Isaías 22 - Bible in Tzotzil de Chenalhó with Deuterocanon

Chich' lajesel li Jerusalene

¹ Li j'alc'ope laj yalbe sc'oplal ti chlaj li stenlejaltic ta yocyoc vits te yo' bu chich' ac'bel yil yu'un Muc'ul Dios c'usitic chc'ot ta pasele. ¿C'usi apasic ti acotolic chamuyic ta yamaq'uil jolnaetic,

² vo'oxuc li muc'ta lumoxuc ti xach'avlajetic, ti xavochetic no'ox, ti toj lec xava'yic sc'upinel q'uinetique? Li animaetic avu'une muc ta espadauc ichamic; muc ta c'opuc ilajic.

³ Li banquilaletic avu'une ta scoj no'ox st'ilesubil flecha ijatovic batel, pero laj yich'ic ono'ox chuquel. Li avinictac ti bu laj yich'ic taele laj yich'ic chuquel scotol, ac'o me nom ijatovic batel.

⁴ Ja' yu'un jech laj cal: Loc'anic batel li' yo' bu oyune, yu'un jech xu' ep ta xcoc'ta jba li'i, yu'un toj st'uset co'nton chca'ay. Altic chapatbicun co'nton ta sventa ti ilaj xa li jlumale.

⁵ Yu'un li Muc'ul Dios ti ech'em svu'ele laj xa sta sc'ac'alil ti chac' tsots xi'el, xchi'uc tsots vocol, xchi'uc jinel, soquesel li' ta stenlejaltic ta yocyoc vits ti bu chi'ac'bat quil c'usitic chc'ot ta pasele. Yochelic sjinesel li coraltonetique; chc'ot c'alal to ta vitsetic ti c'alal ch-avanique.

⁶ Li elametique chapal xa yu'unic li sflechaique, cajajtic xa ta scaretaic xchi'uc ta ca'etic yu'unic; li boch'otic te nacajtic ta Kire laj xa sloq'ues tal li smacubbailique.

⁷ Li stenlejaltic avu'un ta yocyoc vits ti toj c'upil sbae nojem xa ta caretaetic; li ca'etique te xa lamal scotolic ta ti'coraltonetic.

⁸ Laj xa yich' loq'uesbel scotol smac li Judae. C'alal me ic'ot sc'ac'alile, ja' no'ox te chbat asatic yo' bu tsobol li abtejebaletic te ta spasubmantal ajvalil Toyolaltic sbie,

⁹ xchi'uc ja' te chbat avo'ntonic yu'un bu vomajtic scoraltonal li Lum yu'un Davide, xchi'uc ja' chbat avo'ntonic chanojesic ta vo' li tanque ta olone.

¹⁰ Chlic avatic c'u yepal li naetic te ta Jerusalene; chavuq'uesic ep naetic sventa ja' chatsatsubtasic lec li coraltone.

¹¹ Chlic apasic tanque ta o'lol li chib coraltone yu'un te chavac'beic ya'lel li poco' tanquee. Ja' mu'yuc xa ta avo'ntonic li Boch'o la sliques scotole; ja' mu'yuc xa ta avo'ntonic li Boch'o la xchapan ta vo'onee.

¹² Ja' jech sc'ac'alil chac' oc'anic li Muc'ul Dios ti ech'em svu'ele, chac' avat avo'ntonic, chac' ajux stsotsil ajolic, xchi'uc chac' alapic c'u'il ti ch'ixlajan ta lapele.

¹³ Li' ta orae xcuxet no'ox avo'ntonic, xatse'inic no'ox, chamilic vacaxetic, chamilic chijetic, chati'ic ti'bol, chavuch'ic ya'lel ts'usub. Jech chavalic: “La' xa no'ox ve'cutic, cuch'tic lec vo', yu'un oc'om cha'ej xu' chijchamutic”, xachiic.

¹⁴ Li Muc'ul Dios ti ech'em svu'ele jech laj yalbun ta jamal: “Li smulic le'e mu'yuc ta jpasbe o perdón c'alal to chchamic”, xiyutun.

Iloq'uesat ta abtel li Sebnae

¹⁵ Li Muc'ul Dios ti ech'em svu'ele, jech laj yalbun: “Batan ta stojol li Sebna, ja' li boch'o sventainoj spasubmantal ajvalile, jech xavalbe:

¹⁶ ‘¿Boch'o laj yac'bot ta ac'ob li'i, boch'o laj yalbot ti xu' chapas amuquinal li'i, ti xu' chajoc' ch'en ti bu lec toyole, ti xu' chavom ton sventa chacux avo'ntone?

¹⁷ Li Muc'ul Diose yipal chasjipot batel ta nom jech chac c'u cha'al jun tsatsal vinic.

¹⁸ Chasbalijesot batel jech chac c'u cha'al pelota. Te chasjipot batel ti bu jamal li banamile; te chacham o. Te cotajtic chcom li caretaetic avu'un ti ja' atoyoj aba o achi'uque. Vo'ot ta aventa chich' q'uexlaltasel li avajvale xchi'uc li boch'otic te oyic ta spasubmantale.

¹⁹ Ta jnitot loq'uel ti bu nacalote; net'bil chaloc' cu'un ta avabtel.

²⁰ ‘C'alal tsta li sc'ac'alil le'e, ta xquic' tal li cajtunel Eliaquim xnich'on Hilciase.

²¹ Ja' chcac'be slap li ac'u' apoq'ue; ja' ta xcac'be xchuquin li achuc chatunese; ja' ta xcac'be ta sc'ob li avu'ele; ja' totil chc'ot yu'un li jnaclumetic ta Jerusalene xchi'uc li smomnich'nabtac Judae.

²² Li muc'ta llavi ti toj ole ja' ta jcajanbe ta snecub li smomnich'on Davide. C'alal tsjame, mu'yuc boch'o yan xu' tsmac; C'alal tsmaque, mu'yuc boch'o yan xu' tsjam.

²³ Lec nacal ta jcomtsan o jech chac c'u cha'al jch'ix lavux pajal ta te'; lec chotol chc'ot ta jun muc'ta chotlebal, lec ich'bil o ta muc' chc'ot yu'un li smomnich'nab stote.

²⁴ Ja' te chich' joc'anel ta stojol ya'yel li c'usitic tsots sc'oplal te ta sna li stote, ja' li xnich'nabtac, smomnich'nabtac, li bic'tal vasoetic, muc'tic tazaetic, xchi'uc li jaychop muc'tic poquete.

²⁵ ‘C'alal me la sta li sc'ac'alile, li lavux ti lec tsots pajal ta yavil li' ta orae ta xich' bots'el loq'uel, ta xich' c'asel, jech ta xbaj o yalel; scotol li c'usitic te joc'ole chch'ay yalel scotol’, uto”, xiyutun. Ja' laj yal stuc li Muc'ul Dios ti ech'em svu'ele.