Isaías 16 - Bible in Tzotzil de Chenalhó with Deuterocanon

Bat snac' sbaic ta Judá li moabetique

¹ Ja' lec tacbeic batel ch'ium chijetic li ajvalil ta Judae; licanic ta muc'ta lum Sela ta nopol xocol banamil c'alal to ta vits Sión.

² Li jnaclumetic ta Moabe ja' jech te no'ox xjoyetic ta taqui bevo' Arnón jech chac c'u cha'al mut ti sibtasbil loq'uel ta stase.

³ Jech chalbeic li Sione: “Chapo ac'opic ti ac'o acoltauncutique; pojuncutic ec li vo'oxuque; ac'o tal ayaxinalic ta jtojolcutic; yu'un ac'o comuc jech chac c'u cha'al ac'ubal li o'lol c'ac'al li'i. Nac'uncutic ec, vu'uncutic ti nutsbiluncutic loq'uele; mu me xavac'uncutic ta c'abal vu'uncutic li jatoviluncutique.

⁴ Ac'bun jnac' jbacutic ta atojol, vu'uncutic ti nutsbiluncutic loq'uel ta cosilalcutic ta Moabe; c'otan ta jnac'ubbailcutic ta stojol li jinvanej, li jsocvanej cu'uncutique”, xiic. C'alal me ilaj sc'oplal li uts'intaele, me ipaj li jsoquesvaneje, me isacch'ay batel ta banamil li boch'o chpech'ilanvan ta teq'uele,

⁵ ja'o chlic ochuc ta pasmantal jun smomnich'on li Davide; ja' tuq'uil jchapanvanej; ja' no'ox oy ta yo'nton tspas o c'usi melel, c'usi tuc'.

⁶ Li Moabe ca'yojtic c'u x'elan stalel; bats'i jtoyba, toj muc' yac'oj sba, mu'yuc jtutic ta yo'nton, c'usiuc no'ox xal, pero mu'yuc stu scotol.

⁷ Ja' yu'un ta me xlic yoc'ta sba; scotol li jnaclumetic tee ch-oq'uic, ch-avanic, solel abul sba cha'yic o; xlaj xtu'p yo'ntonic yu'un li lequil ts'usubetic yu'unic te ta Kir-haresete.

⁸ Yu'un li ts'usubtic ta Hesbón xchi'uc ta Sibmae, solel itaquijan comel; la xpech'ilanic ta teq'uel comel li jpasmantaletic ta yantic banamile. Li sc'obc'obtaque ic'ot to'ox c'alal ta Jazer; solel la slim to'ox sba batel c'alal ta xocol banamil; ijelov to'ox batel ta jot muc'ta nab.

⁹ Ja' yu'un chi'oc' yu'un li ts'usubtic ta Sibma xchi'uc ta Jazere; ta jmal ya'lel jsat yu'un li Hesbón xchi'uc Eleale, yu'un li sat c'usitic chloc' te ti sc'oplal chich' tsobele muc xa xich' tsobel ta scoj ti ilic oq'uel avanel yu'un muc'ta c'ope.

¹⁰ Li tse'ej lo'il te ta lequil banamile ilaj sc'oplal o; mu'yuc xa q'ueoj, mu'yuc xa boch'o xcuxet yo'nton te ta ts'usubaltic; mu'yuc xa tspits'ic loq'uel ya'lel ts'usub ta yavil spits'ubil; mu'yuc xa boch'o ch-avan ta xcuxetel yo'nton.

¹¹ Ja' yu'un li co'ntone toj abul sba cha'ay li Moab xchi'uc li Kir-haresete, jech chac c'u cha'al arpa ti te xtimtun o c'alal chich' tijele.

¹² Ac'o me chbat ta bic'tal vitsetic li Moabe, ac'o me tsc'an coltael o c'alal to chlubtsaj, ac'o me chbat sc'opan ta snail li sdiose, j'ech'el mu'yuc c'usi tsta o.

¹³ Ja' jech sc'oplal li Moab laj yal Muc'ul Dios ti oy xa ep sc'ac'alile.

¹⁴ Pero li' ta orae jech chal yan velta li Muc'ul Diose: “Le' ta oxib jabile, jbel sc'oplal chapal chcom ti chlaj sc'oplal o stoyobbail li Moabe, xchi'uc li yepal cristianoetic te nacajtique; jutuc xa no'ox cuxul chcomic, pero j'ech'el mu'yuc stsatsalic o”, xi li Muc'ul Diose.