Isaías 32 - Bible in Tzotzil de Chenalhó with Deuterocanon

Ta to xtal jun Ajvalil lec tuc' chchapanvan

¹ Ta to xlic jun ajvalil lec tuc' tspas mantal, xchi'uc ta xlic yantic jpasmantaletic lec tuc' chchapanvanic.

² Le'e ja' jech chc'otic jech chac c'u cha'al jpojubbailtic ta tsatsal ic', ja' jech chac c'u cha'al jnac'ubbailtic c'alal chtal tsots ic'al vo', ja' jech chac c'u cha'al jun bevo' ti chat'es lec taqui banamile, ja' jech chac c'u cha'al xyaxinal muc'ta ch'en ta xc'uxul c'ac'al ta q'uixin osil.

³ Lec viq'uil sat tsq'uelic li c'usi ch-ac'bat yilique; lec ch'anxi cha'ibeic sc'opic ec li boch'otic cha'yique.

⁴ Li boch'otic bol to'ox yo'ntonique chlic sna'ic c'usi lec ta pasel; li boch'o jeche' to'ox x'umlajet chc'opojique chlic sabajuc lec yeic ta lo'il; lec xbejlajet chlic lo'ilajicuc.

⁵ “Ajvalil” mu xa xuticuc li bol vinique; muc xa muc'uc yabtel cha'yic li boch'o mu xich'beic smelole.

⁶ Yu'un li boch'o bole ja' no'ox chal li sbolile; puru chopol c'usi chchapan ta yut yo'nton. Ja' no'ox tsnop tspas li c'usi chopole, xchi'uc ti chchopolc'opoj ta stojol Muc'ul Diose. Jeche' xmeymun sc'ob tsut yu'un li boch'o chlaj ta vi'nale; tsjalanbe vo' yuch' li boch'o taquin yo'ntone.

⁷ Li boch'o toj manya c'u x'elan chlo'lavane, puru chopol yabtel, ja' no'ox oy ta yo'nton ch-uts'intavan; ta puru epalc'op chuts'inta li boch'o abul no'ox sbaique xchi'uc li boch'o oy svocolic ti tsc'anic lec chapanele.

⁸ Yan li boch'o lec yo'ntone ja' no'ox tsnop c'usitic lec tspas; ta sventa ti lec c'usitic tsnope jun yo'nton o.

Sc'oplal jtoyba antsetic ta Jerusalén

⁹ Antsetic, vo'oxuc ti mu'yuc c'usi xtal ta avo'ntonique, va'lanic, a'yic c'usi ta xcal. Tsebetic, vo'oxuc ti xpatet no'ox avo'nton chava'yique, a'yic li mantal chacalboxuque.

¹⁰ Li' ta orae mu'yuc c'usi chal avo'ntonic, pero le' ta jayibuc c'ac'al, le' ta jun jabil batele, ta xlic nicanic, yu'un ta xlaj sc'oplal ti chich' spits'el ya'lel sat ts'usube; mu'yuc xa c'usi chloc' o avu'unic.

¹¹ Xi'anic vo'oxuc ti mu c'usi xtal ta avo'ntonique; vo'oxuc ti jun no'ox avo'nton chava'yique, nicanic me ta xi'el. Loq'ueso li ac'u' apoq'uique; ja' lapic li c'u'il ti ch'ixlajan ta lapele.

¹² Majilano sna avo'ntonic ta scoj ti toj abul sba chava'yic li avosilic ti toj lequique, xchi'uc ta sventa li lequil ts'usubtic avu'unique.

¹³ Yu'un puru ch'ixetic, puru jchop ta ch'ix chlic ch'iuc te ta avosilalic, xchi'uc te ta naetic, xchi'uc te ta lum ti bu mu c'usi xtal ta yo'ntonique, ti xcuxet no'ox yo'nton cha'yique.

¹⁴ Yu'un mu'yuc yajval chcom o li spasubmantal ajvalile; li lum ti solel nojem yajvale xocol chcom o; li toyol q'uelub osil, xchi'uc li tsatsal coraltonetique chcom o ta nailch'en sbatel osil. Ja' snaic chc'ot li te'tical buroetique; ja' sve'ubic chc'ot li chijetique.

¹⁵ Pero me la sta yorail ital ta jtojoltic smuc'ul stsatsal li Boch'o oy ta toyole ta xlic c'atajuc ta ts'unubaltic li xocol banamile; li ts'unubaltic ti lec ono'oxe yantic ta xlecub.

¹⁶ Li c'usi tuq'ue xchi'uc li tuq'uil chapanele ta xnoj ta scotol li cosilaltique.

¹⁷ Li tuq'uil chapanele chlamaj c'op yu'un; li lequil coltaele chac' jun co'ntontic, mu'yuc c'op-o'nton chca'itic o yu'un.

¹⁸ Li jchi'iltactique jun yo'nton chlic naquiicuc; jun yo'nton chnaquiic ta snaic; jun yo'nton te oyic o ta yavilic.

¹⁹ Ac'o me ch-ul ta bot li muc'tic te'e, ac'o me lilijem chcom li jlumale,

²⁰ pero li vo'oxuque xcuxet no'ox avo'ntonic. Oy lec vo' sventa chavat'es li ats'unub avovolique, xchi'uc oy lec sve'el li avacaxic xchi'uc li aburoique.