Isaías 37 - Bible in Tzotzil de Chenalhó with Deuterocanon

Icol loq'uel ta sc'ob ajvalil Senaquerib li Judae

¹ C'alal laj ya'ay li ajvalil Ezequiase, la sli' sc'u', la slap c'u'il ti ch'ixlajan ta lapele; ibat ta xch'ulna Muc'ul Dios.

² La stac batel li Eliaquim, ja' li jchabina yu'une, xchi'uc li Sebna, ja' li boch'o tsts'iba ta vun c'usitic chc'ot ta pasele, xchi'uc li paleetic ti molic xae, yu'un ac'o bat sq'uelic li j'alc'op Isaías, xnich'on Amoze. Slapojic batel c'u'il ti ch'ixlajan ta lapele.

³ Jech laj yalbe batel: —Jech xc'ot avalbeic: ‘Jech laj yal tal li ajvalile: Li' ta orae ja' sc'ac'alil chquich'cutic ep vocol, ta jtoj jmulcutic, yalemuncutic o ta q'uexlal. Ja' jechuncutic jech chac c'u cha'al jun ants c'alal yu'un xa ta xcux ti solel mu'yuc stsatsal cha'ye.

⁴ Oy yic'al laj ya'ay Dios avu'un c'usi laj yal li yaj'abtel ajvalil ta Asiriae. Ja' tacbil tal sventa ay xchopolc'opta li cuxul Diose, laj yac' ta na'leel ta sventa li c'usitic laj yale. Oyuc c'uxi x'ac'bat stoj smul yu'un Muc'ul Dios ta sventa li c'usitic laj yale. C'opano Dios yu'un ac'o scolta li jchi'iltactic ti c'u to yepal li' comenique, xi li ajvalile’, utic c'otel —xut.

⁵ Jech ibatic li viniquetique; ja' jech c'ot yalbeic li Isaiase.

⁶ Li Isaiase jech laj yal: —Jech xc'ot avalbeic li ajvalile: ‘Jech laj yal li Muc'ul Diose: Mu xaxi' ta sventa c'usi laj yalic, c'u x'elan la xchopolc'optaicun li yaj'abteltac ajvalil ta Asiriae.

⁷ Vu'un jtuc oy c'usi ta jtacbe batel ta stojolic, oy c'usi ta xa'ay ta yo'ntonic, jech ta sutic batel ta yosilalic, te ta xc'ot cac' lajicuc ta milel, xi li Diose’, utic c'otel li ajvalile —xi li Isaiase.

⁸ Li banquilal yaj'abtel ajvalil ta Asiriae laj ya'ay ti loq'uem batel ta lum Laquis li ajvalil ta Asiriae, jech iloc' batel ta Jerusalén. C'alal ic'ote, te xa tspas pleito ta lum Libna c'ot sta.

⁹ Li ajvalil ta Asiriae laj ya'ay ti chtal tsacatuc ta pleito yu'un li Tirhaca ajvalil ta Etiopiae, jech la stac batel yaj'abteltac yan velta ta stojol li ajvalil Ezequiase. Jech laj yalbe batel ta carta:

¹⁰ “Ajvalil Ezequías ta Judá: Mu me xavac' aba ta lo'lael yu'un li Dios avu'un ti c'alal jech chayalbote: ‘Mu'yuc ta xcac'be ta sc'ob ajvalil ta Asiria li lum Jerusalene’, ti xayutote.

¹¹ Ava'yoj c'usi la spasbeic yantic banamiletic li ajvaliletic yu'un Asiriae; laj yulesic o. ¿Me yu'un vo'ot xa chacol avaloj ec?

¹² ¿Me oy icoltaatic yu'un diosetic yu'unic ec li yantic banamil ti laj yulesic jmoltotac ta vo'onee, ja' li lum Gozán, Harán, Resef, xchi'uc li yajvaltac Bet-edén ti te to'ox nacajtic ta Telasare?

