Isaías 14 - Bible in Tzotzil de Chenalhó with Deuterocanon

Tsutic tal li boch'o chucbilic batel ta yan banamile

¹ Ta melel, li Muc'ul Diose c'ux ta yo'nton o li Jacobe. Staoj yav t'ujbil o yu'un li Israele. Jech ta xac' suticuc tal ta naclej ta yosilalic li israeletique. Li yantic lumetique ta xnopaj tal ta stojolic; jun chc'otic xchi'uc li yalab xnich'nab Jacobe.

² Ep cristianoetic ta yantic banamil ic'bil chbatic yu'un li israeletique; ta xchi'inic batel c'alal to ta slumalic; ta xiq'uic batel jech chac c'u cha'al smozoic te ta yosil li Muc'ul Diose. Chucbil chbat yu'unic ec li boch'otic ichucvanic to'ox batele; ta xlic spasic ta mantal ec li boch'otic i'uts'intavanic to'oxe.

Chich' na'leel ajvalil ta Babilonia

³ Israel, c'alal tsta yorail yu'un Muc'ul Dios chac' acux ta sventa li tsots avocol, li tsots at-o'nton, xchi'uc li tsots mozoinel chavich' pasbele,

⁴ chlic aval li lo'il li'i sventa chana'le li ajvalil ta Babiloniae: “¡C'uxi ipaj li j'uts'intavaneje! ¡C'uxi ilaj li simaronile!

⁵ Li Muc'ul Diose laj xa xtuch'be yip li chopol cristianoetique; laj xa sc'asbe svaston li j'uts'intavanejetique.

⁶ Ja' ti laj yuts'inta ta sc'ac'al yo'ntonic jujun lume ti scotol ora puru majel laj yac'beique, ti ta sc'ac'al yo'nton la smozoinic li yantic banamile, ti mu xa xnel li vocol laj yac'beique.

⁷ Scotol li banamile jun xa yo'nton chcuxic; x'avetic xa no'ox ta q'ueoj ta sventa ti toj xcuxet yo'ntonique.

⁸ C'alal ta natiquil c'uc'tojetic xcuxet no'ox yo'ntonic; li ch'ut te'etic ta Libanoe jech chalic ta atojol: ‘Li c'usi ora tsalbil lacome, mu'yuc xa boch'o chists'etuncutic o’, xiic.

⁹ Li yavil animaetic ta yolon banamile ch'ayel chc'ot yo'ntonic avu'un; chloq'uic tal li animaetique, chtal sq'uelicot. Li banquilaletic, li jpasmantaletic te oyique tstotsic tal, chtal staicot; li ajvaliletic to'ox ta jujun banamile tstotsic ta xchotlebic.

¹⁰ Scotolic chlic c'opojicuc, jech chalic ta aventa: ‘¿Me latsalat xa ec li vo'ote? ¿Me laco'laj xa jech chac c'u cha'aluncutic?

¹¹ Chyal xa batel ta yavil animaetic li atoyobbaile, xchi'uc li snuc' avarpae, puru xuvit xa chavaybin, ja' xa chaxpixoxuc o li xuvitetique’, xiic.

¹² “Muc'ta c'anal, vo'ot ti xaxojoban no'ox ta sacubbale, ¿c'uxi labaj yalel tal ta vinajel? ¿C'uxi laj avich' jipel yalel ta banamil vo'ot ti alajesojbe to'ox stsatsal li jujun banamile?

¹³ Vo'ot ti jech to'ox laj aval ta avo'ntone: ‘Ta ximuy batel c'alal to ta vinajel, c'alal to ta toyol; ta xbat cac' jchotleb ta sba yac'ol li c'analetic yu'un Diose. Te ta xichoti ta xocon norte ta xch'ul vitsal li tsobobbail yu'unique.

¹⁴ Ta ximuy batel ta sba yac'ol li toquetic ta toyole; co'ol chic'ot jchi'uc li Boch'o te nacal ta toyole’, xachi.

¹⁵ Pero laj avich' jipel yalel c'alal to ta yavil animaetic; laj avich' jipel ochel c'alal to ta xchac natil xab.

¹⁶ Li boch'o chayilote lec chaspajal q'uelicot; chvul ta yo'ntonic ti c'u to'ox xa'elane, jech chlic yalic: ‘Li vinic le'e ¿me ja' li boch'o laj to'ox yac' nicuc banamile, ti laj to'ox yac' xi'uc li ajvaliletic ta yantic banamile,

¹⁷ ti xco'laj xchi'uc xocol banamil la scomtsanbe li yosilalique, ti la svuq'uesan scotol li lumetique, ti mu'yuc bu la scolta o li jchuqueletic yu'une?’, xiic.

