Isaías 33 - Bible in Tzotzil de Chenalhó with Deuterocanon

Tsta yorail tscolta yu'untac li Muc'ul Diose

¹ Toj abul aba, vo'ot li j'elec'ot ti mu'yuc c'usi elc'anbilot eq'ue, vo'ot ti ep c'usi apojoj batel ti mu'yuc c'usi pojbilot eq'ue. C'alal me ilaj avo'nton ta spojel batel scotol li c'usitic oye, ja'o chavich'be spacol ec.

² Muc'ul Dios, c'uxubinuncutic me li vu'uncutique, yu'un vo'ot no'ox jmalaojotcutic. Vo'ot me xavicouncutic ta ac'ob ta jujun c'ac'al. Vo'ot me c'otan ta jcoltavanej cu'uncutic ti c'alal yorail oy jvocolcutique.

³ Li cristianoetic ta jujun lume chjatovic batel ta anil c'alal cha'yic ti xco'laj xchi'uc chauc cht'om tal li ac'ope. Li cristianoetic ta jujun banamile tspuc sbaic batel ta anil ti c'alal chatots li vo'ote.

⁴ Li c'usitic spojojique chich'ic tsobbel scotol jech chac c'u cha'al epal c'ulubetic ti chtal slajesic scotole; ja' jech chvul ta stojolic jech chac c'u cha'al xc'ajben ti talbat no'ox xvil ta jujujote.

⁵ Ich'bil ta muc' li Muc'ul Diose yu'un te nacal ta toyol, yu'un ja' tsnojes ta c'usitic lec, ta c'usitic tuc' li Sione.

⁶ J'ech'el tsnacan o lec li lume; chac'be lec sbijil, tsjambe lec sat li steclumale. Ja' sc'ulejalic chc'ot ti chich'ic ta muc' Muc'ul Diose.

⁷ A'yo ava'ay c'u x'elan ch-avanic ta xoraltic li boch'o tsots yo'ntonique, xchi'uc c'u x'elan ep ch-oq'uic li boch'o tacbilic tal ta spajesel c'ope.

⁸ Solel isoc o ta jyalel li bebetique; mu'yuc xa boch'o chanov o. Laj xa soquesic li c'usi chapanbil yu'unique xchi'uc li c'usi yalojbe sbaique; mu'yuc xa boch'o chich' sba o ta muc' yu'unic.

⁹ I'och xchamel, xchi'uc ep at-o'nton cha'ay li banamile; iyal ta q'uexlal li Libanoe, itaquij xa o. Li stenlejaltic Sarone icom jech chac c'u cha'al xocol banamil; li Basán xchi'uc vits Carmeloe it'anbujic ta jyalel.

¹⁰ Li Muc'ul Diose jech chal: “Li' ta orae ta xa xitots; ta xcac' ta ilel ti toj muc'une, ti bats'i toyol oyune.

¹¹ Li vo'oxuque puru c'ajben, puru jobel no'ox li avabtelique; ta yic'al que no'ox ta jchic' jech chac c'u cha'al c'oc'.

¹² Li cristianoetic ta jujun lume ja' jech chcomic jech chac c'u cha'al tanil c'oc'; ja' jech chc'aq'uic jech chac c'u cha'al taqui ch'ix ti bojbil xae.

¹³ Vo'oxuc ti nomtic oyoxuque a'yo ava'yic li c'usi la jpase; vo'oxuc ti nopol oyoxuque otquinic lec c'u x'elan li jvu'el jtsatsale”, xi.

¹⁴ Li jpasmuliletic te ta Sione ta xniquic; li boch'otic chopolique ep xi'el cha'yic, jech chalic: “¿Boch'o xu' yu'un chnaqui te ta c'oc' ti chijc'ac' yu'une? ¿Boch'o xcuch yu'un li natiquil yat c'oc' sbatel osile?”, xiic.

¹⁵ Li boch'o ja' tspas c'usi tuc', c'usi melele, li boch'o mu'yuc ta yo'nton tspas canal ta sventa lo'lavaneje, li boch'o mu xchon sba ta matanale, li boch'o mu xich' ta muc' ti c'alal ch-albat milvaneje, xchi'uc li boch'o tsmac sat ta sventa li c'usitic chopole,

¹⁶ le'e ja' jun yo'nton chcuxi; ja' snac'ubbail chc'ot li muc'tic tsatsal tone. Oy lec sve'el, xchi'uc oy lec vo' yuch'; mu'yuc c'usi sc'an cha'ay o.

¹⁷ Chlic avilic yan velta xchi'uc yutsilal li Ajvalile, xchi'uc chavilic chmuq'uib batel li avosilalique.

¹⁸ C'alal cht'ab ta avo'ntonic ti abul to'ox abaic ta xi'ele, jech chlic avalic: “¿Bu oy li j'atoletic to'oxe? ¿Bu oy li boch'otic oy to'ox to'ox c'usi tsbisique? ¿Bu oy li boch'o tsq'uelic to'ox c'u yepal li toyol q'uelub osile?”, xachiic.

¹⁹ Yu'un muc xa teuc nacaloxuc ta slumal li jtoybaetic, ti toj vocol ta a'ibel sc'opique, ti toj chucul ta alel li sc'opique, ti mu a'ibaj smelole.

²⁰ Q'uelavil li Sione, ja' li lum ti bu ono'ox ta jpastic q'uinetic cu'untique. Ac'o batel asat te ta lum Jerusalene, ja' li lum ti jun co'ntontic tee, ja' jun lum ti mu xa stac' jinesele, ti mu stac' bulbel jbejuc ste'eltaque, ti mu stac' tuch'bel jbejuc yaq'uile.

²¹ Yu'un ja' tsventainutic o ta stsatsal stuc li Muc'ul Diose. Ja' jech chc'ot jech chac c'u cha'al uc'um, jech chac c'u cha'al stsatsal nab ti toj muq'ue, ti mu xu' yu'un chjelov tal li barcoe; ac'o me toj lec xu' yu'unic li yajval muc'tic barcoe, pero mu xtuch' yu'unic.

^22-23 Ja' ta xlic yochanuc li yaq'uiltac barcoe; mu'yuc tsinil chcom li sjoc'leb spoc'ale, jech mu xu' chich' lich'anbel lec li spoc'ale. Vu'utic ta xquich'betic li c'usitic oy yu'unique; c'alal ta ma'sat xu' tsta, c'alal ta coxoetic xu' tspoj. Yu'un ja' jchapanvanej cu'untic stuc li Muc'ul Diose; ja' tspas mantal stuc, ja' muc'ul ajvalil cu'untic; ja' stuc chiscoltautic.

²⁴ Mu jbejuc ta na jech chal: “Toj ipun”, mu'yuc xi, yu'un tspasbatic perdón yu'un smulic scotol li jnaclumetic ta Sione.