Isaías 28 - Bible in Tzotzil de Chenalhó with Deuterocanon

Taq'uiel ta stojol Samaria

¹ Toj abul sba li Samariae, ja' li scorona, li stoyobbail jyacubeletic ta Efraine. Lec luchul ta jol vits ta o'lol yaxaltic, puru yacubel batem ta yo'ntonic ja' xa jech chac c'u cha'al nichim ti mats'em xa, ti mu'yuc xa c'upil sbae.

² Pero li Muc'ul Diose tstac tal jun boch'o ech'em xu' yu'un. Ja' jech yip jech chac c'u cha'al c'alal chtal epal bot; ja' jech chac c'u cha'al sutub ic' ti ep c'usi tsoquese; ja' jech chac c'u cha'al yip tsatsal chauquil vo' ti chmuc banamil yu'une. Ta sc'ob no'ox chjach'u ta banamil.

³ Ta yacan no'ox ta xpech'be ta teq'uel li stoyobbail, li scorona jyacubeletic ta Efraine.

⁴ Ja' ti xco'laj xchi'uc nichim ti mats'em xae, ti mu'yuc xa c'upil sbae, ti lec luchul ta jol vits ta o'lol yaxaltique. Le'e ja' jech chc'ot jech chac c'u cha'al sba sat higo; me oy boch'o laj yile, chbat stul slo' ta ora, jech chlaj sc'oplal o.

⁵ C'alal me la sta sc'ac'alil le'e, ti c'u to yepal chcom li steclumal Muc'ul Diose ja' xa scoronaic, ja' xa yutsilic slequilic chc'ot stuc li Muc'ul Dios ti ech'em svu'ele.

⁶ Li Muc'ul Diose ja' chac' ti tuc' ac'o chapanvanicuc li jchapanvanejetique, xchi'uc ja' chac'be stsatsal yo'nton soldadoetic sventa tsnutsic batel te no'ox ta sti' coralton li boch'o chtalic ta paspleitoe.

Taq'uiel ta sventa jlo'lavanej j'alc'opetic

⁷ Jech noxtoc oy yantic ti jeche' xtamlajetic ta scoj poxe, ti jeche' sts'otlajet yacanic ta scoj c'usi tsotsic ta uch'ele. Li paleetic xchi'uc li j'alc'opetique jeche' xtamlajetic ta yacubel ec ta scoj li c'usi tsotsic ta uch'ele. Ivovij sjolic yu'un li pasem ya'lel ts'usube; jeche' xa sts'otlajet yacan chanovic. Xvovet cha'yic ti c'alal oy c'usi ch-ac'bat yilic ta xch'ulelique; mu'yuc xa smelol c'alal chalic c'u x'elan chcom li boch'o chchapanique.

⁸ Li mexaetique nojem ta puru xeil, xchi'uc ta puru ic'ubal; me jutuc mu'yuc c'usi lec q'uelbil.

⁹ Jech chalic ta jventa: “¿Me yu'un ja' xu' chisbijubtasutic? ¿Me ja' xu' chijyalbutic c'usi yaloj li Diose? ¿Me yu'un ach' jvoq'uel ololutic to chil? ¿Me yu'un ja' jechutic chil jech chac c'u cha'al olol ti ja' to chcom xchu'e,

¹⁰ ti ja' to chlic xchanic yalel jujubel c'op jech chac li'i?: Ma, ma, ti, ti, ya, ya, mi, mi, ti xiique”, xiic.

¹¹ Ta melel li jun lum li'i ta ono'ox xich'ic c'opanel ta c'op ti toj yan o ta a'yele, ti mu a'ibaj smelole.

¹² Jech ono'ox albilic yu'un Dios ta ba'yuc: “Junuc xa avo'ntonic, cuxo xa avo'ntonic; ac'o xa xcux li boch'o lubene”, xi. Pero muc xich'ic ta muc'.

¹³ Ja' yu'un li Muc'ul Diose jech chc'opoj ta stojolic chac li'i: “Ma ma, ti ti, ya ya, mi mi”, xi, yu'un jech ac'o yalicuc ta lum ta javal ti c'alal chanovic batele; ac'o c'asuc yacanic, te chucul ac'o c'oticuc, te ac'o yich'ic chuquel o.

Taq'uiel ta sventa chopol jpasmantaletic

¹⁴ Vo'oxuc ti chapasic mantal te ta Jerusalene, ti ja' no'ox chalabanvanique, a'yo ava'yic c'usi chal li Muc'ul Diose.