¹⁸ Scotol li yantic ajvaliletic ta jujun banamile, jun yo'ntonic chbat xcuxic ta smuquinalic, xchi'uc lec ich'bilic ta muc'.

¹⁹ Yan li vo'ote nom to chasjipoxuc batel ti bu amuquinale. Ja' jech cha'ilat jech chac c'u cha'al c'usi toj j'i'lal sba; jech cha'ilat jech chac c'u cha'al boch'o milbil ta espada chcham ti te no'ox jipbil chcom ta tontic li sbec'tale. Ja' jech chavich' pasbel jech chac c'u cha'al c'usi chcham ti te no'ox chich' pech'ilanel ta teq'uele.

²⁰ Mu'yuc chavich' muquel jech chac c'u cha'al chich' muquel li yantic ajvaliletique, yu'un laj asoques li avosilale; laj amil li cristianoetic ta alumale. Mu xu' li' tsacal chcom sts'unubal o sbatel osil li chopol cristianoetique.

²¹ Chapano abaic, milbeic li yol xnich'onique, yu'un toj chopol c'usi la spas li stotique, yu'un jech mu snopic ti tsventainic scotol li banamile, jech mu snopic ti tsnojes ta slumalic li banamile”, xachiic.

²² Li Muc'ul Dios ti ech'em svu'ele jech yaloj: “Ta jch'aybe o sbi ta banamil li Babiloniae, xchi'uc ti jayib to te chcomique, xchi'uc li xnich'nabique, xchi'uc li smomnich'nabique yu'un vu'un jtuc ta xilic ta scontrainel.

²³ Ta jc'atajesbe ta sts'anleb ach'eltic li yosilale; ta jc'atajesbe ta yavil curutsuc; ta jmes loq'uel scotol sventa ac'o uluc o”, xi yaloj li Muc'ul Dios ti ech'em svu'ele.

Chich' jinesel li Asiriae

²⁴ Li Muc'ul Dios ti ech'em svu'ele jech chal ta jamal: “Li c'usi nopbil cu'une persa chc'ot ta pasel; li c'usi chapal cu'une persa ta jpas.

²⁵ Ta ono'ox xcules li asiriaetic li' ta cosilale; ta jpech' ta teq'uel te ta vitsetic cu'un. Ta jloq'uesbe li yabtejeb vacax yac'ojbeic cu'untaque, xchi'uc li yicatsic yac'ojbeic xcuche, ta jloq'uesbeic scotol.

²⁶ Ja' jech li c'usi chapanbil cu'un ta jpas ta scotol banamile; ta jtoy jc'ob ta stojol li jujun banamile”, xi.

²⁷ Li Muc'ul Dios ti ech'em svu'ele nopbil xa yu'un ti jech tspase; mu'yuc boch'o xu' yu'un tspajes; li sc'ob stoyoje mu'yuc boch'o xu' yu'un tsyalesbe.

Chich' ulesel li filistaetique

²⁸ Ta sjabilal c'alal icham li ajvalil Acaze, li Isaiase laj yal c'usi chc'ot ta pasel ta stojol li filistaetique:

²⁹ “Filistea, mu me xcuxetuc xa avo'nton ti ic'as xa li te' laj avich' o majele, yu'un ti bu iloc' tal jcot ts'inte' ta yibel te'e, orachon xa te chloc' tal; li sat te'e chc'ataj ta muc'ta jmilvanej chon ti lec sna' xvile.

³⁰ Li boch'o bats'i me'onic yu'un li me'onetique lec tsta sve'elic; li boch'o solel abul sbaique jun yo'nton chcuxic. Pero li achi'iltaque ta jmil ta vi'nal; ta xcules o li boch'otic chcomic to avu'une.

³¹ Vo'oxuc coraltonetic, me'on-oc'anic. Vo'oxuc lumetic, avananic ta oq'uel. Vo'ot Filistea, chapal xa ac'oplal chavich'. Yu'un ta xtal muc'ta ch'ayil ta stuq'uil norte; jmoj xtomet chloc' tal, me junuc mu'yuc bu jeltos ta xtal.

³² ¿C'usi ta jtac'betic li boch'otic tacbilic tal yu'un li jun banamil le'e? Ja' no'ox chcalbetic ti lec tsots nacanbil yu'un Muc'ul Dios li lum Sione, xchi'uc ti ja' te chbat spoj sbaic li steclumal ti oy svocolique”, xi li Isaiase.