Isaías 36 - Bible in Tzotzil de Chenalhó with Deuterocanon

La stsal Judá li ajvalil Senaqueribe

¹ C'alal xchanlajunebal (14) jabil xa'ox yochel ta ajvalilal li Ezequiase, li Senaquerib ajvalil ta Asiriae ibat stsal scotol li lumetic te ta Judá ti lec setbilic ta tsatsal coraltone, jech i'och o ta sc'ob.

² Te ta lum Laquis la stac batel jun banquilal yaj'abtel li ajvalil Senaqueribe. La xchi'in batel ep yajsoldadotac, yu'un bat scontrainic li ajvalil Ezequías te ta Jerusalene. Te c'ot spas scarpanaic ta nopol sbevo'al tanque ta cajal ti bu xbat sbelal li banamil Chuc'unajebal sbie.

³ Te iloq'uic tal li Eliaquim xnich'on Hilcías, ja' li boch'o chchabibe spasubmantal ajvalil Ezequiase, xchi'uc li Sebna, ja' li boch'o tsts'iba ta vun c'usitic chc'ot ta pasele, xchi'uc li Joa xnich'on Asaf, ja' li yajts'ibajom ajvalile.

⁴ Li banquilal yaj'abtel Senaqueribe jech laj yalbe: —Jech xbat avalbeic li ajvalil Ezequiase: ‘Li muc'ta ajvalil ta Asiriae jech laj yal tal: ¿C'usi apatoj avo'nton chapoj aba o?

⁵ Chaval ti mu persauc lec chapalutic, ti mu persauc lec xu' cu'untic paspleitoe, pero altic. ¿Boch'o apatoj avo'nton yu'un ti jech chatoy aba ta jtojole?

⁶ Jna'oj ti ja' apatoj avo'nton yu'un li Egipto ti ja' jech chac c'u cha'al jbej aj voch'eme, ti ta x'och ta sc'ob sjepelil me oy boch'o choq'ui sba oe, toj jelovel ta jot. Ja' jech ta xc'ot li boch'o ja' spatoj yo'ntonic ta stojol li faraón ta Egiptoe.

⁷ Me jech chavalbicune: Ja' jpatoj co'ntoncutic yu'un li Muc'ul Dios cu'uncutique, me xachiique, ¿me mu ja'uc Ezequías la sjines li toyol c'opojebaletic xchi'uc li scajleb matanaletic ti bu to'ox laj avich'ic ta muc' li Dios avu'unique, xchi'uc ti laj yalbe Judá xchi'uc Jerusalén ti ja' no'ox te ac'o avich'ic ta muc' Dios ta scajleb smoton li' ta Jerusalene?

⁸ Ja' lec paso ta jmoj ava'yejic achi'uc li ajvalil cu'un ta Asiriae, chacac'boxuc cha'mil (2,000) ta cot ca'etic me vo'ot chasa'ic jech yepal li boch'otic xu' yu'un chcajiique.

⁹ Ac'o me jun no'ox yaj'abtel li ajvalil cu'un ta Asiriae, ac'o me ja' no'ox li boch'o mu'yuc tsots yabtele, mu xi' sutel avu'unic, ac'o me apatoj avo'ntonic yu'un li caretaetic ta Egipto xchi'uc li yajsoldadotac chcajiic ta ca'e.

¹⁰ ¿Me chanop ti muc ta sventauc Muc'ul Dios tal jlajes, tal jsoques li banamil li'i? Li Muc'ul Diose jech laj yalbun: Batan ta banamil le'e, bat soqueso, xiyutun’, uto —xi.

¹¹ Ja' yu'un li Eliaquim, Sebna, xchi'uc Joae jech laj yalbeic li banquilal yaj'abtel Senaqueribe: —Avocoluc, c'opanuncutic ta arameo c'op, yu'un xca'icutic noxtoc. Mu xac'opanuncutic ta hebreo c'op yu'un cha'yic scotol li jchi'iltaccutic li' oyic ta ba coraltone —xutic.

¹² Jech itac'ov: —Muc ja'uc no'ox tacbilun tal yu'un ajvalil ta Asiria ta aventa vo'oxuc xchi'uc ta sventa li ajvalil avu'unique. Tacbilun tal noxtoc ta sventa ac'o ya'yic scotol li achi'iltaquic te oyic ta ba coraltone. Yu'un acotolic ta xlic alo' atso'ic, ta xlic avuch' ac'abic —xut.

¹³ Jech lic sva'an sba lec; tsots i'avan, jech laj yal ta hebreo c'op: —A'yo ava'yic c'usi yaloj tal li muc'ta ajvalil ta Asiriae.

¹⁴ Jech yaloj: ‘Mu me xavac' abaic ta lo'lael yu'un li Ezequiase, yu'un mu xu' yu'un chascoltaoxuc loq'uel ta jc'ob.

¹⁵ Me chayalboxuc Ezequías ti ja' no'ox ac'o ach'unic ti chascoltaoxuc li Muc'ul Diose, me jech chayalboxuque: Ja' no'ox Muc'ul Dios chiscoltautic. Mu xijyac'utic ta sc'ob li ajvalil ta Asiriae, me xayutoxuque, mu me xach'unic.

¹⁶ Yu'un jech yaloj li ajvalil ta Asiriae: Jpastic ta co'ol co'ntontic, ac'o abaic ta jtojol, jech xu' chalo' atuquic li sat ats'usubique xchi'uc li sat higoetic avu'unique, xchi'uc jech chavuch' atuquic li vo' te ta ava'alique.

¹⁷ Ts'acal chaquic'oxuc batel ta jun banamil ti xco'laj xchi'uc avosilalique, ti lec xac' trigo xchi'uc ts'usube, jech xu' chata lec pan ave'ic, xchi'uc chata lec ya'lel ts'usub avuch'ic.

¹⁸ Mu me xach'unic lo'lael yu'un li Ezequías me jech chayalboxuque: Ja' Muc'ul Dios chiscoltautic, me xayutoxuque. Li sdiosic yantic banamile ¿me yu'un ivu' yu'un la scoltaic loq'uel ta sc'ob ajvalil ta Asiria li yosilalique?

¹⁹ ¿Bu oy li dios yu'un Hamat xchi'uc Arfade? ¿Bu oy noxtoc li dios yu'un Sefarvaime? ¿Me ivu' yu'unic la scoltaic loq'uel ta jc'ob li Samariae?

²⁰ Scotol li diosetic le'e ¿boch'o junucal ivu' yu'un la scoltaic loq'uel ta jc'ob li yosilalique? Ja' no'ox jech ec li Muc'ul Diose mu xu' yu'un tscolta loq'uel ta jc'ob li Jerusalene’, xi li ajvalile —xi li banquilal yaj'abtel ajvalil Senaqueribe.

²¹ C'alal laj ya'yique, muc staq'uic jbeluc, yu'un jech albilic yu'un ajvalil ti mu me staq'uique.

²² Ja' yu'un li Eliaquim xnich'on Hilcías ja' li jchabina yu'un ajvalile, xchi'uc li Sebna ti ja' tsts'iba ta vun c'usitic chc'ot ta pasele, xchi'uc li Joa xnich'on Asaf xchi'il ta abtel ajvalile ibat yalbeic ajvalil Ezequías scotol c'usi laj yal li banquilal yaj'abtel Senaqueribe. Sli'ojic xa batel sc'u'ic.