Isaías 21 - Bible in Tzotzil de Chenalhó with Deuterocanon

Sc'oplal chich' jinesel Babilonia

¹ Laj yich' albel sc'oplal syavnaijesel li Babilonia te ta xocol banamile: Jech chac c'u cha'al li sutub ic' chloc' tal ta stuq'uil Néguev ta Sure, ja' jech ta xtal ta stojol li xocol banamil ti bu toj xi'bal sbae.

² Toj xi'bal sba c'usi laj yac'bun quil li Diose: Li boch'o ch-ac'van ta c'abal ta mucule ta ono'ox x'ac'van ta c'abal o; li boch'o tsoquesvane ta ono'ox soquesvan o. Elametic, muyanic batel. Mediaetic, bat setuic. Ta jpajes xa li avocolique.

³ C'alal chquile, ta xnic li jbec'tale; ta xca'ibe xc'uxul ta scotol jbec'tal, jech chac c'u cha'al jun ants ti cha'ibe xc'uxul c'alal ta xa xcuxe. Ta xi'alub yu'un li c'usi chca'ye; ta xbat jch'ulel yu'un li c'usi chquile.

⁴ Jeche' xa no'ox xvovet jol yu'un; solel jeche' xinicnun yu'un li xi'ele; li jujun mal c'ac'al ti ja' lec siquet to'ox chca'ye, puru xi'el xa chiyac'bun.

⁵ Ta xa xchapaj li mexae, ta xa xich' q'uibel li spoc'ale; ta xa xve'ic, ta xa x'uch'bajic. Banquilal soldadoetic, chaplanic me; ac'beic lec aceite li amaquique.

⁶ Yu'un li Muc'ul Diose jech laj yalbun: “Batan, bat va'ano boch'o tsq'uel osil ta toyol; ac'o yal scotol li c'usi chile.

⁷ Me chil ep cristianoetic cajajtic tal ta caretaetic nitbil ta cha'cha'cot ca'etique, xchi'uc me chil cajajtic tal ta buroetic xchi'uc ta camelloetique, ac'o sq'uel lec, ac'o stuc'ulan lec”, xiyutun.

⁸ Li jq'uel-osil ta toyole i'avan jech chac c'u cha'al jcot león jech laj yal: “Ajvalil, li vu'une te muyemun ta toyol ta jq'uel osil; ta c'ac'al ta ac'ubal te ta jq'uelilan o.

⁹ Laj quil chtalic ep viniquetic cajajtic ta caretaetic nitbil ta cha'cha'cot ca'etic. Oy boch'o jech laj yal laj ca'ay: ‘Ijin xa, ijin xa li Babiloniae; scotol li sloc'obal sdiosic ti lec natic spasojique lamal icom ta lum scotol, biq'uitic ililijan’, xi laj yal”, xi li jq'uel-osile.

¹⁰ Jteclumal, vo'oxuc ti pech'biloxuc ta teq'uel jech chac c'u cha'al trigoe; vu'un chacalboxuc c'usi laj yac'bun quil li Muc'ul Dios ti ech'em svu'ele, ja' li Dios yu'un Israele.

Chich' lajesel li Edome

¹¹ Laj yich' albel sc'oplal ti chlaj li Edome: Oy boch'o laj yaptaun tal ta Seir, jech laj yal: “Jq'uel-osil, ¿jayib xa ora ac'ubal? ¿Jayib xa ora ac'ubal?”, xi.

¹² Li jq'uel-osile jech laj yal: “Isacub xa osil, pero chtal xa yan velta ac'ubal noxtoc. Me chac'an chtal ajaq'uic yan veltae, la'ic me”, xi.

Laj yich' albel sc'oplal ti chlaj li xocol banamil ta Arabiae

¹³ Laj yich' albel sc'oplal ti chlaj li Arabiae: Vo'oxuc ti jxanubaloxuc liquemoxuc tal ta Dedane, ti te ch-ech' ac'ubal avu'unic ta votsajtic te' ta xocol banamile,

¹⁴ loc'anic batel, bat nupic ta be li boch'otic taquin yo'ntonique; q'uelanbeic vo' yuch'. Jnaclumetic ta Tema banamil, bat nupic ta be li boch'o chjatovic ta anile; ac'beic sve'el.

¹⁵ Yu'un chjatovic batel ta xi'elal li espada ti lec juxbil yee, xchi'uc ta xi'elal li st'ilesubil flecha ti lec xa chapale, xchi'uc ta sventa li muc'ta c'ope.

¹⁶ Li Muc'ul Diose jech laj yalbun: “C'alal jabile, jbel sc'oplal chapal chcom o; chlaj sc'oplal o smuc'ul xchi'uc stoyobbail li Cedare.

¹⁷ Jutuc xa chcom li boch'o lec sna'ic yaq'uel flechae xchi'uc li boch'o lec sna'ic pasc'op te ta Cedare”, xi li Muc'ul Diose, ja' li Dios yu'un Israele.