Isaías 38 - Bible in Tzotzil de Chenalhó with Deuterocanon

Itsacat ta chamel Ezequías

¹ Ta yorail le'e ja'o itsacat ta tsatsal chamel li Ezequiase. Jech te ibat vu'lanatuc yu'un li j'alc'op Isaías xnich'on Amoze. Jech c'ot yalbe: —Jech chayalbot li Muc'ul Diose: ‘Taq'uio comel li avalab anich'nabe yu'un ta xacham, mu xa xacol’, xayutot —xut.

² Li Ezequiase ijoyij ta c'alna jech la sc'opan Dios chac li'i:

³ “Muc'ul Dios, avocoluc mu me xch'ay ta avo'nton ti jun co'nton laj quich'ot ta muq'ue, ti scotol co'nton la jpas c'usi chac'ane”, xut. Bats'i ep laj yoc'ta sba.

⁴ Ja' yu'un li Muc'ul Diose la sc'opan li Isaiase, jech laj yalbe:

⁵ “Batan, jech xbat avalbe li Ezequiase: ‘Li Muc'ul Dios, ja' li Dios yu'un amoltot Davide, jech chayalbot: Laj ca'ay li ac'ope; laj quil ti ep la'oq'ue. Ja' yu'un ta to jnatubtasbot batel vo'lajunebuc (15) jabil avorail.

⁶ Ta jcoltaot loq'uel ta sc'ob li ajvalil ta Asiriae xchi'uc ta jcolta li lum Jerusalene. Vu'un ta jchabi li lume, xi li Muc'ul Diose’, uto”, x'utat li Isaiase.

⁷ Li Isaiase jech laj yalbe li Ezequiase: —Ta sventa chana' ti ja' melel c'usi laj yal ta atojol li Muc'ul Diose, ja' yu'un chayac'bot senyail, jech chayalbot chac li'i:

⁸ ‘Q'uelavil vu'un ta xcac' sutuc lajuncojuc ta tec'ubal snac'ubal li c'usi sventa chil o jayib ora li Acaze’, xayutot —xi li Isaiase. Ja' yu'un isut yalel lajuncoj ta tec'ubal li snac'ubale.

⁹ C'alal icol li ajvalil Ezequiase, ja'o la sts'iba li q'ueoj jech chac li'i:

¹⁰ Jech la jnop: Ac'o me o'lol to x'ech' batel li coraile, persa chibat ta ch'en; smelol sjam no'ox ti jayib c'ac'al cuxulune.

¹¹ Jech la jnop ta co'nton: Mu'yuc xa bu chquil yan velta li' ta banamil li Muc'ul Diose; mu'yuc xa bu chquilbeic o sat li boch'otic cuxajtic li' ta banamile.

¹² J'ech'el chlaj sc'oplal o li jnae, ta sloq'uesic batel scotol; ja' jech chc'ot ta pasel jech chac c'u cha'al scarpana jun jchabichij. Li jcuxlejale ja' jech chac c'u cha'al jolobil ti c'alal chich' tuch'el loq'uel ta sjalubile; yu'un ta c'ac'al ta ac'ubal yantic chi'alub batel.

¹³ Xi'avet no'ox c'alal to tsacub osil; xco'laj xchi'uc ja' jech chac c'u cha'al jun león ti chixvoch'bun c'alal ta jbaquile, yu'un ta c'ac'al ta ac'ubal chavac'bun ep jvocol.

¹⁴ Xich'avch'un ta sc'anel vocol jech chac c'u cha'al xaval-eq'uen; xijuet ta oq'uel jech chac c'u cha'al stsumut. Ilubtsaj jsat ta sq'uelel muyel ta toyol. Muc'ul Dios, toj bats'i tsots chquich' vocol, coltaun me.

¹⁵ Pero ¿c'usi xu' chcal ti me jech la sc'an stuque? Ja' jech abul jba o ta scoj tsots jvocol ti jayib c'ac'al cuxulune.

¹⁶ Cajval, ta sventa scotol li c'usi lec chapase, jech cuxul li cristianoetique; ti c'u x'elan chcuxiique, ja' jech cuxulun ec. Muc'ul Dios, vo'ot laj acoltaun, vo'ot laj avac' to cuxicun.

¹⁷ Li bats'i tsots jvocol le' olon tale, ic'ataj xa ta jun co'nton. Vo'ot laj acoltaun ta sventa lajel; laj avac' ta apat ta axocon li jmule.

¹⁸ Yu'un li muquinale mu xayac'ot ta ich'el ta muc'; li lajele mu xayalbot alequilal; li boch'otic chyalic ta ch'ene mu'yuc ta yo'nton tsmalaic slequil stuq'uil avo'nton.

¹⁹ Ja' no'ox xu' chalic alequilal li boch'otic cuxajtique, jech chac c'u cha'al ta jpas li' ta orae. Li totiletique chalbe ya'yic xnich'nabic c'u x'elan li slequil yutsil avo'ntone.

²⁰ Li Muc'ul Diose ja' chiscoltaun, ja' yu'un ta jq'uejinta ta q'ueojetic, ta sonetic te ta xch'ulna ti jayib c'ac'al li' cuxulune, xi li q'ueoj la sts'iba Ezequiase.

²¹ Li Isaiase yaloj xa'ox mantal ti ac'o snoyic sat higoe, ac'o spac'beic ti bu c'a'em sbec'tal li Ezequiase, yu'un jech ac'o coluc.

²² Jech noxtoc li Ezequiase sjac'ojbe xa'ox Dios c'usi sq'uelubil xu' tsna' o me ta melel xu' chbat ta xch'ulna Muc'ul Diose.