Isaías 18 - Bible in Tzotzil de Chenalhó with Deuterocanon

Sc'oplal Etiopía

¹ Toj abul sba li jun banamil ti tsots xjanet xiq'ue, ja' li banamil ti te oy ta sjelovel uc'umetic ta Etiopiae,

² ti tstac batel j'almantaletic yu'un ta ba nabe, ti ch-ochic batel ta barcoetic pasbilic ta aje, jech chalbe batel: “J'almantaletic, vo'oxuc ti lec anil xana' xaxanovique, batanic ta jun banamil ti lec natic yajvale, ti sts'ababet xa snuculilique, ja' li jun banamil ti xi'bil ono'ox tale; ja' li jun lum ti toj tsotse, ti stsaloj scotole, ti te oy ta jun banamil ti oy lec uc'umetic tee”, xut.

³ Vo'oxuc jnaclumetic, yajvaltac osil banamil, ta to xavilic chmuy bandera ta vitsetic; ta to xava'yic chbac' oq'ues te noxtoc.

⁴ Yu'un li Muc'ul Diose jech laj yalbun: “Ti bu nacalune ch'anxi-lamal chquil tal scotol jech chac c'u cha'al lec xojoban c'ac'al ta yorail q'uepelaltic, jech chac c'u cha'al lec xva'et muyel sjob osil ta xq'uixnal c'ac'al ti c'alal yorail chich' tulel ts'usubtique.

⁵ C'alal chnichin li ts'usubaltique, chlic comuc sat, pero c'alal muc to tsta yorail chich' tsobbel sate, ja'o chich' bojbel loq'uel sc'obc'ob ta machita; chich' tsobel, chich' jipel batel.

⁶ Tanpuc chbat scotol ta te'tic; ja' xa sve'el chc'ot li mutetique xchi'uc li chonbolometique. Te ch-ech' yu'unic o q'uepelaltic li mutetique; te ch-ech' yu'unic o yorail vo'olaltic li chonbolometique”, xi.

⁷ Me la sta li sc'ac'alil le'e, ja'o yorail ch-ich'bat tal ep smoton li Muc'ul Dios ti ech'em svu'ele. Ja' te chich' ich'bel tal ta slumal li natil cristianoetique, ti lec sts'abet snuculilique, ti xi'bilic ono'ox tale, ja' li jun lum ti toj tsotse, ti stsaloj scotole, ti oy lec uc'umetic te ta yosilalique. Ja' te chich'beic tal ta vits Sión yo' bu chich' ich'el ta muc' li Muc'ul Dios ti ech'em svu'ele.