Isaías 35 - Bible in Tzotzil de Chenalhó with Deuterocanon

Ta to sta yorail tsutic batel ta lum Jerusalén li yu'untac Diose

¹ Cuxetuc no'ox yo'nton li taqui-xocol banamile ti mu'yuc c'usi xch'i o tee; cuxetuc no'ox yo'nton yu'un ta xlic nichinuc jech chac c'u cha'al nichimaltic.

² Ta xac' lec xnich jech chac c'u cha'al lirio nichim ta yaxaltic; cuxetuc no'ox yo'nton, tse'inuc no'ox, yu'un jech yutsil ta xich' ac'bel jech chac c'u cha'al Líbano, jech st'ujumal chc'ot jech chac c'u cha'al vits Carmelo xchi'uc stenlejtic Sarón. Ta to xilbe yutsilal slequilal li Muc'ul Diose, ja' li Dios cu'untique.

³ Tsatsubtasic li boch'o lubenique; va'anbeic lec yacan li boch'o aluben yacanique.

⁴ Jech xavalbeic li boch'o ep xi'el cha'yique: “Tsatsubtaso avo'ntonic, mu xaxi'ic; q'uelavil li Dios cu'untique ta xtal scoltaoxuc, ta xtal xchi'uc spacol, xchi'uc stojol li avajcontraique”, utic.

⁵ Jech ta xlic jamuc satic li ma'satetique; ta xlic jamuc xchiquinic li coquetique.

⁶ Li coxoetique xbitubajic no'ox liquel jech chac c'u cha'al te'tical chij; xcuxet no'ox yo'nton tsots chlic q'uejinicuc li uma'etique. Xchi'uc ta xlic loc'anuc ya'lel li taqui-xocol banamile; ta xlic xanoanuc ya'lel li sbajbajiltaque.

⁷ Ti bu solel taquin ono'oxe ta xc'ataj ta sts'anleb vo'; ti bu t'ajemic ta scoj staquinale ta xc'ataj ta loq'ueb vo'; ti bu pasem ta sna oq'uiletic to'oxe, ta xc'ataj ta ajtic, ta tutilaltic.

⁸ Ta xlic yich' jamel lec be te ta yut, ja' “ch'ul be” sbi chc'ot. Li boch'otic oy yi'lalique mu xu' chjelovic te; mu xu' chanovic te li boch'otic bol yo'ntonique.

⁹ Me jcotuc león mu xbat te; me jcotuc jti'val chonbolometic mu xnopajic batel, yu'un li be le'e ja' sbeic li boch'otic chpojatic sutel tale.

¹⁰ Li boch'otic coltabilic yu'un Muc'ul Diose ta sutic tal; xla'etic no'ox ta q'ueoj chvul ochicuc ta Sión. Sbatel osil tse'ej lo'ilic no'ox ta xcuxetel yo'ntonic; ta xnamaj batel scotol li at-o'ntone xchi'uc li c'usitic c'uxe.