Isaías 20 - Bible in Tzotzil de Chenalhó with Deuterocanon

Li Egipto xchi'uc Etiopiae chlic tsalaticuc yu'un li Asiriae

¹ C'alal i'ech' jayibuc jabile, li Sargón ajvalil ta Asiriae la stac batel banquilal soldadoetic ta lum Asdod, bat stsalic li lume jech laj yu'uninic o.

² Ja'o yorail ic'opoj Muc'ul Dios, ja' la xch'amanbe ye li Isaías xnich'on Amoze, jech laj yal: “Loc'o li ac'u' alapoj ti ch'ixlajan ta lapele xchi'uc li axonobe”, x'utat. Li Isaiase la xch'un. Jeche' xt'ant'un, xchi'uc jeche' xbixbun yacan icom.

³ Jech lic yal li Muc'ul Diose: “Li cajtunel Isaiase jeche' xt'ant'un, jeche' xbixbun yacan ixanov oxib jabil. Ja' senyail ti jech chc'ot ta pasel ta stojol li Egipto xchi'uc Etiopiae.

⁴ Li ajvalil ta Asiriae ja' jech t'anajtic, xchi'uc jeche' xbixlajet yacanic chchucan batel li egiptoetic xchi'uc etiopiaetique. Chic'an batel c'alal ta queremetic, xchi'uc c'alal ta moletic. Jeche' xcachlajet xchaquic chic' batel yu'un jech ac'o q'uexovicuc li egiptoetique.

⁵ Li cristianoetique ep chi'ic, ep chch'ay yo'ntonic. Ep q'uexlal cha'yic ta scoj li Etiopía ti ja' to'ox spatoj yo'ntonic yu'une, xchi'uc li Egipto ti ja' to'ox stoyoj sbaic o xchi'uquique.

⁶ C'alal ja'o jech chc'ot ta pasele, jech chalic li boch'otic te nacajtic ta ti'ti' nabe: ‘Q'uelavilic c'usi ic'ot ta pasel ta stojol li boch'otic jpatoj to'ox co'ntontic yu'une, ti laj to'ox scoltautic loq'uel ta sc'ob li ajvalil ta Asiriae. Tana ¿boch'o xa ta jc'anbetic vocol ac'o scoltautic?’, xiic”, xi li Muc'ul Diose.