¹⁵ Li vo'oxuque jech chavalic: “Jpasojcutic xa trato xchi'uc li lajele; oy xa c'usi jchapanojcutic xchi'uc li yavil ch'ulelaletique, yu'un jech c'alal chtal li tsots vocole, mu xistauncutic, yu'un jsa'oj xa jpojubbailcutic ta sventa epalc'op; ja' xa jnac'ubbailcutic li lo'lavaneje”, xachiic.

¹⁶ Ja' yu'un li Cajvaltic Diose jech chal: “Ta xcac' jbej lequil ton te ta Sión, lec t'ujbil li tone, tsots sc'oplal; ja' chtun ta sventa snacleb na, ja' chtun ta mero chiquin na. Li boch'o ja' tspat yo'nton ta stojole, mu xchibaj o yo'nton.

¹⁷ Ti bu ta jva'an li nae ta jtunes tuq'uil chapanel ta xq'uexol nivel; ta jtunes scotol c'usi tuc' ta xq'uexol ch'ojon”, xi. Li apojobbail asa'ojic ta sventa epalc'ope ta soc ta bot scotol; li anac'ubbail asa'ojique ta xcuchat batel ta vo'.

¹⁸ Li c'usi achapanoj achi'uquic lajele chlaj sc'oplal; li c'usi achapanoj achi'uquic yavil animaetique mu'yuc stu chc'ot o. C'alal chtal li tsots vocol ta atojolique, chasnet'oxuc o ta j'ech'el.

¹⁹ C'alal chtal jujun veltae, chaxjochoxuc o batel, yu'un ta jujun sob chtal; chtal ta c'ac'al, ta ac'ubal. C'alal ja' to no'ox chava'ibeic sc'oplale, chaniquic ta xi'el.

²⁰ Ja' jech chava'yic jech chac c'u cha'al chijvay ta vaybal ti toj comcome, ti mu xu' ta jxach' cacantique, xchi'uc ja' jech chava'yic jech chac c'u cha'al c'alal toj biq'uit jxaquitatic ti mu xijpix yu'une.

²¹ Yu'un li Muc'ul Diose ja' jech ta spas jech chac c'u cha'al la spas te ta vits Perazime; ja' jech ta x'ilin jech chac c'u cha'al i'ilin te ta stenlejaltic Gabaone. Ja' ta spas li yabtel ti yan o ta q'uelele; ja' ta xac' c'otuc ta pasel li yabtel ti toj labal sbae.

²² Ja' yu'un mu me ja'uc no'ox xalabanic, yu'un jech mu yolbajuc stsin sba li acadenailique, yu'un ca'yoj ti tsc'an tslajes scotol avosilalic li Muc'ul Dios ti ech'em svu'ele.

Lo'il sventa abtel

²³ Ch'anchan ava'yic, a'yic c'usi ta xcal; ts'e'ano lec achiquinic li c'usi chacalboxuque.

²⁴ Li jloc banamile mu scotoluc c'ac'al puru abtel tspas; mu scotoluc c'ac'al puru slilinel tspas ti bu muc'tic laj yich' loquele,

²⁵ ¿Me mu ja'uc to chlic svijbe sbec' eneldo xchi'uc comino c'alal me laj xa spas lec ta parejo li banamile? ¿Me mu ja'uc to chlic sts'un lec ta jujuchol li trigoe, xchi'uc me mu ja'uc to chlic sts'un ta sti'ti' li cebada xchi'uc li avenae?

²⁶ Yu'un ja' Dios stuc chac'be sna', jech lec chbat yu'un spasel li yabtele.

²⁷ Li eneldoe mu'yuc chich' ac'bel stec' vacax sventa chloc' sbec', xchi'uc mu'yuc boch'o chac' jelovuc careta ta sba yac'ol li cominoe. Ta te' no'ox tsc'an lilinbel sbec' li eneldoe, ta vach' no'ox tsc'an loq'uesbel sbec' li cominoe.

²⁸ Li trigoe xu' tec'bil ta vacax chich' majel, pero mu'yuc chvoch' o ta j'ech'el; xu' chjelov careta ta sba, pero ja' no'ox chloc' li sbeq'ue, mu'yuc bu chvoch' o ta j'ech'el.

²⁹ Ja' no'ox jech ec li Muc'ul Dios ti ech'em stsatsale, li c'usi snopoj tspas ta atojolique, lec chapal yu'un. Ja' tspas li c'usi toj labal sbae; ta sventa sbijil stuc tspas.