¹³ ¿Bu oyic noxtoc li ajvaliletic ta Hamat, ta Arfad, ta Sefarvaim, ta Hena, xchi'uc ta Ivae?”, xut batel ta carta.

¹⁴ Li Ezequiase laj yich' li carta ti i'ac'bat yu'un li boch'otic tacbilic batele, la sq'uel. Imuy batel ta ch'ulna yu'un li Muc'ul Diose, c'ot xlich'an ta stojol Muc'ul Dios li cartae.

¹⁵ Lic sc'opan Dios jech laj yal:

¹⁶ “Muc'ul Dios, vo'ot ti ech'em avu'ele, vo'ot Diosot yu'un li Israele, vo'ot ti te nacalot ta o'lol yu'un li chib sloc'obal querubinetique, vo'ot no'ox atuc Diosot yu'un scotol li ajvaliletic ta banamile, vo'ot laj apas li vinajel banamile.

¹⁷ Muc'ul Dios, a'ibun li jc'ope; vic'o li asate, q'ueluncutic me. A'yo ava'ay scotol c'usi laj yal li ajvalil Senaquerib ti li' la stac tal yaj'abteltac ta sventa la xchopolc'optaot vo'ot li cuxul Diosote.

¹⁸ Muc'ul Dios, ta melel ivu' yu'unic la stsalic yantic lumetic xchi'uc c'alal ta yosilalic li ajvaliletic ta Asiriae.

¹⁹ La xchic'beic ta c'oc' li diosetic yu'unique, yu'un ma'uc ono'ox Dios ta melel, pasbil no'ox ta sc'ob cristiano, pasbil ta te' xchi'uc ta ton, ja' yu'un i'ul yu'unic.

²⁰ Ja' yu'un, Muc'ul Dios cu'un, coltauncutic loq'uel ta sc'ob, yu'un jech ac'o yotquinic scotol ajvaliletic ta banamil ti ta melel vo'ot no'ox atuc Muc'ul Diosote”, xut.

²¹ Li Isaías xnich'on Amoze jech laj yalbe batel li Ezequiase: “Jech chayalbot li Muc'ul Dios yu'un Israele: ‘Laj xa ca'ay li ac'op laj ac'opanun ta sventa li Senaquerib ajvalil ta Asiriae’, xi li Diose”, xut batel.

²² Li'i ja' sc'op Muc'ul Dios ta sventa li Senaquerib ajvalil ta Asiriae: “Senaquerib, li lum Sione ja' jech chac c'u cha'al jun tojol tseb ti stse'in no'ox ta atojole. Li Jerusalene sjimulan no'ox sjol chaslabanot ti c'alal chaloc' batele.

²³ ¿Boch'o ti lachopolc'opta ti yan xavich' xaval ta stojole? ¿Boch'o ti tsots la'avan ta stojol ti colajtic xa asat laj aq'uel batel ta atoyobbaile? ¡Ja' laj acontrain li Ch'ul Dios yu'un Israele!

²⁴ Ta sventa j'abteletic avu'un laj achopolc'opta li Cajvaltique. Jech laj anop: ‘Ta sventa epal caretaetic cu'un limuy tal ta jolvitsetic; limuy tal ti bu bats'i toyol li' ta Libanoe. La jts'etbe li ch'ut te'etic yu'unic ti lec natique xchi'uc li c'uc'tojetic yu'unic ti toj c'upilic sbae. Livul c'alal ta mero jolvitsetic yu'unic ti bats'i toyolique, xchi'uc livul c'alal ta toyolaltic yu'unic ti xco'laj xa xchi'uc ts'unubaltic yilele.

²⁵ Vu'un la joc' lec vo'etic; laj cuch'be ya'lel li yan banamile. Vu'un la jtaquijes ta teq'uel li uc'umetic te ta Egiptoe’, xachi.

