Isaías 3 - Bible in Tzotzil de Chenalhó with Deuterocanon

Sc'oplal chapanel ta stojol Judá xchi'uc Jerusalén

¹ Q'uelavil, li Muc'ul Diose ta xlic sloq'ues ta Jerusalén, xchi'uc ta Judá scotol li c'usitic chtun yu'unique, xchi'uc li coltael chich'ique, xchi'uc li ve'liletique, xchi'uc li vo' chtun yu'unique.

² Jech noxtoc tsloq'ues scotol li boch'otic lec tsots yo'ntonique, ti lec xchanojic paspleitoe, xchi'uc li jchapanvanejetique, li j'alc'opetique, li jt'unuletique, li moletique,

³ xchi'uc li banquilal yu'un lajuneb yoxvinic (50) soldadoetique, xchi'uc li jpasmantaletique, li jtojobtasvanejetique, li j'ac'chameletique, xchi'uc li boch'otic sna'ic spasel c'usitic toj labalic sbae.

⁴ Puru queremetic to ta stic' ta banquilal yu'unic; puru ch'ium queremetic to ch-och ta jpasmantal yu'unic.

⁵ Li cristianoetic ta jujun lume chliquic ta sa' c'op, ac'o me lec sc'opan sbaic, chlic scontrain sbaic; li queremetique chlic scontrainic li moletique, li boch'o bajbilique chlic scontrainic li boch'o ich'bilic ta muq'ue.

⁶ Xchi'il xa no'ox sbaic ta voq'uel jech chlic yalbe sbaic: “Vo'ot oy to ac'u', ochan ta banquilal cu'uncutic; ventaino li lum li'i ti soquem xae”, xutic.

⁷ Pero li yane jech chlic yal ec: “Yiloj Dios, mu xu' cu'un, mu jna' xpoxtael li c'usitic chopol li'i; mu'yuc jve'el te ta jna, xchi'uc mu'yuc c'usi ta jlap. Mu me xatiq'uicun ta sventainel li lume”, xi chlic stac'.

⁸ Ta melel j'ech'el chlom o li lum Jerusalene, j'ech'el chjin o li Judae, yu'un puru chopol c'usi laj yalic, puru chopol yabtelic ta stojol li Muc'ul Diose; la xchopolc'optabeic li smuc'ul stsatsale.

⁹ Lec xvinaj ta satic ti oy smulique, mu xa xu' tsnaq'uic; ja' jechic jech chac c'u cha'al Sodoma ti vinajem ta scotol cristianoetic ti oy smulique. Toj abul sbaic, yu'un ja' no'ox tstsob li svocol stuquique.

¹⁰ Xcuxet no'ox yo'nton li boch'o tuc' c'usi tspase; lec chbat, ta to sbalin li c'usitic chloc' ta yabtele.

¹¹ Toj abul sba li boch'o chopole, yu'un j'ech'el chopol chbat o, yu'un ta ono'ox xich'be stojol li yabtele.

¹² Jun biq'uit querem xa chlic yuts'inta li jteclumale; chlic pasaticuc ta mantal yu'un antsetic. Vo'oxuc li jteclumaloxuque, chavich'ic lo'lael yu'un li boch'otic chastojobtasoxuque; chaxch'ayoxuc batel ta yantic be.

¹³ Li Muc'ul Diose chapal xa sventa chchapanvan; va'al xa sventa chac'be stoj smul li steclumale.

¹⁴ Li Muc'ul Diose chtal xa xchapan li moletique, xchi'uc li banquilaletic te ta lum yu'une, jech chalbe: “Vo'oxuc laj asoquesic scotol li ts'usubtic cu'une; te xa oy ta anaic li c'usi laj avelc'anbeic me'onetique.

¹⁵ ¿C'usi avabtelic, vo'oxuc ti chajipic ta lum li jteclumale, ti chapech'beic ta teq'uel sat li me'onetique?”, xi li Muc'ul Dios ti ech'em svu'ele.

Ch-ac'bat stoj smulic li antsetic ta lum Jerusalene

¹⁶ Jech chal noxtoc li Muc'ul Diose: “Li antsetic ta Sión ti jtoybaetic no'oxe, ti ja'al no'ox snuc' chanovique, ti mu sna' xq'uexov satique, ti xca'cun no'ox chanovique, ti xchac'lajet no'ox yu'unic li c'usitic yac'oj ta yacanique,

¹⁷ ta jtulesbe ta chin li stsotsil sjolique; jeche' xa t'ajt'aj sjolic chcomic cu'un”, xi.

¹⁸ Me la sta sc'ac'alile, ta xnitbatic loq'uel yu'un Muc'ul Dios scotol li c'usitic xnichinam no'ox xchi'uquique, li c'usitic yac'oj ta yacanique, li snet' sjolic ti lec xotajtique, li c'usitic xotajtic jech chac c'u cha'al o'lol u yilele,

¹⁹ li snats'ique, li staq'uinal xchiquinique, li xoj snuc' sc'obique, li jayal poc' sventa smac satique,

²⁰ li xnichimal sjolique, li bic'tal cadenaetic chucajtic ta yacanique, li xchuquique, li yavil sperfumeique xchi'uc li c'usitic yan lec muic yiq'ue,

²¹ li xoj sbic'tal sc'obique, li staq'uinal sni'ique,

²² li sc'u' spoq'uic ti toj c'upilic sbae, li snatilc'u'ique, li xchalique, li yavil staq'uinique,

²³ li snenique, li lequil poq'uetic pasbilic ta lino noe, li xpix sjolic ti lec natique, xchi'uc li snet' sjolique.

²⁴ Ja' xq'uexol sperfumeic chc'ot ti chtuib yiq'uique; ja' xq'uexol xchuquic chc'ot li ch'ojone. Li sjolic ti toj c'upilic to'ox sba tspasique ja' xq'uexol chc'ot ti cht'ajbuj sbejlijile; li sc'u'ic ti toj lequique ja' xq'uexol chc'ot li c'u'il ti ch'ixlajan ta lapele; ja' xa st'ujumalic chc'ot li smarcailic ti ch-ic'uban ta c'ac'al taq'uine.

²⁵ Li viniquetic avu'unique chmilatic ta espada scotol; li soldadoetic avu'unique chchamic ta pasc'op scotol.

²⁶ Li alumalique ta xlic oq'uicuc, ta xat yo'ntonic; j'ech'el jipbil ta xcomic o.