Isaías 34 - Bible in Tzotzil de Chenalhó with Deuterocanon

Ch-ac'bat stoj smul yu'un Dios li Edome

¹ Nopajanic tal jujun banamil, la' a'yo ava'yic; jujun lum, la'ic, tuc'ulano lec ava'yic; ac'o ya'ay sbejel li banamile xchi'uc li c'usitic te ch'iemique.

² Yu'un li Muc'ul Diose ilinem ta stojol li jujun banamile; liquem sc'ac'al yo'nton ta stojol scotol li yajsoldadoique; chapal xa yu'un ti ta xules ta milel scotole.

³ Li sbec'talique te no'ox telajtic chcomic, te chlic tuibanuc; li xch'ich'alique chat'es scotol li ts'i'laletique.

⁴ Scotol li c'usitic oy ta vinajele ta xlic ulanuc. Li vinajele ta sbal sba jech chac c'u cha'al balbil vun; ta xbajan yalel tal scotol li c'usitic te oye, jech chac c'u cha'al chlilij taqui c'ob ts'usub, jech chac c'u cha'al chlilij yanal higo ti c'alal chc'anube.

⁵ Li yespada Muc'ul Diose chapal xa te ta vinajel; q'uelavilic ja' te chyal batel ta stojol li Edome, ja' li jun lum ti chapanbil xa chich' ulesel oe.

⁶ Li yespada Muc'ul Diose chpix ta ch'ich' xchi'uc ta xepu, jech chac c'u cha'al xch'ich'al ch'ium chij xchi'uc tentsunetic, jech chac c'u cha'al xepual srinyon tot chij c'alal chich'ic milel sventa matanale. Yu'un li Muc'ul Diose xco'laj xchi'uc chac' ep milbil matanal te ta Bosra, yu'un bats'i ep tsmil li edometique.

⁷ Ta xyalic ta lum jech chac c'u cha'al chich' milel te'tical vacaxetic, bic'tal vacaxetic, xchi'uc muc'tic tot vacaxetique. Li yosilalique ta xnoj ta ch'ich'; li pucuctique ta spat sba ta xepu.

⁸ Yu'un ja' sc'ac'alil yu'un Muc'ul Dios tspacbe sutel li Edome, ja' yabilal ch-ac'bat stoj c'usi la spasbe li lum Sione.

⁹ Li bevo'etic yu'unique ta xc'ataj ta xuch'; li pucuctique ta xc'ataj ta azufre; li yosilalique ta stsan jech chac c'u cha'al xuch'.

¹⁰ Ta c'ac'al ta ac'ubal mu xtu'p o; sbatel osil te chloc' o xch'ayilal. Jayc'oluc cristianoetic chjelov, mu xa x'ayin o yajval yan velta; sbatel osil mu'yuc boch'o te chjelov o.

¹¹ Ja' xa te chtal naquiicuc scotol li mutetique, ja' li xoch'e, li xcuje, xchi'uc li curutsuquetique; te chtal naquiicuc noxtoc li jojetique. Yu'un li Muc'ul Diose j'ech'el tsc'atajes o ta xocol banamil; j'ech'el tsyavnaijes o.

¹² Mu'yuc xa chich' alel boch'o ajvalil yu'unic; mu'yuc xa jpasmantaletic yu'unic o.

¹³ Li spasubmantal ajvalil yu'unique ta xch'i puru ch'ixetic; ta tsatsal coraltonetic yu'unique ta xch'i puru chopol ch'ixetic. Ja' xa sna oq'uiletic chc'ot; ja' xa xpaxajeb xchi'uc yalab avestruz mutetic ta xc'ot.

¹⁴ Li jti'val bolometique co'ol te chtal naquiicuc xchi'uc li oq'uiletique; li te'tical me' tentsunetique chlic yapta sbaic tal. Te chtal naquiicuc noxtoc li xcujetique; ja' xcuxubil yo'ntonic chc'ot.

¹⁵ Li curutsuquetique te chtal spas stasic; te chtoninic, te chvoc'an yolic; te tstsobic ta yolon xiq'uic li yolique. Jech noxtoc te chtal stsob sbaic li xulemetique; jcot stot, jcot sme' chic'an sbaic.

¹⁶ Q'uelbo avilic ta svunal yu'un li Muc'ul Diose, jech chal: Me jcotuc mu'yuc ch'ojol chc'ot li c'usitic laj yich' alele, xchi'uc mu'yuc ch'ojol chc'ot me jcotuc sme', yu'un ja' iloc' ta ye stuc li Muc'ul Diose; ja' stuc ta xjuch'ta tal ta yic'al ye scotol.

¹⁷ Ja' stuc chac'be yil yavilic ta jujucot; ta sc'ob stuc tsbisbe, tsvoc'anbe li banamile. J'ech'el ja' chu'uninic o; te chnaquiic o ti jayc'ol cristianoetic chjelovic li' ta banamile.