Isaías 15 - Bible in Tzotzil de Chenalhó with Deuterocanon

Laj yich' albel sc'oplal ti chlaj li Moabe

¹ Laj yich' albel sc'oplal c'usi chc'ot ta pasel ta stojol li Moabe: Ta yac'ubalil c'alal chich' jinesel li lum Are, te chich' jinesel o li Moabe; ta yac'ubalil c'alal chich' jinesel li lum Kire, te ch-och yajval o ta ulesel li Moabe.

² Li jnaclumetic ta Dibone chmuyic ta toyol ta sna sdiosic, chbat oq'uicuc; li moabetique choc'taic li Nebo xchi'uc Medebae, yu'un i'ulesatic xa, yu'un scotolic juxbil sjolic xchi'uc yisimic.

³ Slapojic batel sc'u'ic ta xoraltic ti ch'ixlajan ta lapele; xme'etic no'ox ta oq'uel ta yamaq'uil sjol snaic. Xvicte-victeic no'ox ta oq'uel ta ch'ivitetic yu'unic; solel xlaj xtu'p xa yo'ntonic ta oq'uel.

⁴ Li Hesbón xchi'uc Eleale x'avetic no'ox; cha'yic to c'alal ta Jahaza ti ch-avanique. Jech chlic t'elicuc ta xi'el li soldadoetic yu'un Moabe; solel chnic ta xi'el li yo'ntonique.

⁵ Li co'ntone toj abul sba cha'ay li Moabe, yu'un li svinictaque chjatovanic batel ta anil c'alal ta Zoar; ch-anilajic batel c'alal Eglat-selisiya; x'oc'oletic chmuyic batel ta Luhit; x'avetic no'ox batel ta at-o'nton ta sbelal Horonaim.

⁶ Li vo'etic ta Nimrime i'ulan xa, li ts'i'laletique itaquijan xa; ichaman xa li sc'obc'ob te'etique; scotol li c'usitic yoxique imats'an xa scotol.

⁷ Ja' yu'un li sc'ulejalic stsobojic snac'ojique; chejanic batel scotol ta bevo'tic ta sauce-te'etic.

⁸ Ti c'alal ch-avanic ta oq'uele, tsta c'alal to ta sts'aquiltac li Moabe; tsta c'alal to ta Eglaim li me'on-oq'uel tspasique; chc'ot c'alal to ta Beer-elim li yoq'uel yavanelique.

⁹ Ac'o me nojan xa ta ch'ich' li vo'etic ta Dimone, pero yo'to chcac'be tal ep c'usi chopol ta stojol. Ta jtacbe tal leonetic sventa ac'o yulesic o li moabetic ti cuxul to chcomique, xchi'uc li boch'otic cuxajtic to chcomic ta scotol yosilalique.