Isaías 23 - Bible in Tzotzil de Chenalhó with Deuterocanon

Sc'oplal Tiro xchi'uc Sidón

¹ Laj yich' albel sc'oplal ti chlaj li Tiroe. Muc'tic barco, vo'oxuc ti pasbiloxuc ta Tarsise, me'on-oc'anic, yu'un ilaj xa li Tiroe, ja' ti bu chvul acotan abaique. Me jbejuc na mu'yuc xa icom, mu'yuc xa boch'o xu' ch-och te; ya'yojic xa c'alal ta Chipre banamil.

² Yajvaltac Tiro, jchonolajeletic ta Sidón, ch'anchanic, vo'oxuc ti chataquic jelovel ta nab li j'abteletic avu'unique.

³ Ta muc'ta nab ijelov tal li c'usitic chloc' ta Sihore; ta Nilo ijelov tal li ac'ulejalique; vo'ot ch'ivitot lac'ot yu'un li yantic banamile.

⁴ Q'uexovan Sidón, vo'ot ti apatoj avo'nton yu'un li muc'ta nabe, pero li nabe jech chal: “Mu'yuc bu laj ca'ibe xc'uxul alajel; mu'yuc bu la jvoq'ues olol; mu'yuc bu la jts'ites queremetic; mu'yuc jtsebetic la jbijubtas”, xi.

⁵ C'alal cha'yic li egiptoetique, sibluj to yo'ntonic ta xi'el ta scoj li c'usi ic'ot ta pasel ta stojol li Tiroe.

⁶ Jech chalic: “Batanic ta ora ta Tarsis; oc'tao abaic, jnaclumetic ta ti'ti' nab”, xiic.

⁷ Le'e, ¿me ja' li lum ti ta vo'one ono'ox te oye ti toj lec xa'yic sc'upinel scotole, ti ixanov batel ta yacanic, bat spuc sbaic ta namal banamile?

⁸ ¿Boch'o la xchapan c'usi ic'ot ta pasel ta stojol li lum Tiro ti ep to'ox boch'o laj yac'anbe tsots yabtelique, ti puru banquilaletic to'ox li jchonolajeletic yu'une, ti ich'bilic to'ox ta muc' li' ta banamil li jmanulajeletic li jchonolajeletic yu'une?

⁹ Ja' la xchapan li Muc'ul Dios ti ech'em svu'ele, yu'un jech ac'o lajuc sc'oplal li stoyobbaile, jech pech'bil ta teq'uel ac'o comuc o li tsatsal viniquetic li' ta banamile.

¹⁰ Jnaclumetic ta Tarsis, abtejanic xa ta banamil, yu'un mu'yuc xa scotleb abarcoic.

¹¹ Li Muc'ul Diose la stoy sc'ob ta sba li nabe; la sniques li jujun banamile; laj yal mantal ti ac'o yich' vuq'uesel li tsatsal coralton yu'un Canaane.

¹² Jech laj yal: “Stseb Sidón, vo'ot ti soquemot xae, comtsano li c'usitic toj lec chava'ye; ac'o me chabat ta Chipre, pero mu ono'ox xata bu chacux avo'nton.

¹³ Q'uelavil li yosilal babiloniaetique, muc xa lumuc icom. Yu'un li Asiriae laj xa sc'atajes ta yavil chonbolometic, xchi'uc ta xocol banamil; la sva'anic stec'ubic sventa ch-ochic; la slilinic li muc'tic naetique; yavnaijem icom yu'unic.

¹⁴ Me'on-oc'anic, muc'tic barco ta Tarsis, yu'un ilaj xa li apojobbailique.

¹⁵ Me la sta li sc'ac'alile, chlic ch'ayuc ta o'ntonal lajuneb xchanvinic (70) jabil li lum Tiroe, jech sjalil jech chac c'u cha'al chcuxi jun ajvalil. C'alal me its'aqui li lajuneb xchanvinic (70) jabile, ja'o chc'ot ta pasel ta stojol lum Tiro jech chac c'u cha'al li q'ueoj sventa jmulavil ants li'i:

¹⁶ “Jmulavil ants, vo'ot ti ch'ayemot xa ta o'ntonale, tsaco avarpa, xano scotol li lume, tijo lec son, q'uejintao ep q'ueojetic, jq'ueltiquic me ta to xlic na'atan sutel”, ti xie.

¹⁷ C'alal me its'aqui li lajuneb xchanvinic (70) jabile, li Muc'ul Diose chlic sna' yan velta li Tiroe, chlic manulajuc, chlic chonolajuc yan velta, chlic mulivajuc xchi'uc li yantic lum li' ta banamile.

¹⁸ Pero ti c'u yepal tspas canale, ja' voc'bil sventa Muc'ul Dios chc'ot, muc teuc no'ox tsnac', muc teuc no'ox tstsob, ja' chlic stunesic li boch'otic te chtunic o ta stojol Muc'ul Diose yu'un jech tsman o ep sve'elic, xchi'uc tsmanic o lequic sc'u' spoq'uic.