Isaías 17 - Bible in Tzotzil de Chenalhó with Deuterocanon

Laj yich' albel sc'oplal Damasco

¹ Laj yich' albel sc'oplal ti chich' ulesel li Damascoe: Li lum Damascoe j'ech'el chich' yavnaijesel o; puru tonetic xa te busul chcom ta yav.

² J'ech'el mu'yuc yajval chcom o; ta xc'ataj ta puru jobeltic. Ja' te chtal xcux yo'ntonic li chonbolometique; jun yo'ntonic, mu'yuc boch'o tsibtasatic.

³ Li Efraín ti ja' stoyobbail o li Israele, ta xich' jinesbel scotol li lumetic ti lec setbilic ta tsatsal coraltone. Jech ec li Damascoe chlaj sc'oplal o li ajvalil yu'une. Li c'usitic chcom to te ta yosilal Siriae chich' jinesel scotol, jech chac c'u cha'al laj yich' pasbel li Israele, xi li Muc'ul Dios ti ech'em stsatsale.

Ch-ac'bat stoj smul li Israele

⁴ Me la sta sc'ac'alile, j'ech'el chlaj sc'oplal o li stoyobbail Jacobe; chlaj sc'oplal ti c'u x'elan slequil yutsile.

⁵ Ja' jech chich'ic pasbel jech chac c'u cha'al boch'o chtuch' trigo, ti tstsac lec ta sc'ob jujulique. Ja' jech chich'ic pasbel noxtoc jech chac c'u cha'al boch'o chtuch' trigo ta yocyoc vits ta Refaim,

⁶ ti jlicanticuc xa no'ox chcom yu'un ta nomstaje, xchi'uc li boch'o tsten sat oliva ti jbejcantic xa chcom yu'un ta jec sc'obe, ti oy ja' xa no'ox chcom chanbej, vo'bejuc yu'un ta scotole, xi li Muc'ul Dios yu'un Israele.

⁷ Me la sta li sc'ac'alil le'e, li cristianoetique ja' to te chlic yac' satic ta stojol li Jpasvanej yu'unique, ja' li Ch'ul Dios yu'un Israele.

⁸ Mu xa ja'uc te chac' batel satic ta scajleb li matanaletique, xchi'uc li c'usitic yan pasbil ta sc'obique. Mu xa ja'uc te chac' satic ta stojol li anbil te'etic ti ich'bil ta muc' yu'unique, xchi'uc ta scajleb li xchic'ubil pom yu'unique.

⁹ Me la sta li sc'ac'alile, li lumetic avu'unic ti lec setbilic ta coraltonetique solel ictabil chcom o jech chac c'u cha'al ictabil icom lumetic yu'un li hevetic xchi'uc li amorretic c'alal la stsalic li achi'iltaquic ta israelal ta vo'onee. Ja' jech chcom jech chac c'u cha'al xocol banamil.

¹⁰ Yu'un laj ach'ay ta avo'ntonic li Dios ti ja' la scoltaoxuque; muc xana'ic ti ja' anac'ubbailic c'oteme. Laj ats'unic nichimaltic ti toj c'upilic sbae; laj ats'unic yantic te'etic sventa te chavich'ic ta muc' li yan diose.

¹¹ C'alal yorail chats'unique, solel chavaq'uic ch'iuc ta ora; chac'anic ti ac'o ch'iuc ta yoc'omal no'oxe, pero li sate altic ch-ech' scotol ti c'alal chtal tsots vocol xchi'uc chamel ti mu'yuc xpoxile.

¹² A'yo ava'yic, le' xa ch-avanic tal epal cristianoetic ta yantic banamil; xc'uletic no'ox tal jech chac c'u cha'al chbac' muc'ta nab; xvochetic no'ox tal jech chac c'u cha'al chbac' nojelal uc'um.

¹³ Pero c'alal tsots chich' c'opanel yu'un Diose, chjatovic batel ta anil ta nom, jech chac c'u cha'al jobel ti cuchbil batel ta vitsetic yu'un muc'ta iq'ue, jech chac c'u cha'al pucuc ti ts'otbil batel ta sutub iq'ue.

¹⁴ Ta mal c'ac'ale toj xi'bal sbaic yilel, pero ta po'ot sacubbale mu xvinaj bu tsacch'ayic batel. Ja' jech tstaic li boch'o tspojbutic c'usitic oy cu'untique; ja' jech chich'ic li boch'otic tstsobbutic batel scotole.