Isaías 27 - Bible in Tzotzil de Chenalhó with Deuterocanon

Tsta yorail ta xcoltaatic sutel li israeletique

¹ Li Muc'ul Diose ja'o yorail chac'be svocol li Leviatane,, ja' li chon ti xquilet chanov ta anile, ti xotoj sba ta banamile. Ja' ta smil o ta yespada ti toj xi'bal sbae, ti toj muq'ue, xchi'uc ti toj tsotse. Ta smil noxtoc li dragón te oy ta nabe.

² C'alal ja'o sc'ac'alil jech chc'ot ta pasele, jech chal li Muc'ul Diose: “Q'uejintaic li ts'usubaltic ti toj c'upilic sbae.

³ Vu'un jchabioj, noch'ic no'ox ta xcat'es; vu'un ta jq'uel ta c'ac'al ta ac'ubal, yu'un jech mu me boch'o xuts'inta.

⁴ Mu'yuc bu ilinemun ta stojol. Ti ja'uc puru ch'ix, puru chopol ts'i'laletique, chbat jtsac ta c'op, chbat jpech' ta teq'uel ti jechuque; j'ech'el ta xcules o comel ta c'oc' ti jechuque.

⁵ Yan me tsc'anic to coltael cu'une, me tsc'anic ta jlamajes co'nton ta stojolique, xu' ta xlecub co'nton ta stojolic”, xi li Muc'ul Diose.

⁶ Ta ts'acal, chlic yac' lec yisim li sts'unubal Jacobe; chlic q'uelumajuc, chlic nichinuc li Israele; chlic nojuc banamil yu'un li sate.

⁷ Li Diose mu'yuc yac'ojbe stoj smul li Jacob jech chac c'u cha'al laj yac'be stoj li yajcontrae; mu'yuc bu tsmil li Israel jech chac c'u cha'al la smilbe li jmilvanejetic yu'une.

⁸ Laj yac'be svocol, la stac batel ta yan banamil; ta stsatsal yic'al ye la xjuch'ta loq'uel ta yosilal, jech chac c'u cha'al muc'ta ic' ti chtal ta sloq'ueb c'ac'ale.

⁹ Pero ta spasbe perdón yu'un smul; ja' xch'ayubil smul chc'ot me tspasic jech chac c'u cha'al li'i: Me tslilin scotol li scajleb smoton c'usi mu ja'uc diose, me tan chcom yu'un scotol li tonetique, xchi'uc me mu'yuc xa tsva'anic o li anbil chumante' ti yich'ojic ta muq'ue xchi'uc li scajlebtac xchic'ubil pome.

¹⁰ Li slumalic ti lec setbil ta tsatsal coraltone, yav xa chcom o; li lum ti ep to'ox yajvale ictabil chcom o jech chac c'u cha'al xocol banamil ti mu'yuc yajvale. Ja' te chtal ve'uc vacaxetic; ja' chtal slo'ic li vomoletique, te chcux yo'ntonic.

¹¹ C'alal chtaquij li c'obc'ob te'etique, chlic c'asanuc ya'lel; te chtal li antsetique chtal stsobic sventa si'il sc'oq'uic. Yu'un li jun lum le'e mu sna'ic snopel, ja' yu'un li Jpasvanej yu'unique mu'yuc xa c'uxubinel, mu'yuc xa ts'icumal yu'un.

¹² Me la sta li sc'ac'alil le'e, li Muc'ul Diose chlic abtejuc ta Eufrates c'alal to ta yuc'umal Egipto; jech chac c'u cha'al li boch'o tsmaj ta jujuchuc strigoe. Vo'oxuc li israeloxuque, chlic avich'ic tsobel tal ta jujuntal.

¹³ Ja'o yorail chich' jupanel li muc'ta oq'uese, jech chlic talicuc scotol li boch'otic spucoj sbaic batel ta yosilal Asiriae, xchi'uc li boch'otic chucbilic batel ta Egipto banamile. Te chvul yich'ic ta muc' ta ch'ul vits li Muc'ul Diose, ja' li Jerusalene.