Isaías 30 - Bible in Tzotzil de Chenalhó with Deuterocanon

Chopol i'ilatic yu'un Dios li boch'otic ja' spatoj yo'ntonic ta stojol Egiptoe

¹ Li Muc'ul Diose jech chal: “Toj abul sbaic li jtoyba cristianoetique; oy c'usi chchapan ta yo'nton stuquic. Muc vu'cun chisjac'bicun ba'yuc; stuquic chchapanic, pero muc vu'cun laj cac'be sna'ic, jech ja' no'ox yochel stsobel ep li smulique.

² Ta anil no'ox chbatic ta Egipto, mu'yuc c'usi chisjac'bicun o li vu'une; ja' chbat sc'anic coltael ta stojol li Faraone, ja' tsmac sbaic o ta xyaxinal li Egiptoe.

³ Pero li stsatsal Faraone ta xc'ataj ta xq'uexlalic; li xyaxinal Egiptoe ja' sbic'tajesbilic chc'ot.

⁴ Ac'o me laj ataquic batel banquilaletic avu'unic ta Zoán, ac'o me laj ataquic batel aviniquic ta Hanes,

⁵ scotolic chyalic ta q'uexlal ta scoj li jun muc'ta lum le'e, ti mu'yuc stue, ti mu xcoltavan me jutuque, ti mu'yuc c'usi tstaic o yu'une. Ja' no'ox sventa chac' sbaic o ta q'uexlal, ja' no'ox sventa tsta svocolic o”, xi li Muc'ul Diose.

⁶ Laj yich' albel sc'oplal li chonbolometic ta Néguev: Li boch'otic chbatic ta Egipto, ja' li jun lum ti mu'yuc stu oe, ti te chich'ic batel ta buroetic li sc'ulejalique, ti chich'ic batel ta camelloetic li matanaletic yu'unique, te chjelovic batel ta banamil ti bu toj ep vocol, ti nojem ta c'usitic xi'balic sbae, ti ja' yavil leonetic, xchi'uc li jti'val chonetic, xchi'uc li dragón ti sna' xvile.

⁷ Ta melel li Egiptoe mu'yuc c'usi xu' yu'un, mu xu' yu'un chcoltavan, ja' yu'un jech sbi cu'un chac li'i: “Muc'ta chon ti mu'yuc c'usi xu' yu'une”, xi sbi.

⁸ Batan me ta ora, bat ts'ibao ta junuc pech'pech' te' li c'usi chacalbot li'i, xchi'uc ts'ibao lec comel ta vun, yu'un te ac'o comuc o sventa chtun ta ts'acal, sventa chich' na'bel o sc'oplal sbatel osil.

⁹ Yu'un li jun lum Israel le'e, solel jbajmantaletic, jtoybaetic, j'epalc'opetic; mu sc'an xch'unbeic smantaltac li Muc'ul Diose.

¹⁰ Jech chalbeic li boch'otic oy c'usi ch-ac'bat yilic yu'un Diose: “Mu xa me c'usi xaq'uelic tal”, xutic. Jech chalbeic li j'alc'opetique: “Mu xa me xavalbuncutic li c'usi tuq'ue; ja' no'ox albuncutic li c'usi toj lequic ta a'yele; ja' no'ox albuncutic li c'usi lec c'usi c'upil sba ta a'yele.

¹¹ Mu me xamacuncutic ta be; jambun li jbecutique; mu xavic'uncutic batel ta stojol li Ch'ul Dios yu'un Israele”, xutic.

¹² Ja' yu'un, li Ch'ul Dios yu'un Israele jech chal: “Li vo'oxuque chabajic li taq'uiel li'i. Ja' chac'anic li sa'c'ope xchi'uc li puru lo'lavaneje; ja' te apatoj o avo'ntonic yu'un.

¹³ Ja' yu'un oy amulic li vo'oxuque. Ja' jech c'otemoxuc jech chac c'u cha'al toyol coralton ti jatem yalele, ti xi'bal xa sba xvuq'ue.

¹⁴ Ja' jech chac'otic jech chac c'u cha'al bin patbil ta lum ti chvoq'ue, ti solel biq'uitic chlilije, ti mu'yuc xa stu o li svoc'oliltaque, me ja'uc ta xlechubil ac'al, o me ja'uc slupubil vo' ta joc'”, xi li Diose.

¹⁵ Li Cajvaltique, ja' li Ch'ul Dios yu'un Israele, jech chal: “Sutanic tal, paso ta jun avo'ntonic, jech chacolic; me jun avo'ntonic, me ja' chapat avo'ntonic ta jtojole, ja' atsatsalic chc'ot”, xayutoxuc. Pero muc xach'unic.

¹⁶ Jech laj avalic: “Mo'oj, ja' lec chijatovcutic batel ta anil ta ca'etic”, xachiic. Lec oy, ta ono'ox xajatovic batel. Jech laj avalic noxtoc: “Chicajicutic batel ta caretaetic ti lec anil xanovique”, xachiic. Jechuc, pero li avajcontraic chasnutsoxuc batele, ja' ech'em xu' yu'unic.

