Isaías 31 - Bible in Tzotzil de Chenalhó with Deuterocanon

Chopol i'ilatic yu'un Dios li israeletic ti la sc'anic coltael yu'un Egiptoe

¹ Toj abul sba li boch'otic chbat sc'anic coltael ta Egiptoe, ti ja' spatoj yo'ntonic yu'un li ca'etique, ti ja' spatoj yo'ntonic yu'un li epal caretaetique xchi'uc li epal soldadoetic ti lec sna' xcajiic ta ca'e. Yu'un muc ja'uc laj yac' batel satic ta stojol li Ch'ul Dios yu'un Israele; muc ja'uc la sa'ic li Muc'ul Diose.

² Pero li stuque oy lec sbijil, xu' yu'un chac' tsots vocol; mu sna' sutes sc'op. Ja' chlic scontrain li chopol cristianoetique xchi'uc li boch'otic tscoltaic boch'otic chopol c'usi tspasique.

³ Li egiptoetique cristianoetic no'ox, ma'uc diosetic; li ca'etic yu'unique oy sbec'talic, muc ta ic'uc chanovic. C'alal ta sye' sc'ob li Muc'ul Diose, ta xyalic ta lum li jcoltavanejetique xchi'uc li boch'otic chich'ic coltaele; scotolic ta xch'ayic o batel ta jun no'ox velta.

⁴ Li Muc'ul Diose jech laj yalbun chac li'i: “Jech chac c'u cha'al león xchi'uc yalab ti xlaquet no'ox c'alal me smilojic jcot chije, ac'o me tstsob sbaic li jchabichijetique, ac'o me x'avlajetic no'ox tsibtasic batel yalojic, pero mu xi' yu'unic. Ja' jech li Muc'ul Dios ti ech'em stsatsale, chyal tal, chtal scolta ta pleito li yu'untac te ta vits Sione.

⁵ Jech chac c'u cha'al mut ti te xvilet ta stas chchabi yole, ja' jech chchabi lum Jerusalén li Muc'ul Dios ti ech'em stsatsale, ta xchabi lec, ta spoj, ta scolta.

⁶ Israeletic, sutanic ta stojol li boch'o toj ep jelovenoxuc ta stojole.

⁷ Li c'usi c'ac'alil chajipic loq'uel ta atojolic li sloc'obal adiosic pasbil ta c'anal taq'uin, ta saquil taq'uin, ti laj apas ta ac'obic jech laj ata o amulique,

⁸ ja'o yorail chchamic ta espada li asiriaetique, pero muc ta svu'eluc jun cristiano, ma'uc ta yespada boch'o sna' xcham. Ta xjatovic batel ta scoj li espadae; li querem soldadoetic yu'unique ta xcom ta amozoic.

⁹ Ta scoj xi'el chjatov loq'uel ta anil li ajvalil yu'une; li banquilaletic yu'unique ta sme'xi'elalic tscomtsanic ta anil li sbanderaique”, xi li Muc'ul Dios ti oy c'oc' yu'un te ta Sione, ti oy horno yu'un te ta Jerusalene.