Isaías 26 - Bible in Tzotzil de Chenalhó with Deuterocanon

Q'ueoj sventa coltael yu'un Muc'ul Dios

¹ C'alal ja'o sc'ac'alil jech chc'ot ta pasele, chlic sq'uejintaic te ta Judá li q'ueoj li'i: “Oy jun muc'ta tsatsal lum cu'untic; li Muc'ul Diose laj xa jset lec ta tsatsal coralton sventa te ta jpoj jbatic o.

² Jambeic li sti'taque, yu'un ac'o ochicuc batel li jun lum tuc' yo'ntonique, ti ja' no'ox jun yo'nton la spasic li c'usi melele.

³ Muc'ul Dios, vo'ot ta aventa lec jun yo'nton cha'yic li boch'otic ja' no'ox laj yac' yo'ntonic ta atojole, yu'un ja' no'ox chch'unic ti vo'ot chacoltaique.

⁴ “J'ech'el pato avo'ntonic o yu'un li Muc'ul Diose, yu'un ja' no'ox jnac'ubbailtic o ta sventa sbatel osil.

⁵ Ja' chac' yalicuc ta lum li jtoybaetique; ja' tsbic'tajes li jun ta lum toj muc' yac'oj sbaique, tsyales c'alal ta banamil.

⁶ Yu'un jech ac'o pech'atuc ta teq'uel yu'un li boch'otic mu'yuc stu ch-ilatique, xchi'uc li boch'otic abul sbaique”, xi li q'ueoje.

⁷ Li boch'otic tuc' yo'ntonique lec tuc' li be stamojique. Muc'ul Dios, vo'ot ti atalel tuc' avo'ntone, vo'ot chatuq'uibtasbe batel li sbeique.

⁸ Muc'ul Dios, ja' no'ox laj cac' ta co'nton li tuq'uibtasel avu'une; ja' no'ox oy ta co'nton o ta jna'ilanot li vo'ote.

⁹ Ta scotol jol co'nton chajna'ilanot ta jujun ac'ubal; juteb co'nton ta atojol chajsa'ot ta jujun sacubbal. C'alal chachapan sbejel li banamile, ja' to te chchanic c'usi tuc' ta pasel li cristianoetique.

¹⁰ Ac'o me toj ep yutsil avo'nton ta stojol li boch'otic chopolique, pero mu sc'an spasic o li c'usi tuq'ue. Puru chopol c'usi tspasic te ta yosilal li ateclumale; mu'yuc sc'oplal ta yo'ntonic li amuc'ul atsatsale.

¹¹ Muc'ul Dios, ac'o me aye'oj xa ac'ob, pero mu xilic. C'alal chilic ti ep c'ux ta avo'nton li ateclumale, q'uexlal cha'yic, it'ix yo'ntonic. Ja' lec ti oyuc c'uxi lajicuc ta c'oc' li avajcontrataque.

¹² Muc'ul Dios, vo'ot chavac' jun co'ntoncutic; vo'ot chavac' c'otuc ta pasel noxtoc li cabtel ta jpascutique.

¹³ Muc'ul Dios, vo'ot Diosot cu'uncutic, yantic xa boch'o chispasuncutic ta mantal, pero jna'ojcutic ti vo'ot no'ox cajvalotcutique.

¹⁴ Li stuquique chamenic, mu'yuc xa chcuxiic; lajemic o, mu xa xcha'cuxiic, yu'un laj avac'be stoj smulic, laj avules o; laj ach'aybe o sc'oplalic.

¹⁵ Muc'ul Dios, vo'ot laj avepajes li jteclume; laj avac' epajuc sventa avich'el ta muc'; laj amuq'uibtasbe li yosilalique.

¹⁶ C'alal oy jvocolcutique, chajsa'otcutic; c'alal laj avac'bun jvocolcutique, la jc'opanotcutic.

¹⁷ Jech chac c'u cha'al jun ants ti c'alal yorail xa chcuxe, x'avet ta scoj li xc'uxule; ja' jechuncutic ta atojol ti c'alal oy jvocolcutique.

¹⁸ Co'ol chac c'u cha'al oy jch'utcutic ic'ot ya'yel ec; laj cac'cutic persa, pero mu'yuc stu ic'ot. Altic laj cac'cutic persa, mu'yuc la sta coltael li cristianoetic li' ta cosilalcutique; mu'yuc bu la sta coltael li jnaclumetic ta sbejel li banamile.

¹⁹ Yan li avu'untac ti chamenique ta xcha'cuxiic; li sbec'talique ta xlic cuxiuc. Li boch'otic vayemic ta pucuctique ta xlic julovicuc; ta xq'uejinic yu'un toj xcuxet no'ox yo'ntonic. Yu'un vo'ot chatacbe tal luz ta stojolic jech chac c'u cha'al sjob osil chyal ta ts'unubaltic; ja' yu'un li boch'otic chamenique chlic voq'uicuc li' ta banamil yan velta.

²⁰ Jteclumal, bat ochanic ta anaic, maquic lec comel li ti'naetic ta apatique; nac'o abaic muc'ta jaluc, malaic ac'o jelovuc sc'ac'al yo'nton li Muc'ul Diose.

²¹ Yu'un li Muc'ul Diose ta stots tal ta spasubmantal; chtal yac'be stoj smulic li cristianoetic ta banamile. Li banamile chac' ta ilel scotol li ch'ich' malbile; mu'yuc tsnac' c'u yepal li boch'o milbilique.