Isaías 2 - Bible in Tzotzil de Chenalhó with Deuterocanon

Li Muc'ul Diose chlic spas mantal ta sbejel banamil

¹ Li'i ja' li c'usi i'ac'bat yil yu'un Dios li Isaías xnich'on Amoz ta sventa li Judá xchi'uc Jerusalene:

² Ta slajebtic batel c'ac'ale ta xlic yich' lec yip yan velta li vits yo' bu oy sna Muc'ul Diose; ja' toyol chc'ot yu'un li yantic vitsetique; li yajvaltac jujun banamile te chtal stsob sbaic ta stojol.

³ Ep cristianoetic chtalic ta jujun lum jech chalic: “La'ic, muycutic batel ta vits yu'un li Muc'ul Diose; muycutic batel ta sna li Dios yu'un Jacobe, yu'un ja' te chijyac'butic quiltic li beetic yu'une, jech chlic xanovcutic ta bic'tal be yu'un”, xiic. Yu'un ja' te ta Sión ta xloc' tal li mantaletic yu'un Muc'ul Diose; te ta Jerusalén ta xlic tal li sc'ope.

⁴ Ja' tsva'an sba ta sq'uelel li jujun banamile; ja' chal c'u x'elan chcom c'op yu'unic ta epal lumetic. Jech chlic sc'atajesic ta locub banamil li yespadaique; chlic sc'atajesic ta jos li slanzaique. Mu'yuc xa tsmil sbaic ta espada li jujun muc'tic banamile; mu'yuc xa boch'o chchapan sba lec ta xchanel pleito.

⁵ Yalab xnich'nab Jacob, la'ic, xanovcutic ta saquil osil yu'un li Muc'ul Diose.

Li Muc'ul Diose chac'be stoj smul li jtoybaetique

⁶ Muc'ul Dios, laj xa acomtsan o li jun ta lum ateclumale, ja' li smomnich'nab Jacobe, yu'un li yosilalique nojem ta jt'unuletic ti liquemic tal ta sloq'ueb c'ac'ale, xchi'uc ep boch'otic sna'ic sq'uelel li c'usi mu xvinaj jech chac c'u cha'al oy yu'unic li filistaetique, xchi'uc co'ol yo'ntonic xchi'uc li yan lumetique.

⁷ Li yosilalique nojem ta saquil taq'uin xchi'uc ta c'anal taq'uin; mu'yuc spajebal li sc'ulejalic te oye; nojem ta ca'etic noxtoc, xchi'uc ta caretaetic; mu xa stac' atel c'u yepal.

⁸ Jech noxtoc, li yosilalique nojem ta sloc'obal c'usitic cuybilic ta dios; tsquejan sbaic ta stojol li yabtel yoc sc'obique.

⁹ Biq'uit chac' sbaic ta stojol, solel snijanoj sbaic ta stojol. ¡Mu me xapasbeic perdón!

¹⁰ Li cristianoetique chlic snac' sbaic ta stojol li Muc'ul Diose; tsnac' sbaic ta yut banamil; tstic' sbaic ta nailch'entic, yu'un toj ep xi'elal; toj tsots li stsatsal xchi'uc xojobale.

¹¹ Li jtoybaetique peq'uel chcomic; li boch'o stuc no'ox yac'oj sbaic ta stojol xchi'ilique, biq'uit chcomic. Ja' no'ox stuc Muc'ul Dios ich'bil ta muc' chcom c'alal me ic'ot sc'ac'alile.

¹² C'alal tsta sc'ac'alil yu'un li Muc'ul Dios ti ech'em svu'ele, tstsal scotol li jtoybaetique, li boch'otic stuc no'ox yac'oj sbaique, xchi'uc li boch'otic muc' yac'oj sbaique. J'ech'el tsbic'tajesatic o.

¹³ Tstsal noxtoc li boch'o ja' jechic jech chac c'u cha'al ch'ut te'etic ta Líbano, ti toj muc'tic, ti toj natique, xchi'uc ti scuyoj sbaic jech chac c'u cha'al tulantic ta Basane,

¹⁴ xchi'uc li boch'otic ja' jechic jech chac c'u cha'al muc'tic toyol vitsetique, xchi'uc ti ja' jechic jech chac c'u cha'al muc'tic stselejtic ti toyolique,

¹⁵ xchi'uc li boch'otic ja' jechic jech chac c'u cha'al toyol sq'uelubiltac osile, xchi'uc li boch'otic ja' jechic jech chac c'u cha'al tsatsal coraltonetique,

¹⁶ xchi'uc li boch'otic ja' jechic jech chac c'u cha'al barcoetic ta Tarsise, xchi'uc li boch'otic ja' jechic jech chac c'u cha'al barcoetic ti toj c'upilic sba bonbile.

¹⁷ Li jtoybaetic, li boch'otic muc' yac'oj sbaique, persa tsalbil chcomic, persa tsbic'tajesatic; ja' no'ox stuc Muc'ul Dios ich'bil ta muc' chcom c'alal me ic'ot sc'ac'alile.

¹⁸ J'ech'el tslajesbe o sc'oplal li c'usitic cuybilic ta diose.

¹⁹ C'alal chlic abtejuc li Muc'ul Diose, c'alal chlic snojes ta xi'elal li banamile, li cristianoetique tsnac' sbaic ta nailch'entic xchi'uc ta yut banamil, yu'un toj ep xi'elal chilic, xchi'uc toj tsots svu'el xchi'uc xojobal.

²⁰ C'alal chc'ot ta pasel jeche, ta sloq'uesic scotol li sdiosic pasbil ta saquil taq'uin, ta c'anal taq'uin ti spasoj stuquic sventa chich'ic ta muq'ue; tsjipic batel yo' bu oy ch'oetic xchi'uc sots'etic.

²¹ Ta xlic stic' sbaic ta japjap ch'entic, ta nailch'entic, sventa tsnac' sbaic ta stojol li Muc'ul Diose, yu'un toj xi'bal sba chilic ti c'alal chlic yac'be stoj smul li cristianoetic ta banamile, yu'un toj tsots li svu'el xchi'uc xojobale.

²² Mu me ja'uc xapat avo'ntonic yu'un li cristianoetique, yu'un ta ic' no'ox cuxulic, ¿C'usi stu ti ich'bilic ta muq'ue?