Isaías 29 - Bible in Tzotzil de Chenalhó with Deuterocanon

Sc'oplal Jerusalén xchi'uc yajcontratac

¹ ¡Ay, Jerusalén, Jerusalén, vo'ot li lum ti bu to'ox la spas scarpana li Davide!, ac'o xa jelovuc jun chibuc jabil ti jech chapasilan q'uinetique.

² Ts'acal ta xlic cac'bot tsots avocol vo'ot li lum Jerusalenote; ep to cha'oc' cha'avan. Li lume ja' jech ta xc'ot cu'un jech chac c'u cha'al scajleb matanal ti bonol ta ch'ich'e.

³ Yu'un ta jsetu ta carpanaetic li apat axocone; ta jva'an tec'ubaletic ta spatpat acoraltonal, jech chavich' ochentael o.

⁴ Jech biq'uit ta xcom o ac'oplal; q'uiil ta banamil chacom o. Ta yut banamil xa chlic tal li ac'op c'alal chac'opoje; jutuc xa xavisvun ta pucuctic jech chac c'u cha'al jsibtasvanej.

^5-6 Pero li yepal avajcontrae, ta anil no'ox ta x'ac'bat stoj smulic yu'un li Muc'ul Dios ti ech'em svu'ele; ta anil no'ox ta xcomic jech chac c'u cha'al pucuc. Li yepal boch'o toj tsots tspas sbaic ta atojole, chcuchatic batel ta tsatsal ic' jech chac c'u cha'al jobel. Yu'un li Muc'ul Diose ta stac tal tsatsal chauc; ta stac tal tsots niquel, muc'ta sutub ic', chauquil vo', xchi'uc yat c'oc' ti chchic'vane.

⁷ Li epal lum chtal scontrain Jerusalene, xchi'uc li yantic chtal contrainvanicuque, xchi'uc li stec'ubic tsva'anic sventa ch-ochic batele ja' no'ox jech chcomic jech chac c'u cha'al vaychil ta ac'ubaltic.

⁸ Ja' jech chac c'u cha'al boch'o chvi'naj ta ac'ubaltic ti yochel ve'el ta xvayech chile. Ja' to cha'ay ti c'alal chjulove solel chvi'naj. Ja' jech chac c'u cha'al boch'o chtaquij yo'nton ta ac'ubaltic ti yochel uch' yoxo' ta xvayech chile. Ja' to cha'ay ti c'alal chvic' sate, solel taquin yo'nton xchi'uc taquin snuc'. Ja' jech chc'ot ta pasel ta stojol li epal lumetic ti tstsaquic ta pleito li vits Sione.

⁹ Pasilanic o ti jech mu xavich'beic smelole. Te macaluc o asatic jech chac c'u cha'al ma'sat; te tamlajetanic o jech chac c'u cha'al jyacubeletic, ac'o me mu'yuc bu avuch'ojic pox.

¹⁰ Yu'un li Muc'ul Diose stacojboxuc tal vayel ti toj pim chbate, smacojbe sat li j'alc'opetic avu'unique; xpixojbe ta poc' sat li boch'otic oy c'usi chil scuyojique.

¹¹ Li c'usi yac'oj ta na'el Diose ja' jech chc'ot ta atojolic jech chac c'u cha'al c'usi ts'ibabil ta balbil vun ti pac'bil leque. Ac'o me jech chavalbeic li boch'o lec sna' sq'uelel vune: “Q'uelo li'i”, me xavutique, jech chtac'ov: “Mu xu' cu'un, yu'un lec pac'bil”, xi.

¹² Ac'o me jech chavalbeic noxtoc li boch'o mu sna' sq'uelel vune: “Q'uelo vun li'i”, me xavutique, jech tstac': “Mu jna' sq'uelel”, xi.

¹³ Li Muc'ul Diose jech laj yalbun: “Li cristianoetic li'i, chtunic cu'un ta sc'opic no'ox; chiyich'icun ta muc' ta yeic no'ox, pero li yo'ntonique nom oy ta jtojol. Smantal no'ox cristiano chch'unic ti c'u x'elan chiyich'icun ta muc' yilele; nopbil no'ox yu'un cristiano li c'usi tspasique.

¹⁴ Ja' yu'un, ta sventa sq'uelubiltac jtsatsal ta jch'aybe yo'ntonic li cristianoetic le'e; ta jch'aybe sbijilic li boch'otic bijique; ta jch'aybe sjolic li boch'otic oy c'usi lec sna'ique”, xi.

¹⁵ Toj abul sba li boch'o tsc'an tsnac' sbaic ta stojol Muc'ul Diose, ti ta mucul tsnopic li c'usi chchapanique, ti ta nac'al tspasic li c'usitic chopole. Jech chalic: “Mu'yuc boch'o chijyilutic; mu'yuc boch'o tsna' li c'usi ta jpastique”, xiic.

¹⁶ Mu sna'beic smelol jech chac c'u cha'al jun bin patbil ta ach'el. Li c'usi pasbil no'oxe ¿me xu' jech chalbe li boch'o ipasat yu'une: “Muc vo'ocot laj apasun”, me xu' xut? Li bin patbil ta lume ¿me xu' jech chalbe li boch'o ipatat yu'une: “Mu c'usi xana' spasel”, me xu' xut?

I'albat sc'oplal ti chcol li Israele

¹⁷ Li toyolaltic ta Libanoe mu xa epuc c'ac'al sc'an xc'ataj ta yaxal banamil; yan li yaxal banamil li' ta orae ja' chlic c'atajuc ta toyolaltic.

¹⁸ Ta sc'ac'alil le'e li coquetique chlic jamuc xchiquinic, chlic ya'yic c'alal ch-aptabatic li c'usi ts'ibabil ta vune, jech noxtoc li ma'satetic ti oyic ta ic' osil, ti oyic ta ac'ubaltique chlic jamuc satic.

¹⁹ Li boch'o toj biq'uit ch-ilatique chlic staic xcuxetel yo'ntonic ta sventa li Muc'ul Diose. Li boch'otic toj me'onic ta scotol xchi'iltaquique, chlic tse'inicuc ta sventa li Ch'ul Dios yu'un Israele.

²⁰ Yu'un ta xlaj sc'oplal li j'uts'intavanejetique; j'ech'el ta xch'ay o li jlabanvanejetique. Ch-ul o scotol li boch'otic ja' no'ox oy ta yo'nton tspasic c'usi chopole,

²¹ xchi'uc li boch'o jech no'ox tsa'beic smul xchi'ilic ta sventa c'usi chalique, xchi'uc li boch'o tslo'laic jchapanvanejetique, xchi'uc li boch'o tsmacbeic spojel li boch'o mu'yuc smule.

²² Ja' yu'un, li Muc'ul Dios ti la scolta Abraham ta vo'onee jech chalbe li sts'unubaltac Jacobe: “Li' ta ora xchi'uc le' to batele, mu'yuc cha'ay q'uexlal o li Jacobe; mu'yuc bu tsaclich'taj o sat ta xi'el.

²³ C'alal chilic jmuc'ul jtsatsal li smomnich'nabtaque, chilic ti toj tuc' co'ntone, chlic yich'icun ta muc' vu'un li Diosun yu'un Jacobe, vu'un li Ch'ul Diosun yu'un Israele.

²⁴ Li boch'o xch'ayet no'ox yo'nton cha'yique, chlic bijubicuc lec; li boch'o xbic'talvulajetic ta jtojole chlic sc'anic lec chanubtasel cu'un”, xi li Diose.