Isaías 24 - Bible in Tzotzil de Chenalhó with Deuterocanon

Ja' chchapan sbejel banamil li Muc'ul Diose

¹ A'yo ava'yic, li Muc'ul Diose ta xocobtas li banamile; ta st'anan ya'yel, ta soques scotol; ta spucbe batel li jnaclumetic yu'une.

² Co'ol chich' pasbel scotol: paleetic xchi'uc cristianoetic; mozoetic xchi'uc yajvalic; me' quiaraetic xchi'uc sme'ajvalic; jmanulajeletic xchi'uc jchonolajeletic; boch'otic oy c'usi chq'uexic xchi'uc boch'otic chaq'uic ta q'uexel; boch'otic oy yilic xchi'uc boch'otic oy j'iluviletic yu'unic.

³ Li banamile solel xocol chcom o; mu'yuc c'usi chcom o te, yu'un li Muc'ul Diose yaloj ti jech chc'ot ta pasele.

⁴ Li banamile tsoc o, ch-alub o ya'yel; chtaquij o, chyal o ta lum sbejlijil li banamile. Li vinajel xchi'uc banamile chlaj stsatsalic o.

⁵ Yu'un ibolib xa ta scoj li boch'otic te nacajtique, yu'un la sva'lupatinic li mantaletique; muc xch'unic li mantaletic albilique; la sbajic li c'usi chapanbil ti mu'yuc slajebale.

⁶ Ja' yu'un li banamile ilaj o ta tsots vocol; iyavnaijic o li jnaclumetic yu'une; iyavnaijic o li cristianoetic ta banamile; jutuc xa no'ox cristianoetic icomic.

⁷ Ilaj o li ya'lel ts'usube yu'un itsacat ta xchamel li ts'usubaltique; li boch'o xcuxet to'ox yo'ntonique puru at-o'nton xa cha'yic.

⁸ Ilaj sc'oplal li boch'otic toj xcuxet to'ox yo'nton tstijic vob xchi'uc arpae; ilaj sc'oplal ti tse'ej lo'ilic to'ox ta sventa li c'usi toj lec chilique.

⁹ Mu'yuc xa boch'o chq'uejin c'alal chuch' ya'lel ts'usub; li boch'o nopen xa'ay chuch' c'usi pajubtasbile, ta xch'aub cha'ay.

¹⁰ Soquem, jinem chcom o ta sventa c'usi chopol li muc'ta lume; chmac scotol li naetique, yu'un jech mu'yuc boch'o ch-och o.

¹¹ Oy oq'uel avanel ta xoraltic ta scoj ti mu'yuc xa li ya'lel ts'usube; chlaj sc'oplal o li tse'ej lo'ile; chich' loq'uesel o li' ta banamil li xcuxetel o'ntonale.

¹² Li lume yav xa chcom o; li ti'coraltonetic yu'une biq'uitic chlilij o.

¹³ Li yajvaltaque ja' jech jbejcantic chcomic jech chac c'u cha'al sat oliva ti c'alal chich' lilinele, o jech chac c'u cha'al sat ts'usub ti chich' cha'c'uxc'ultael c'alal me laj xa yich' tulbel scotol sate.

¹⁴ Li boch'o cuxul chcomique chlic avanicuc, yu'un toj xcuxet no'ox yo'ntonic; chlic q'uejinicuc tal c'alal ta smaleb c'ac'al, yu'un chilbeic smuc'ul stsatsal li Muc'ul Diose.

¹⁵ Jech noxtoc chlic yalbeic slequilal Muc'ul Dios ta sloq'ueb c'ac'al xchi'uc ta bic'tal banamil cacajtic ta nab; buyuc no'ox oyic chlic yich'ic ta muc' li Muc'ul Dios yu'un Israele.

¹⁶ Ta jot to sti' banamil laj ca'ay oy boch'o chq'uejinic, jech chalic: “Ich'biluc ta muc' li boch'o tuc' yo'ntone”, xiic. Pero li vu'une jech laj cal: “¡Ay, toj abul jba, toj abul jba! yu'un li j'ac'vanejetic ta c'abale staoj yav te tspasic o li xchopolilique”, xichi.

¹⁷ Li jnaclumetic ta banamile ja' xa no'ox oy ta stojolic xi'el, ch'en, xchi'uc yaquel ta pets'.

¹⁸ Li boch'o chcolic to loq'uel ta scoj li tsots xi'ele ta ono'ox xbajic ta ch'en; li boch'o chcol to loq'uel ta ch'ene ta ono'ox x'och ta yoquil, yu'un ta xjaman sti' li vinajele, jech ta xnic c'alal ta snacleb li banamile.

¹⁹ Ta xich' niquesel, ta xich' yuq'uel li banamile; ta xich' lilinel, biq'uitic chbat scotol.

²⁰ Li banamile jeche' xnicnun chcom jech chac c'u cha'al jun yacubel li banamile; jeche' xvelvun chcom jech chac c'u cha'al vacaxna. Yu'un toj ol cha'ay li mulile, jech chyal o ta lum xchi'uc; j'ech'el mu xa stots o.

²¹ Me la sta sc'ac'alile, li Muc'ul Diose ta xac'be stoj smul li boch'otic oyic ta ic' ta toyole, xchi'uc li muc'tic jpasmantaletic li' ta banamile.

²² Jmoj ta stsob scotol, tstic' ta chuquel te ta yavil ich'ub-o'ntonal; te chucul, te macal chcomic o. C'alal me i'ech' ep c'ac'ale, ja'o chlic yac'be stoj li smulique.

²³ C'alal chlic abtejuc jech chac c'u cha'al muc'ta ajvalil te ta vits Sión ta Jerusalén li Muc'ul Dios ti ech'em svu'ele, chlic macuc xojobal li u xchi'uc c'ac'ale; li banquilaletic te ta lum yu'une ta xilbeic slequilal yutsilal li Muc'ul Diose.