquil taq'uin, c'anal taq'uin, perfumeetic, lequil aceite, xchi'uc snail yabtejebtac, xchi'uc scotol li c'usitic te oye. Mu'yuc xa c'usi jchopuc te ta spasubmantal, xchi'uc c'u smuc'ul sventainoj ti muc xac' ta ilele.

³ Ja' yu'un li j'alc'op Isaiase jech bat sjac'be li ajvalil Ezequiase: —¿Bu liquemic tal li viniquetic le'e; c'usi laj yalbicot? —xut. Itac'ov li ajvalil Ezequiase: —Liquemic tal ta namal banamil ta Babilonia —xi.

⁴ Jech laj yal noxtoc: —¿C'usi laj yilic li' ta apasubmantale? —xi. Itac'ov li Ezequiase: —Laj yilic scotol li c'usitic te oye; mu'yuc xa c'usi ti mu'yuc laj cac'be yilic li' ta snail cu'une —xi.

⁵ Ja' yu'un li Isaiase jech laj yalbe li Ezequiase: —A'yo ava'ay c'usi chal li Muc'ul Dios ti ech'em svu'ele:

⁶ ‘Ta to sta yorail chich' ich'el batel ta Babilonia scotol li c'usi oy li' ta apasubmantale, xchi'uc scotol li c'usitic stsobojic tal ta vo'one xchi'uc c'alal to tana li amoltotaque. Mu'yuc c'usi ta scomtsanic o.

⁷ C'alal ta amomnich'nab ta xiq'uic batel, te ta xich'ic pasel ta capon; ta x'ochic ta mozoil te ta spasubmantal li ajvalile’, xi li Muc'ul Diose —xut.

⁸ Li Ezequiase jech la stac'be li Isaiase: —Li c'usi laj yal Muc'ul Diose toj lec; ja' jun c'uxubinel chca'ay —xi. Yu'un jech la snop ta yo'nton: “Ja' no'ox venta ti mu'yuc xa chquile jun xa no'ox co'nton ti jayib c'ac'al cuxulune”, xi.