²⁶ ¿Me mu xana' ti vu'un jnopoj ta vo'one jech chac le'e, ti vo'one ono'ox chapanbil cu'un jech chc'ot ta pasele? Li' ta orae laj xa cac' c'otuc ta pasel, ja' yu'un vo'ot laj ajines li lumetic ti setbilic lec ta coraltone; puru tonetic xa te busajtic icom avu'un.

²⁷ Li yajvaltaque mu'yuc xa stsatsalic; iyalic ta q'uexlal xchi'uc ta xi'el. Ja' xa jechic jech chac c'u cha'al ts'i'laletic, jech chac c'u cha'al yaxal vomoletic, jech chac c'u cha'al ts'i'lal chch'i ta ba na ti tsac-taquij ta q'uixin iq'ue.

²⁸ Vu'une xcotquin li c'usi oy ta avo'ntone; xcotquin bu cha'och, bu chaloc'; jna'oj ti tsots ilinemot ta jtojole.

²⁹ Ta sventa ti tsots liquem sc'ac'al avo'nton ta jtojole, xchi'uc ta sventa ti i'och ta jchiquin li atoyobbaile, ja' yu'un ta jtic'bot xotxot taq'uin ta ani'; ta xcac'bot sfrenoal ave, ja' te ta xcac' sutan batel ta be ti bu latale”, xi li Diose.

³⁰ Li Isaiase jech laj yalbe li Ezequiase: “Li c'usi chacalbot li'i, ja' senyail ta atojol ti ja' melel c'usi laj avich' albele: li jabil li'i xchi'uc le' ta xchibal jabile, vo'oxuc chave'ic li sat trigo ti te chch'i stuque. Yan ta yoxibal jabile, tsc'an xa chats'unic, chatsobbeic sat; tsc'an chats'unic ts'usubetic, jech te chalo'beic sat.

³¹ Li judaetic ti cuxajtic to chcomique ta xyal yisimic ta banamil, ta xac' satic ta toyol noxtoc.

³² Yu'un oy to cuxul chcomic te ta Jerusalén; oy to boch'o cuxul chcomic te ta vits Sión. Ti jech chc'ot ta pasele, ja' no'ox ta sventa slequil yo'nton Muc'ul Dios ti ech'em svu'ele.

³³ “Li Muc'ul Diose jech chal ta sventa li ajvalil ta Asiriae: ‘Li ajvalile mu'yuc bu ch-och ta Jerusalén; mu'yuc bu tst'iles batel jmojuc flecha. Mu'yuc bu chtal scontrain xchi'uc smaquic; mu'yuc bu tspas lec stec'ubic ta spat xocon.

³⁴ Ti bu beal itale ja' no'ox te ta sut batel; mu'yuc bu ch-och li' ta lum. Vu'un chcal jtuc, vu'un li Muc'ul Diosune.

³⁵ Vu'un ta jchabi li lum li'i, vu'un ta jcolta ta sventa ti lec jc'anoj li cajtunel Davide, xchi'uc ta sventa quich'el ta muc' ec li vu'une’, xi li Diose”, xi li Isaiase.

³⁶ Jech iloc' batel li yaj'almantal Muc'ul Diose, bat smil vo'ob slajunvinic (185,000) ta mil li asiriaetic te ta scarpanaique. C'alal iliquic ta yoc'omale, puru animaetic xa te telajtic.

³⁷ Ja' yu'un li Senaquerib ajvalil ta Asiriae, iloc' batel ta scarpana; isut batel ta Nínive, te inaqui.

³⁸ Ta yan c'ac'al, c'alal ja'o batem ta sna sdios, yu'un bat yich' ta muc' li sdios Nisroque, te ibatic li chib xnich'nabe, ja' li Adramelec xchi'uc Sarezere; te la smilic comel li stotique. Jech ijatovic batel ta yosilal Ararat; ja' i'och ta xq'uexol jun xnich'on Esarhadón sbi.