¹⁷ Ta jun no'ox vinic chajatovic batel jmil; ta vo'ob vinic chajatovic batel acotolic, ja' to me mu'yuc xa ep lacomique, ja' to me jech lacomic jech chac c'u cha'al unin jbej te' va'al ta jolvitse, o jech chac c'u cha'al jlic bandera te xvilvun ta jolvitse.

Laj yich' albel sc'oplal ti chich' to c'uxubinel li Israele

¹⁸ Pero li Muc'ul Diose chasmalaoxuc, yu'un tsc'an chaxc'uxubinoxuc. Li stuque oy ta yo'nton chac' avilic ti sc'anojoxuque, yu'un li Muc'ul Diose ja' Dios ti tuc' yo'ntone. Xcuxet no'ox yo'ntonic li boch'otic ja' no'ox tspat yo'ntonic o ta stojole.

¹⁹ Yajvaltac Sión, vo'oxuc ti te nacaloxuc ta Jerusalene, mu'yuc xa bu cha'oq'uic o. Li Muc'ul Diose chac'uxubajic ta yo'nton. C'alal cha'ay ti xa'avetic ta sc'anel coltaele, ta stac'boxuc ta ora li ac'opique.

²⁰ Ac'o me ja' to'ox ave'el avuch'umic ic'ot yu'un li vocol, li at-o'ntone, pero ta sventa ti ja' jchanubtasvanej avu'unique mu'yuc bu tsnac' sba ta atojolic; ta ono'ox xavil lec ta asatic.

²¹ Me oy chach'ay ta be ta bats'ic'ob o ta ts'etc'obe, ta ora chava'yic oy boch'o chasc'opanoxuc ta apatic, jech chayalboxuc: “Li' xabatique, ja' li' li lequil bee”, xayutoxuc.

²² Jech chlic abajic o li sloc'obal adiosic apasojic ta saquil taq'uine xchi'uc li bic'tal loc'ometic apasojic ta c'anal taq'uine; chajipic o batel jech chac c'u cha'al li c'usi toj i'lal sbae.

²³ Li Muc'ul Diose chayac'boxuc tal lec vo' ta sventa li c'usitic chats'unic ta avosilique. Li trigo chloc' te ta banamile toj lequic, lec chapal chataic yu'un scotol. C'alal me la sta yorail le'e, lec muc' yosilal bu chve' li ats'unub avovolique.

²⁴ Li j'abtel vacaxetic xchi'uc li buroetic ti tsloc avosilique ja' tsve'ic ec li lequil jobeletic ti ac'bil lec yats'amile.

²⁵ C'alal tsta yorail li muc'ta milbaile, chlic loc'anuc ya'lel, chlic ayinuc uc'umetic ti bu muc'tic toyol vitsetique xchi'uc li stselejtique.

²⁶ C'alal tsta yorail chlic xpoxtabe, chlic xpixbe syayijemalic steclumal li Muc'ul Diose, li ue chlic yac' xojobal jech chac c'u cha'al c'ac'al; li c'ac'ale vucub velta tsots chac' xojobal jech chac c'u cha'al xojobal ta vucbej c'ac'al.

Ch-ac'bat stoj smul li Asiriae

²⁷ Q'uelavilic, le' xa xtal stuc li Muc'ul Diose. Tsanem tal yilel li sate; bats'i ic'uben no'ox xch'ayilal. Li yee nojem tal ta sc'ac'al yo'nton; li yoq'ue ja' jech chac c'u cha'al c'oc' ti chchic'vane.

²⁸ Li yic'al yee ja' jech chac c'u cha'al nojelal uc'um ti chc'ot c'alal ta jnuc'tique; ja' sventa tsmesbe o batel yajval li jujusep banamile, yu'un ac'o yavnaijicuc o; chac'be sfreno noxtoc li bic'tal lumetique, yu'un jech xu' chac' ch'ayicuc batel ta be.

²⁹ Pero li vo'oxuque jun avo'nton xala'etic ta q'ueoj jech chac c'u cha'al ta yac'ubalil q'uin avu'unique; xcuxet no'ox avo'ntonic, jech chac c'u cha'al li boch'o xpiet no'ox batel yama c'alal chbat ta vits yu'un Muc'ul Diose, ja' li snac'ubbail Israele.

³⁰ Li Muc'ul Diose chac' ta a'yel li sc'op ti toj ech'em stsatsale, xchi'uc ta sc'ac'al yo'nton, ta yat c'oc', ta epal chauc, ta muc'ta sutub ic', ta chauquil vo', xchi'uc ta muc'tic bot chac' ta ilel li smuc'ul stsatsale.

³¹ Ta sventa sc'op Muc'ul Dios xchi'uc ta sventa svaston chjin o li Asiriae.

³² Li jujumoj majel chac' Muc'ul Dios ta stojolique ta xbac' lec arpa xchi'uc chac'chac' taq'uin. Ta sventa muc'ta pleito chlic scontrain li Asiriae.

³³ Yu'un vo'one xa chapanbil ta sventa Asiria xchi'uc ajvalil yu'un li yavil muc'ta vocol ti mu albajuc c'u sjamlej, xchi'uc ti mu albajuc c'u snatil xchaque. Te tsanal o li c'oq'ue, yu'un toj ep si'il; ta yic'al ye no'ox Muc'ul Dios ta stsan; ja' ti chloc' ep azufre ta ye jech chac c'u cha'al nio'e.