Isaías 25 - Bible in Tzotzil de Chenalhó with Deuterocanon

Q'ueoj sventa yalbel slequilal Muc'ul Dios

¹ Muc'ul Dios, vo'ot Diosot cu'un; chaquich'ot ta muc', ta xcal slequilal abi, yu'un toj labalic sba c'usi laj apas. Li c'usitic avaloj ono'ox ta vo'one, puru tuq'uic, puru melelic.

² Yu'un li muc'tic lume laj ac'atajes ta sbusleb tonetic; laj ayavnaijes li lumetic ti setbilic ta tsatsal coraltone; laj avuq'uesbe li smuc'tiquil pasubmantalic yanlumetic li'i; j'ech'el mu'yuc xa chich' cha'va'anel o yan velta.

³ Ja' yu'un chayich'icot xa ta muc' li lumetic ti puru jsa'c'opetic to'oxe; ta xi'ic xa avu'un li muc'tic lum ti toj simaronique.

⁴ Yu'un vo'ot spojobbailot li me'onetique, vo'ot jcoltavanejot yu'un li boch'o abul sbaic ta scoj vocole, vo'ot snac'ubbailicot ta sventa li tsatsal ic'al vo'e, vo'ot yaxibicot ta sventa li xc'uxul c'ac'ale. Yu'un li simaronil jsa'c'opetique ja' jech chac c'u cha'al tsatsal ic'al vo' c'alal chc'ot smaj sba ta c'alnae,

⁵ xchi'uc jech chac c'u cha'al xc'uxul c'ac'al ta yorail q'uepelal. Laj abic'tajesbe stoyobbailic li yanlumetique, jech chac c'u cha'al tsmacbe xc'uxul c'ac'al li toque. Vo'ot laj aval mantal ti ac'o ch'anxiicuc li jsa'c'opetic ti toj simaronique.

⁶ Li Muc'ul Dios ti ech'em svu'ele te ta vits Sión chchapan lequil ve'lil ta sventa li jujun banamile, xchi'uc chchapan pasem ya'lel ts'usub ti vo'one xa lec pasbile; toj lec muic li ve'lile xchi'uc toj lequic li pasem ya'lel ts'usube.

⁷ C'alal te oy ta vits li Muc'ul Diose, ta xlic slilin scotol li poc' ti smacoj o lumetique, xchi'uc li muc'tic manta ti xpixoj jujun banamile.

⁸ Jech noxtoc j'ech'el ta slajesbe o sc'oplal li lajele; ta scusbe loq'uel ya'lel sat scotolic; ta stu'pbe o sc'oplal li' ta banamil li c'usi la soquesbe sc'oplal li steclumale. Ja' jech yaloj stuc li Muc'ul Diose.

⁹ Me la sta li sc'ac'alil le'e, jech chalic: “Le'e ja' Dios cu'untic; ja' jpatoj co'ntontic yu'un, yu'un ja' la scoltautic; ja' no'ox Muc'ul Dios ti la jpat co'ntontic ta stojole; xijtse'in no'ox, xcuxet no'ox co'ntontic ta stojol yu'un la scoltautic”, xiic.

¹⁰ Li Muc'ul Diose tsmac lec ta sc'ob li vits Sione; yan li Moabe te no'ox chich' pech'el ta teq'uel ta yamac' jech chac c'u cha'al chich' pech'el ta teq'uel jobel ta c'a'eptic.

¹¹ Te xa xbechlajet sc'obic jech chac c'u cha'al li boch'o ta xnuxije, yu'un li Muc'ul Diose ta slajesbe sc'oplal li stoyobbailique; ta xalubtasbe o li sc'obique.

¹² Ta slilinbe yalel li tsatsal coraltonetic yu'unique; ta slajesbe o yip, ta slomes o yalel c'alal ta banamil; j'ech'el ta sc'atajes o ta pucuc.